Keluaren 21:1-36
21 “Enda me undang-undang si arus pesehndu man kalak e:+
2 “Adi tukur kena sekalak budak arah kalak Heber,+ janah enggo layanina kena enem tahun dekahna, bas tahun si pepituken, arus bebasken ia alu la nggalar kai pe.+
3 Adi lenga ia erjabu sanga jadi budak kena, ia saja si bebas. Tapi adi enggo lit diberuna sanga ia jadi budak kena, diberuna e pe arus ikut bebas ras ia.
4 Adi bere tuanna ia sekalak diberu jadi diberuna, janah lahirken diberuna e anak-anak si dilaki ras si diberu, diberuna ras anak-anakna e jadi jang tuanna. Sanga ia bebas, ia saja ngenca si banci lawes.+
5 Tapi adi la nggit budakna e lawes janah nina, ‘Keleng ateku tuanku, diberuku, ras anak-anakku, la aku nggit bebas,’+
6 arus baba tuanna ia ku lebe-lebe Dibata si benar. Kenca si e arus suruh tuanna budak e tertande ku pintu ntah pe ku kusen pintu, jenari itindik tuanna e cupingna alu jarum janah jadi budakna ia rasa lalap.
7 “Adi lit si ndayaken anakna si diberu jadi budak, cara anak e ibebasken la seri ras cara mbebasken budak si dilaki.
8 Adi la ngena ate tuanna man bana, janah la ibanna ia jadi gundikna* tapi dayakenna atena ia man kalak si deban, la lit hak tuanna e ndayaken ia man kalak asing, perban enggo hianati tuanna e ia.
9 Adi pejabu tuanna anakna ras budak e, arus seri perbahanenna man budak e bagi man anakna.
10 Adi erjabu ka anak tuanna e, arus tetap bere anak tuanna e pangan ras paken man diberuna si pertama ndai janah lakokenna kewajipenna selaku perbulangen.*+
11 Adi la cukupi perbulangenna si telu e, budak si empoina ndai bebas lawes janah la perlu nggalar kai pe.
12 “Ise pe si mekpek kalak si deban janah mate ibanna, ia arus ibunuh.+
13 Tapi adi la ia sengaja ngelakokenca janah pediat Dibata si benar e terjadi, banci ia kiam ku ingan si enggo Kutetapken.+
14 Adi lit kalak si nembeh kel atena man kalak si deban jenari bunuhna,+ si munuh e arus ibunuh, aminna pe enggo lawes ia ku ingan nutung* persembahenKu guna erlindung.+
15 Ise pe si mekpek bapakna ntah pe mamakna, ia arus ibunuh.+
16 “Ise pe si nculik kalak si deban+ janah dayakenna ntah pe tereteh ia nahan kalak si culikna e,+ ia arus ibunuh.+
17 “Ise pe si numpahi bapakna ras mamakna arus ibunuh.+
18 “Adi lit kalak si rubati janah pekpekna temanna e alu batu ntah pe tinjuna,* tapi la mate janah terpaksa ampar bas ingan medem, enda me si arus ilakoken:
19 Adi kalak si pekpekna e ngasup denga erdalan alu tongkat, kalak si mekpeksa ndai bebas arah hukumen. Tapi arus biayaina seh ngasa malem, perban kalak si pekpekna e la ngasup erdahin.
20 “Adi lit si mekpek budakna si dilaki ntah pe si diberu alu tongkat seh ngasa mate, ia arus ihukum.+
21 Tapi adi paginna ntah pe dua wari kenca si e maka mate budak e, tuanna e la perlu ihukum, sebap ia enggo kebenen budak si tukurna alu senna.
22 “Adi lit piga-piga dilaki rubati janah suin iban kalak e diberu si sangana hamil, jenari melahirken diberu e ope lenga seh waktuna,+ tapi la lit si mate,* kalak si ersalah e arus nggalar ganti rugi bagi si ipindo perbulangen diberu e, janah ganti rugi si pindona e arus isetujui hakim.+
23 Tapi adi lit si mate,* hukumenna eme kap kesah ganti kesah,+
24 mata ganti mata, ipen ganti ipen, tan ganti tan, nahe ganti nahe,+
25 si meseng ganti si meseng, luka ganti luka, bengkak ganti bengkak.
26 “Adi lit kalak si mekpek budakna si dilaki ntah pe si diberu janah ceda banna matana, arus bebaskenna budakna e jadi ganti rugi matana ndai.+
27 Adi pekpekna budakna si dilaki ntah pe si diberu seh ngayak penggel ipenna, arus bebaskenna budakna e jadi ganti rugi man ipenna ndai.
28 “Adi lit sekalak dilaki ntah pe diberu mate perban itanduk lembu, lembu e arus ibenteri alu batu seh ngasa mate.+ Daging lembu e la banci ipan, janah si mpuna lembu e la ihukum.
29 Tapi adi enggo biasa itanduk lembu e kalak si deban janah si mpuna lembu e enggo ipersingeti tapi lalap la jagana lembuna e, janah dungna mate ban lembu e sekalak dilaki ntah pe diberu, lembu e arus ibenteri alu batu janah si mpuna lembu e pe arus ibunuh.
30 Tapi adi si mpuna lembu ndai isuruh nggalar guna nebusi kesahna, arus galarina kerina asa si enggo itentuken.
31 Bage ka me undang-undang si iban man si mpuna lembu e adi itanduk lembu e sekalak anak dilaki ntah pe diberu.
32 Adi itanduk lembu e budak si dilaki ntah pe si diberu, arus galari si mpuna lembu 30 sen logam pirak* man tuan budak e, janah lembu e arus ibenteri alu batu seh ngasa mate.
33 “Adi lit kalak si mbuka tutup lubang ntah pe nggali lubang janah la tutupna lubang e, jenari lit lembu ntah pe kelede si ndabuh ku bas,
34 si mpuna lubang e arus nggalari ganti rugi+ man si mpuna lembu ntah pe kelede e, janah binatang si mate e jadi jang si mpuna lubang e.
35 Adi lit lembu si munuh lembu kalak si deban, lembu si nggeluh e arus idayaken janah senna ibagi dua. Lembu si mate e pe arus ibagi dua.
36 Tapi adi enggo teh si mpuna lembu e maka lembuna tukang nanduk janah la jagaina, arus berekenna sada lembu jadi gantina, janah lembu si mate e banci man bana.
Cataten i teruh
^ Maksudna, erhubungen seks.
^ Ntah banci saja “make alat.”
^ Ntah “la lit si luka parah.”
^ Ntah “adi mate diberu e ntah pe anakna.”
^ As. “30 sekel.” Beratna kira-kira 342 gram.
