Keluaren 18:1-27
18 Jetero eme imam Midian. Ia mama Musa.+ Enggo begina kerina si lakoken Dibata man Musa bage pe man umatNa Israel. Begina ka kerna uga Jahwe maba kalak Israel ndarat arah Mesir nari.+
2 Ope si e, suruh Musa diberuna mulih ku rumah Jetero, emaka Jetero si njaga Sipora
3 ras duana anak Musa.+ Sada gelarna Gersom*+ sebap nina Musa, “Enggo jadi penduduk asing aku bas negri asing.”
4 Si sada nari banna gelarna Elieser,* sebap nina, “Dibata bapakku kap si nampati aku, si enggo nelamatken aku arah pedang raja Mesir nari.”+
5 Emaka dahi Jetero me Musa. Babana anak-anak Musa ras diberu Musa. Paksa si e Musa sangana erkemah i taneh mesawang* bas gunung Dibata si benar.+
6 Kenca si e kirim Jetero+ pesan man Musa maka reh atena radu ras diberu Musa bage pe duana anakna.
7 Mis alo-alo Musa mamana, sujud ia janah emana. Kenca kalak e sisalam-salamen, masuk kalak e ku kemah.
8 Ceritaken Musa man mamana kerina si enggo lakoken Jahwe man raja Mesir ras man kalak Mesir guna kepentingen kalak Israel.+ Ceritakenna ka kesusahen si adapi kalak e bas perdalanen,+ janah uga Jahwe mbebasken kalak e.
9 Meriah ukur Jetero meteh kerina si mehuli si enggo lakoken Jahwe man kalak Israel alu nelamatken kalak e arah Mesir nari.
10 Kenca si e nina Jetero, “Terpujilah Jahwe si enggo nelamatken kena arah Mesir nari bage pe arah raja Mesir, ras si enggo nelamatken umatNa arah kuasa kalak Mesir nari.
11 Arah perbahanenNa man kalak Mesir si sombong man umatNa, enggo kuteh gundari maka hebaten Jahwe asangken kerina dibata si deban.”+
12 Kenca si e baba Jetero persembahen tutungen ras korban man Dibata. Reh Harun bage pe kerina peminpin Israel guna man korban e radu ras mama Musa i lebe-lebe Dibata si benar.
13 Paginna, kundul Musa bagi biasana guna ngelayani jadi hakim man kalak Israel. Kalak Israel lalap rehen janah tedis i lebe-lebe Musa mulai erpagi-pagi nari seh ngasa berngi.
14 Kenca idah mama Musa kerina si lakoken Musa, nina, “Engkai maka bage banndu man kalak e? Mulai pagi-pagi nari seh ngasa berngi enggo enterem kalak tedis i lebe-lebendu, engkai maka sisada kam ngelakoken tugas enda?”
15 Nina Musa man mamana, “Perban lalap kalak e rehen mindo petunjuk Dibata man bangku.
16 Adi lit dua kalak si ermasalah, reh kalak e ndahi aku. Kenca si e arus kuhakimi masalah kalak e, janah kupeseh uga keputusen Dibata si benar ras undang-undangNa.”+
17 Nina mama Musa man Musa, “La kap cocok si ibanndu e.
18 Pasti latih pagi akapndu ras kalak Israel. Perban tugas enda mberatsa man bandu janah labo kam ngasup ngelakokenca sisada.
19 Gundari begiken aku. Kubereken ateku pedah man bandu janah pasti kam temani Dibata.+ Kam jadi wakil i lebe-lebe Dibata si benar guna kalak Israel.+ Emaka arus babandu masalah kalak e ku lebe-lebe Dibata si benar.+
20 Arus persingetindu kalak e kerna peraturen-peraturen ras undang-undang Dibata.+ Arus ka katakenndu man kalak e uga arusna kalak e nggeluh ras kai si arus lakoken kalak e.
21 Tapi arus pilihndu dilaki-dilaki si beluh arah kalak Israel,+ dilaki si mbiar man Dibata, si banci terteki, ras la nggit isogok.+ Lantik kalak e jadi peminpin si ngawasi seribu kalak, si ngawasi seratus kalak, si ngawasi lima puluh kalak, ras si ngawasi sepuluh kalak.+
22 Kalak e si ngakimi kalak Israel adi lit masalah. Masalah si mberat berekenna pagi man bandu,+ tapi masalah si kitik kalak e saja si ndungisa. Alu bage reh nukahna kapndu ndalanken tugasndu, sebap enggo ras-ras kena ndalanken tugas e.+
23 Adi bage banndu janah adi si e cocok ras perentah Dibata, lanai pagi kapndu latih janah kerina kalak banci mulih ku rumahna alu ermeriah ukur.”
24 Begiken Musa pedah mamana e janah lakokenna kerina si katakenna ndai.
25 Pilih Musa dilaki-dilaki arah kalak Israel janah lantikna jadi peminpin-peminpin. Lit jadi peminpin si ngawasi seribu kalak, si ngawasi seratus kalak, si ngawasi lima puluh kalak, ras si ngawasi sepuluh kalak.
26 Emaka adi lit masalah, kalak e si ngakimisa. Masalah si mberat baba kalak e ku Musa,+ tapi masalah si kitik kalak e si ngakimisa.
27 Kenca si e salami Musa mamana janah sirang kalak e.+ Mulih mamana ku kutana.
Cataten i teruh
^ Ertina “Jadi Kalak Asing i Jah.”
^ Ertina “Dibataku kap Si Nampati.”
^ Taneh si mbelang si jarang iingani.
