Keluaren 17:1-16
17 Berkat kerina kalak Israel arah Taneh Mesawang* Sin+ nari janah pindah kalak e arah sada ingan ku ingan si debanna bagi si perentahken Jahwe.+ Dungna, erkemah kalak e i Repidim.+ Tapi la lit lau man inemen i je.
2 Emaka mulai kalak e ersoal ras Musa+ janah nina kalak e, “Bereken lau inemen man kami.” Tapi nina Musa, “Engkai maka kena ersoal ras aku? Engkai maka uji kena Jahwe?”+
3 Tapi enggo muas kel kalak Israel janah terus kalak e jungut-jungut man Musa,+ nina, “Engkai maka babandu kami ndarat arah Mesir nari? Gelah mate la minem nge atendu kami ras anak-anak kami bage pe asuh-asuhen kami?”
4 Dungna serko Musa man Jahwe, nina, “Uga nari nge kuban man kalak enda? Kentisik nari benteri kalak e me aku alu batu!”
5 Kenca si e nina Jahwe man Musa, “Laweslah kam ras piga-piga peminpin kalak Israel janah erdalanlah kena i lebe-lebe kalak Israel. Baba tongkat si pakendu sanga mekpek Lau Nil.+
6 Tedis pagi Aku i lebe-lebendu eme i datas batu si lit i Horep.* Arus pekpekndu batu e, ndarat pagi lau bas batu e nari janah inem kalak e lau e.”+ Lakoken Musa bage i lebe-lebe peminpin-peminpin Israel.
7 Emaka ban Musa gelar ingan e Masa*+ ras Meriba*+ perban i je enggo ersoal ia ras kalak Israel janah uji kalak e Jahwe+ alu ngataken, “Tuhu nge lit Jahwe ras kita ntah lang?”
8 Kenca si e reh kalak Amalek+ nyerang kalak Israel i Repidim.+
9 Megi si e nina Musa man Josua,+ “Pilihlah piga-piga dilaki janah lawanlah kalak Amalek. Pagi, tedis aku i puncak bukit janahku njemak tongkat Dibata si benar.”
10 Lakoken Josua bagi si perentahken Musa man bana,+ janah lawanna kalak Amalek. Musa, Harun, ras Hur+ lawes ku puncak bukit.
11 Sanga angkat Musa tanna ku datas, menang kalak Israel. Tapi sanga penusurna tanna, kalak Amalek si menang.
12 Sanga enggo latih akap Musa, buat Harun ras Hur sada batu jadi ingan kundul Musa. Angkat kalak e tan Musa, sada arah kirina janah sada nari arah kananna, gelah tan Musa tetap terangkat ngasa matawari terbenam.
13 Taluken Josua kalak Amalek ras pasukenna alu pedang.+
14 Emaka nina Jahwe man Musa, “Gelah si e lalap iinget, tulislah bagenda bas buku, ‘Kukernepken pagi kalak Amalek bas doni enda nari janah lanai pagi kalak e iinget.’+ Kataken ka kerna si e man Josua.”
15 Kenca si e ban Musa sada ingan nutung* persembahen janah banna gelarna Jahwe-nissi,*
16 janah nina Musa, “Perban enggo lawan kalak Amalek pemerentahen Jahwe,*+ erperang Jahwe ngelawan kalak Amalek ras kerina keturunenna.”+
Cataten i teruh
^ Taneh si mbelang si jarang iingani.
^ Ntah “Gunung Sinai.”
^ Ertina “Ujin; Percuban.”
^ Ertina “Ersoal; Sijawapen.”
^ Ertina “Jahwe kap Tiangku si Mereken Tanda man Bangku.”
^ As. “Jah.” Jah eme singkaten gelar Jahwe.
