Keluaren 19:1-25
19 Bas bulan si peteluken kenca kalak Israel ndarat arah Mesir nari, seh kalak e i Taneh Mesawang* Sinai.
2 Berkat kalak e arah Repidim+ nari janah bas wari e seh kalak e i Taneh Mesawang* Sinai. I je kalak e erkemah, i lebe-lebe gunung.+
3 Kenca si e nangkih Musa ku gunung ngadap man Dibata si benar. Ngerana Jahwe arah gunung e nari,+ nina, “Kataken bagenda man keturunen Jakup, eme kalak Israel,
4 ‘Enggo idah kena kai si Kulakoken man kalak Mesir+ guna maba kena man bangKu, bagi kuliki maba anak-anakna alu kabengna.+
5 Adi tuhu-tuhu kena patuh man kata-kataKu janah setia kena man perjanjinKu, kena pagi jadi umatKu si istimewa, si Kupilih arah kerina bangsa.+ Aku kap si mpuna doni enda.+
6 Kena pagi jadi kerajan si ipinpin imam-imam ras jadi bangsa si badia man bangKu.’+ Enda me kata-kata si arus pesehndu man kalak Israel.”
7 Emaka lawes Musa janah pepulungna peminpin-peminpin kalak Israel janah pesehna man kalak e kai si enggo perentahken Jahwe man bana.+
8 Kenca si e kerina kalak Israel ras-ras ngataken, “Nggit kami ngikutken kerina si kataken Jahwe.”+ Mis peseh Musa jawapen kalak Israel man Jahwe.
9 Emaka nina Jahwe man Musa, “Reh pagi Aku bas embun si mekapal, gelah begi bangsa e pagi soraKu sanga Aku ngerana man bandu, gelah lalap kalak e tek man bandu.” Kenca si e peseh Musa kata-kata kalak Israel man Jahwe.
10 Dung e nina Jahwe man Musa, “Jumpailah kalak Israel. Kataken gelah pebadiaken kalak e dirina bas wari enda ras pagi. Arus ka cuci kalak e uisna.
11 Dua wari nari, kerina kalak e arus enggo ersikap, perban bas wari e nusur Jahwe ku Gunung Sinai i lebe-lebe kalak e.
12 Arus banndu batas i sekeliling gunung enda janah kataken man kalak e, ‘Ula sempat kena nangkih ku gunung e janah ula deheri kena. Ise pe si ndeheri gunung e arus ibunuh.
13 La banci ia ijemak, tapi arus ibenteri alu batu ntah pe ipanah. La soal ia manusia ntah pe binatang, ia la banci ipediat nggeluh.’+ Kenca terbegi pagi sora trompet+ maka banci deheri kalak e gunung e.”
14 Kenca si e nusur Musa arah gunung nari janah isuruhna kalak Israel mpebadiaken diri. Cuci kalak e uisna.+
15 Nina Musa man kalak e, “Ersikaplah kena guna wari si peteluken e. Ula kena erhubungen seks.”
16 Kenca seh wari e, sanga erpagi-pagi, lit lenggur ras kilap. Lit ka embun si mekapal+ bas gunung e bage pe sora trompet si seh kel gangna. Mbiar kerina kalak si lit i perkemahen.+
17 Baba Musa kalak Israel ndarat arah perkemahen nari guna jumpa ras Dibata si benar. Tedis kalak e i deher gunung e.
18 Tutupi asap me Gunung Sinai perban nusur Jahwe bas api.+ Nangkih asap e bagi asap si rehna arah tungku si galang nari janah mugur-ugur gunung e.+
19 Sora trompet ndai terus reh gangna. Ngerana Musa janah aloi Dibata* si benar ia.
20 Emaka nusur Jahwe ku puncak Gunung Sinai. Kenca si e lebuh Jahwe me Musa ku puncak gunung e, emaka nangkih Musa.+
21 Nina Jahwe man Musa, “Nusurlah kam, persingeti kalak e gelah ula cubaken kalak e ngenen Jahwe alu ngelewati batas si enggo iban, adi lang enterem pagi si mate.
22 Imam-imam si biasa reh ku lebe-lebe Jahwe pe arus pebadiana dirina, gelah kalak e la ihukum Jahwe.”+
23 Kenca si e nina Musa man Jahwe, “Labo pagi banci nangkihi kalak Israel gunung e perban enggo persingetiNdu kami, perban katakenNdu, ‘Banlah batas bas sekeliling gunung e sebap gunung e badia.’”+
24 Nina Jahwe man Musa, “Nusurlah kam, jenari reh ka pagi kam ras Harun. Tapi ula pediat imam-imam bage pe kalak Israel ndahi Jahwe alu ngelewati batas si enggo iban, gelah la kalak e Kubunuh.”+
25 Emaka nusur Musa janah pesehna e man kalak Israel.
Cataten i teruh
^ Taneh si mbelang si jarang iingani.
^ Taneh si mbelang si jarang iingani.
^ As. “aloi sora Dibata.”
