Keluaren 22:1-31
22 “Adi lit kalak si nangko lembu ntah pe biri-biri jenari gelehna ntah pe dayakenna, arus berena ganti rugi. Adi sada lembu si itangkona e, arus gantina jadi lima lembu, tapi adi sada biri-biri si tangkona e, arus gantina alu empat biri-biri.+
2 (“Adi lit pinangko+ si terdat nangko janah ipekpeki ia seh asa mate, kalak si mekpekisa e la rutang dareh.
3 Tapi adi si e terjadi sanga terang denga wari, kalak si mekpekisa ndai rutang dareh.)
“Pinangko e arus nggalari ganti rugi. Adi la lit kai pe bas ia, ia arus idayaken jadi ganti rugi guna nggalari si tangkona ndai.
4 Adi si tangkona e lembu, kelede, ntah pe biri-biri, janah nggeluh denga bas ia, arus galarina ganti rugi dua kali lipat.
5 “Adi lit si maba asuh-asuhenna nggagat bas jumana ntah pe bas kebun anggurna, jenari pediatna asuh-asuhenna e nggagat ku juma kalak, arus galarina ganti rugi alu hasil jumana si mejilena ntah pe alu hasil kebun anggurna.
6 “Adi lit kalak si mpegara api janah nyebar api e ku dukut-dukut jenari tertutung banna hasil juma ntah pe gandum* si lenga iperani bage pe juma kalak si deban, arus galarina ganti rugi nandangi kai si enggo meseng e.
7 “Adi lit si nitipken sen ntah pe barangna man temanna janah tangko kalak arah rumah temanna e, adi terdat si nangkosa e, arus galari si nangko e dua kali lipat.+
8 Adi la dat pinangko e, si mpuna rumah e arus ibaba ku lebe-lebe Dibata si benar+ guna meteh ia ntah lang si muat barang temanna e.
9 Adi lit si nuduh kalak si deban muniken si labo jangna, la soal e lembu, kelede, biri-biri, paken, ntah barang kai pe si bene, arus kalak e lawes ku lebe-lebe Dibata si benar guna meteh jang ise kin e situhuna.+ Dibata pagi si ngatakenca ise si ersalah. Arus ka galari si ersalah e ganti rugi dua kali lipat.+
10 “Adi lit si nitipken kelede, ntah lembu, ntah biri-biri, ntah pe asuh-asuhen si debanna man temanna, janah lit si mate arah asuh-asuhen e, lit ka si luka parah, ntah pe itangko kalak sanga la lit si ngidahsa,
11 temanna ndai arus ersumpah i lebe-lebe Jahwe maka labo lit buatna jang temanna e. Si mpuna asuh-asuhen ndai arus ngaloken sumpahna e janah temanna ndai la perlu nggalar ganti rugi.+
12 Tapi adi asuh-asuhen e itangko arah ia nari, arus galarina ganti rugi man si mpuna.
13 Adi asuh-asuhen e ipan binatang buas, la perlu galarina ganti rugina, tapi arus babana bangke binatang e jadi buktina.
14 “Tapi adi lit kalak si minjam binatang temanna janah parah luka binatang e ntah pe mate sanga la je si mpuna, arus galari si minjam e ganti rugi.
15 Tapi adi je si mpuna, la perlu galarina ganti rugi. Adi binatang e isewa, sen sewana saja si perlu galarina.
16 “Adi lit dilaki si ngerayu singuda-nguda si lenga ertunangen janah erhubungen seks ia duana, arus galarina sen maharna janah empoina diberu e.+
17 Tapi adi la bere bapak diberu e anakna empoi dilaki e, arus tetap galari dilaki e sen mahar bagi si enggo itentuken.
18 “Kerina diberu si tukang sihir arus ibunuh.+
19 “Ise pe si erhubungen seks ras binatang arus ibunuh.+
20 “Ise pe si erban korban persembahen man dibata-dibata si deban selain man Jahwe arus ihukum mate.+
21 “Ula kena kasar man penduduk asing janah ula siksa kena kalak e.+ Perban kena pe sange penduduk asing nge i negri Mesir.+
22 “Ula ban kena susah akap janda ntah pe anak si la erbapa.*+
23 Adi susah kalak e ban kena janah mindo penampat kalak e man bangKu, pasti Kubegiken kalak e.+
24 Pasti merawa kel Aku janah Kubunuh kena alu pedang. Diberu kena jadi janda janah anak kena lanai erbapa.
25 “Adi pinjamken kena sen kena man kalak si mesera si lit bas umatKu, ula pindo kena bungana. Ula kena jadi kalak si mbungaken sen man bana.+
26 “Adi buat kena jubah teman kena guna jadi jaminen man utangna,+ arus ulihken kena jubahna e ope lenga terbenam matawari.
27 Sebap e ngenca jubahna gelah ula ia bergehen. Adi la lit jubah e, kai pagi pakena sanga ia medem?+ Adi mindo penampat ia man bangKu, pasti Kubegiken perban Aku perkuah.+
28 “Ula sumpahi kena Dibata+ ntah pe peminpin bangsa kena.+
29 “Ula kena ragu mereken persembahen arah hasil juma kena, minak, ras anggur kena si melala.+ Bereken man bangKu anak kena sintua.+
30 Enda me si arus lakoken kena man anak pertama si jantan arah lembu ras biri-biri kena:+ Kenca lahir, pitu wari dekahna pediat anakna e ras indungna. Bas wari pewaluhken, arus bereken kena man bangKu.+
31 “Arus kena jadi umat si badia man bangKu.+ Ula pan kena daging binatang si ibunuh binatang buas.+ Bereken saja dagingna e man biang.
