Keluaren 20:1-26
20 Kenca si e bereken Dibata kerina perentah enda:+
2 “Aku kap Jahwe Dibata kena, si maba kena ndarat arah Mesir nari, arah ingan kena iperbudak.+
3 Aku saja ngenca si arus sembah kena. Ula sembah kena dibata-dibata si deban.+
4 “Ula ban kena patung ntah kai pe si bentukna mirip ras kai pe si lit i langit, i doni, ras si lit bas lau.+
5 Ula kena sujud ntah pe nembah man bana.*+ Sebap Aku kap Jahwe Dibata kena, Aku saja si arus sembah kena.+ Adi lit kalak si rate segat man bangKu, Kupediat pagi anak-anakna seh ku keturunenna si peteluken ras si peempatken dat akibat arah dosa-dosana.
6 Kubuktiken pagi kekelengenKu si setia man kalak si engkelengi Aku ras si patuh man perentah-perentahKu+ seh ku keturunenna si peseribuken.
7 “Ula gunaken gelar Jahwe Dibata kena alu sembarangen,+ perban kalak si nggunaken gelarNa alu sembarangen pasti ihukum Jahwe.+
8 “Ingetlah wari Sabat janah pebadia wari e.+
9 Enem wari dekahna kena erdahin.+
10 Tapi wari si pepituken eme wari Sabat man Jahwe Dibata kena. Bas wari e, kena la banci erdahin, termasuk anak-anak kena si dilaki ras si diberu, budak kena si dilaki ras si diberu, asuh-asuhen kena, bage pe penduduk asing si tading bas kota* kena.+
11 Sebap enem wari dekahna ciptaken Jahwe langit ras doni, laut, ras kerina isina, janah bas wari pepituken istrahat Ia.+ E me sebapna ipasu-pasu Jahwe wari Sabat janah pebadiaNa wari e.
12 “Hamatilah bapak kena ras mamak kena,+ gelah gedang umur kena bas negri si bereken Jahwe Dibata kena man kena.+
13 “Ula kena munuh.+
14 “Ula kena erlua-lua.+
15 “Ula kena nangko.+
16 “Ula ban kena kesaksin palsu kerna kalak si deban.+
17 “Ula kena merhat nandangi rumah kalak. Ula kena merhat nandangi diberu kalak,+ ntah pe budakna si dilaki, budakna si diberu, lembuna, keledena, ntah kai pe si lit bas kalak si deban.”+
18 Begi kalak e sora lenggur ras sora trompet. Idah kalak e ka kilap ras asap bas gunung e. Kerina e erban kalak e nggirgir ban biarna, emaka ndauh-ndauh nari kalak e tedis.+
19 Jenari nina kalak e man Musa, “Kam saja si ngerana man kami, pasti begiken kami. Ula min Dibata si ngerana man kami, sebap mbiar kami mate.”+
20 Emaka nina Musa man kalak e, “Ula kena mbiar, sebap guna nguji kena+ nge Dibata reh gelah terus kena mbiar man baNa, alu bage la lakoken kena dosa.”+
21 Emaka kalak e tetap tedis ndauh-ndauh nari, tapi Musa lawes ndeheri embun si mekapal ingan Dibata si benar e.+
22 Kenca si e nina Jahwe man Musa, “Bagendalah nindu man kalak Israel, ‘Enggo idah kena Aku ngerana man kena arah surga nari.+
23 Ula ban kena berhala arah emas ntah pe pirak, sebap la banci sembah kena dibata si deban selain Aku.+
24 Banlah ingan nutung* persembahen man bangKu arah taneh nari. Persembahken kenalah i je persembahen tutungen, korban persadan, biri-biri, kambing, ras lembu. Ingan si apai pe si Kupilih guna nginget gelarKu,+ reh pagi Aku ku je janah Kupasu-pasu kena.
25 Adi ban kena ingan nutung persembahen man bangKu arah batu nari, ula ban kena arah batu si enggo ipotong. Sebap adi pake kena pahat guna erbanca,+ ingan nutung persembahen e jadi najis.
26 Ula pake kena tangga guna nangkih ku ingan nutung persembahen e, gelah ula teridah si la perlu iidah* sanga kena nangkih arah tangga e.’
Cataten i teruh
^ As. “ntah pe ngelayani ia.”
^ As. “gerbang.”
^ Ntah “ula teridah alat kelamin kena.”
