Keluaren 2:1-25
2 Paksa si e, lit sekalak dilaki arah suku Lewi si ngempoi sekalak diberu arah suku Lewi.+
2 Hamil diberu e janah lahirkenna anak dilaki. Mejile kel rupa anakna e, emaka ibunikenna telu bulan dekahna.+
3 Sanga lanai banci bunikenna anakna e,+ buatna keranjang* si iban arah batang papirus nari janah lapisina alu ter. Jenari tamana anakna e ku bas. Kenca si e tamana keranjang e i tengah peren-peren si turah i tepi Lau Nil.
4 Tapi kakak anak bayi e+ tedis arah dauh-dauh nari guna ngenen kai kari si terjadi man bayi e.
5 Ridi putri raja Mesir ku Lau Nil. Pelayan-pelayanna erdalan-dalan i tepi Lau Nil e. Kenca si e idah putri e keranjang ndai i tengah peren-peren. Mis suruhna budakna si diberu muatsa.+
6 Sanga bukana keranjang e, idahna sekalak bayi dilaki sangana tangis bas keranjang e. Mekuah atena janah nina, “Enda pasti anak kalak Heber.”
7 Kenca si e nina kakak bayi e man putri raja, “Nggit kam kulebuh sekalak diberu arah kalak Heber nari guna ngurus bayi enda?”
8 Nina putri raja man bana, “Ue, banci.” Emaka mis ia lawes janah lebuhna mamak bayi e.+
9 Kenca si e nina putri raja Mesir man mamak bayi e, “Babandulah anak e janah urus ia. Kugalari pagi upahndu.” Emaka baba diberu e bayi ndai, janah ia si ngurussa.
10 Sanga anak e enggo galang, bere mamakna anak e man putri raja Mesir, jadi anak putri e me ia.+ Banna gelarna Musa* perban lau nari ia ibuat.+
11 Bas sada wari, sanga Musa enggo dewasa,* lawes ia ndahi senina-seninana kalak Heber si sangana kerja paksa.+ Idahna sekalak seninana ipekpeki sekalak kalak Mesir.
12 Emaka nenna ku sekelilingna guna mastiken la lit ise pe i je. Kenca si e, bunuhna kalak Mesir e janah bunikenna bas kersik.+
13 Paginna lawes ka ia janah idahna dua kalak Heber sangana rubati. Emaka nina man si ersalah, “Engkai maka pekpekndu temanndu?”+
14 Megi si e nina kalak Heber e, “Ise si milih kam jadi peminpin ras hakim kami? Bunuhndu ka atendu aku bagi kam munuh kalak Mesir nderbih?”+ Emaka mbiar Musa janah nina bas ukurna, “Pasti enggo teh kalak si kulakoken!”
15 Dungna begi raja kerna si e janah bunuhna atena Musa. Tapi kiam Musa ku taneh Midian+ janah tading ia i je. Kenca seh i je, kundul ia i deher sada sumur.
16 Lit sekalak imam bas Midian+ janah lit pitu anakna diberu. Lawes anak-anakna e ku sumur muat lau guna ngisi ingan minem asuh-asuhen gelah banci minem asuh-asuhen bapakna.
17 Tapi bagi biasana reh permakan-permakan janah pelawesna kalak e. Ngidah si e, sampati* Musa diberu-diberu e janah berena asuh-asuhen kalak e minem.
18 Sanga mulih kalak e ku rumah bapakna eme Rehuel,*+ nungkun bapakna, “Engkai maka meter kel kena mulih sekalenda?”
19 Nina kalak e ngaloisa, “Sanga pelawes permakan-permakan kami, lit kalak Mesir+ si nampati kami. Buatna ka lau man kami janah berena minem asuh-asuhenta.”
20 Nina man anak-anakna e, “I ja ia gundari? Engkai maka tadingken kena ia? Lebuh ia gelah ras kita man.”
21 Setuju me Musa tading ras Jetero, jenari bereken Jetero anakna eme Sipora+ jadi diberu Musa.
22 Kenca si e lahirken Sipora sekalak anak dilaki janah ban Musa gelarna Gersom,*+ sebap nina, “Aku penduduk asing bas negri enda.”+
23 Ertahun-tahun kenca si e, mate me raja Mesir.+ Tapi kalak Israel lalap denga rate mesui ras jungut-jungut perban iperbudak. Lalap kalak e nderkuh mindo penampat man Dibata si benar.+
24 Dungna begi Dibata sora nderkuh+ kalak e janah ingetNa janjiNa man Abraham, Isak, ras Jakup.+
25 Emaka perdiateken Dibata me kalak Israel, janah idahNa kesusahen kalak e.
Cataten i teruh
^ Ntah “kotak.”
^ Ertina “Itarik Ndarat,” maksudna iselamatken arah lau nari.
^ Ntah “Musa reh gegehna.”
^ Ntah “ibela.”
^ Maksudna, Jetero.
^ Ertina “Jadi Kalak Asing i Jah.”
