Keluaren 16:1-36
16 Kenca si e, berkat kerina kalak Israel arah Elim nari. Kenca tadingken kalak e Mesir, bas wari pe-15-ken, bas bulan si peduaken, seh kalak e bas Taneh Mesawang* Sin,+ si lit antara Elim ras Sinai.
2 Bas taneh mesawang* e, kerina kalak Israel mulai jungut-jungut man Musa ras Harun.+
3 Lalap kataken kalak Israel man Musa ras Harun, “Pangen min ndai kami mate ban tan Jahwe sanga kami kundul janah man daging ras roti seh asa besur i Mesir.+ Gundari enggo baba kena kami ku taneh mesawang* enda gelah mate kelihen.”+
4 Kenca si e, nina Jahwe man Musa, “Kupenusur pagi roti arah langit nari man kena.+ Tiap kalak arus ndarat guna mpepulungsa asa si perlukenna tiap wari.+ Alu bage, banci kena Kuuji, dalanken kena ntah lang undang-undangKu.+
5 Tapi bas wari peenemken,+ arus pepulung kena dua kali lipat buena asangken wari si biasana. Kerinana e arus itanggerken.”+
6 Emaka nina Musa ras Harun man kalak Israel, “Sanga enggo ben pagi, teh kena maka Jahwe kap si maba kena ndarat arah negri Mesir nari.+
7 Sanga erpagi-pagi, idah kena pagi kemulian Jahwe, perban enggo begi Jahwe kena jungut-jungut man baNa. Ise kin kami maka jungut-junguti kena kami?”
8 Nina Musa ka, “Sanga berngi bere Jahwe pagi kena daging janah sanga erpagi-pagi bereNa roti gelah kena besur. Alu bage teh kena maka enggo begi Jahwe junguti kena Ia. Tapi ise kin kami? Labo kami si junguti kena, tapi Jahwe.”+
9 Kenca si e nina Musa man Harun, “Kataken man kerina kalak Israel, ‘Enggo begi Jahwe kena jungut-jungut man baNa. Emaka arus kena pulung i jenda.’”+
10 Kenca dung ngerana Harun man kerina kalak Israel, tatap kalak Israel ku taneh mesawang* janah idahna kemulian Jahwe bas tiang embun.+
11 Nina Jahwe ka man Musa,
12 “Enggo Kubegi kalak Israel jungut-jungut.+ Emaka kataken man kalak e, ‘Sanga karaben* daging kari si pan kena, sanga erpagi-pagi roti si pan kena seh asa besur.+ Alu bage, pasti teh kena maka Aku kap Jahwe Dibata kena.’”+
13 Emaka bas berngi e rehen melala perik leto janah tertutup banna perkemahen e.+ Pepagina, kerina perkemahen e itamburi embun.
14 Kenca lanai lit embun e, lit si tading i datas taneh e,+ menipes bentukna bagi salju.
15 Kenca idah kalak Israel si e, tersungkun-sungkun kalak e, nina, “Kai enda?” Sebap la teh kalak e kai si idahna e. Nina Musa man kalak e, “Enda roti si bereken Jahwe man pangan kena.+
16 Enda si perentahken Jahwe, ‘Tiap kalak arus pepulungna menurut keperlunna. Arus pepulung kena pangan e+ menurut jumlah kalak si tading bas kemah kena. Tiap kalak ndatken kira-kira dua liter.’”*
17 Lakoken kalak Israel bage. Lit si sitik pepulungna, lit ka si mbue.
18 Kenca sukati kalak e, kalak si mbue pepulungna la kelebihen, janah kalak si sitik pepulungna la ia kekurangen.+ Tiap kalak pepulungna asa kai si perlukenna.
19 Kenca si e nina Musa man kalak e, “Ise pe la banci nimpan pangan e seh ngayak erpagi-pagi.”+
20 Tapi la begiken kalak e Musa. Lit si nimpan pangan e ngayak erpagi-pagi, emaka berngan pangan e janah seh kel bauna. Merawa kel Musa man kalak e.
21 Tiap pagi-pagi, masing-masing kalak e mpepulung pangan e asa si perlukenna. Kenca enggo las wari, cair pangan e.
22 Bas wari si peenemken, pepulung kalak e pangan ndai dua kali lipat buena,+ eme kira-kira empat liter man sekalak jelma. Emaka reh kerina peminpin kalak Israel ngelaporken si e man Musa.
23 Nina Musa man kalak e, “Bagenda nina Jahwe, pagi eme wari istrahat, wari Sabat si badia man Jahwe.+ Panggang kenalah kai pe si perlu ipanggang, belganglah kai pe si perlu ibelgang.+ Kenca si e, kai pe si sisa simpan kena seh ngayak erpagi-pagi.”
24 Emaka lakoken kalak e bagi si perentahken Musa. Simpan kalak e pangan si sisa seh asa erpagi-pagi janah pangan e la mali ntah pe berngan.
25 Nina Musa, “Pan roti e gundari perban gundari Sabat man Jahwe. Bas wari enda labo lit roti dat kena bas taneh.
26 Banci pepulung kena roti e enem wari dekahna, tapi bas wari pepituken eme wari Sabat,+ la lit roti.”
27 Amin pe bage, bas wari pepituken e lit denga kalak si ndarat mpepulung roti, tapi la lit datna kai pe.
28 Emaka nina Jahwe man Musa, “Asa kai nari dekahna kena la nggit patuh man perentah-perentahKu ras undang-undangKu?+
29 Arus inget kena maka Aku Jahwe enggo mereken Sabat man kena.+ E me sebapna bas wari peenemken Kubereken roti man kena guna keperlun dua wari. Bas wari pepituken, kerina kena arus tetap bas inganna, ise pe la banci lawes ku japa pe.”
30 Emaka lakoken kalak e Sabat bas wari pepituken.+
31 Ban kalak Israel gelar roti e “manna.”* Roti e bagi biji ketumbar janah nanamna bagi kue si menipes si itama madu.+
32 Kenca si e nina Musa, “Enda me si enggo perentahken Jahwe, ‘Simpanlah dua liter manna guna kena ras keturunen kena,+ gelah banci idah keturunen kena roti si enggo Kubere man kena i taneh mesawang,* sanga Kubaba kena ndarat arah Mesir nari.’”
33 Emaka nina Musa man Harun, “Buat sada kudin janah tama manna dua liter ku bas kudin e. Kenca si e tamaken kudin e i lebe-lebe Jahwe, gelah isimpan guna kena ras keturunen kena.”+
34 Bagi si perentahken Jahwe man Musa, tama Harun si ndai i lebe-lebe Kotak Khusus*+ gelah lalap lit.
35 Lit 40 tahun dekahna ipan kalak Israel manna+ seh asa kalak e masuk ku daerah si lit pendudukna.+ Ipan kalak e manna ngasa kalak e seh i lebe-lebe negri Kanaan.+
36 Sada omer seri ras sepersepuluh epa.*
Cataten i teruh
^ Taneh si mbelang si jarang iingani.
^ Taneh si mbelang si jarang iingani.
^ Taneh si mbelang si jarang iingani.
^ Taneh si mbelang si jarang iingani.
^ Maksudna, kenca terbenam matawari.
^ Mungkin gelar enda rehna arah bahasa Heber si ertina “Kai enda?”
^ Taneh si mbelang si jarang iingani.
^ Mungkin enda sada ingan guna nimpan surat-surat si penting.
