Keluaren 15:1-27
15 Kenca si e Musa ras kalak Israel ngendeken lagu enda man Jahwe,+
“Rende ateku man Jahwe, sebap luar biasa kel kemenangenNa.+
Kuda ras si nangkihisa enggo benterkenNa ku laut.+
2 Jahwe* kap si erban aku paguh ras megegeh. Sebap Ia kap si nelamatken aku.+
Ia kap Dibataku, kupuji ateku Ia.+ Ia kap Dibata bapakku,+ kumuliaken ateku Ia.+
3 Jahwe pejuang si megegeh.+ Jahwe kap gelarNa.+
4 Gereta-gereta perang ras pasuken raja Mesir benterkenNa ku laut.+
Prajurit-prajurit si megegehna gedapkenNa ku bas Laut Merah.+
5 Tutupi gelombang laut kalak e. Gedap kalak e bagi batu si ndabuh ku laut si mbages.+
6 O Jahwe, tan kananNdu seh kel gegehna.+
O Jahwe, tan kananNdu ngasup engkernepken musuh.
7 Perban luar biasa kel kuasaNdu banci kernepkenNdu kalak si ngelawan Kam.+
RawaNdu si gara ngkeriken kalak e bagi api ngkeriken nggala.*
8 Sekali saja pe Kam erkesah pajek me lau;Pajek lau e janah la kemuit bagi dingding;Lau si ergelombang beku i jantung laut.
9 Nina musuh, ‘Kuayaki janah kutaluken kalak e!
Kubagi-bagi jarahen seh asa aku puas!
Kutarik pedangku! Kutaluken kalak e alu tanku!’+
10 Sanga Kam erkesah, tutupi laut kalak e;+Gedap kalak e ku lau si ergelombang bagi logam si mberat.
11 O Jahwe, lit kin dibata si bagi Kam?+
Ise kin si bagi Kam badiana?+
Patut kel Kam ihamati alu lagu-lagu pujin, lakokenNdu perbahanen si luar biasa.+
12 Sanga pepinterNdu tan kananNdu, bendut doni kalak e.+
13 Alu kekelengenNdu si setia, tegu-teguNdu kalak si itebusNdu;+Alu gegehNdu, babaiNdu kalak e ku inganNdu si badia.
14 Begi bangsa-bangsa kerna si e,+ emaka mbiar kel kalak e;Seh kel suina kap penduduk Pilistia.
15 Paksa si e, mbiar kepala-kepala suku Edom,Penguasa-penguasa Moap si megegeh pe nggirgir.+
Kerina penduduk Kanaan lanai semangat.+
16 Mbiar ras nggirgir kalak e.+
Perban tanNdu si megegeh lanai kalak e kemuit bagi batu,Seh asa lewati umatNdu daerah kalak e, o Jahwe,Seh asa umat si ipilihNdu+ lewat arah lebe-lebe kalak e.+
17 BabaNdu kalak e ku gunungNdu, banNdu kalak e tading i je,+O Jahwe, e me ingan si enggo sikapkenNdu jadi inganNdu tading,O Jahwe, e me ingan si badia si enggo bangunNdu alu tanNdu.
18 Jahwe merentah jadi raja seh rasa lalap.+
19 Sanga kerina kuda raja Mesir ras gereta-gereta perangna bage pe prajurit-prajuritna ngayaki seh ku laut,+Tutupi Jahwe kalak e alu laut.+
Tapi kalak Israel erdalan i taneh si kerah i tengah laut.”+
20 Kenca si e buat Miriam rebana janah kerina diberu ikut main rebana janahna landek. Miriam e turang Harun janah ia sekalak nabiah.
21 Aloi Miriam dilaki si rende ndai alu enden, nina,
“Rendelah man Jahwe, sebap luar biasa kel kemenangenNa.+
Kuda ras si nangkihisa enggo benterkenNa ku laut.”+
22 Kenca si e babai Musa kalak Israel lawes arah Laut Merah nari ku taneh mesawang* si lit i Sur. Erdalan kalak e telu wari dekahna i taneh mesawang e, tapi i je la lit dat kalak e lau.
23 Dungna seh kalak e i Mara.*+ Tapi lau si lit i Mara la banci iinem perban launa pagit. E me sebapna maka ban Musa gelar ingan e Mara.
24 Emaka mulai jungut-jungut kalak e man Musa,+ nina, “Kai si inem kami?”
25 Serko Musa mindo penampat man Jahwe.+ Emaka tuduhken Jahwe sada batang kayu si kitik man bana. Sanga benterken Musa batang kayu e ku lau ndai, ntebu lau e.
Kejadin e ban Dibata jadi contoh man kalak e gelah teh kalak e kai si arapken Dibata arah kalak e nari. Uji Dibata ateNa kalak e, patuh nge kalak e ntah lang.+
26 Nina Dibata, “Adi ibegiken kena kata-kata Jahwe Dibata kena janah lakoken kena kai si erban meriah ukurKu ras perdiateken kena perentahKu bage pe dalanken kena peraturenKu,+ la Kuban terjadi man kena penakit-penakit si Kuban man kalak Mesir,+ sebap Aku kap Jahwe, Dibata si mpepalem kena.”+
27 Kenca si e seh kalak e i Elim. I je lit 12 mata lau ras 70 batang kurma. Emaka erkemah kalak e i deher lau e.
Cataten i teruh
^ As. “Jah.” Jah eme singkaten gelar Jahwe.
^ Ntah “jerami.”
^ Taneh si mbelang si jarang iingani.
^ Ertina “Pagit.”
