Keluaren 23:1-33
23 “Ula pebelang kena berita si la tuhu.+ Ula sampati kena kalak jahat erban kesaksin si erban kalak si deban cilaka.+
2 Ula ikuti jelma si enterem guna ngelakoken si jahat. Ula ban kena kesaksin si la tuhu gelah meriah ukur jelma si enterem ras erban keadilen lanai idalanken.
3 Ula kena berat sebelah sanga ngadili perkara kalak mesera.+
4 “Adi idahndu lembu ntah pe kelede musuhndu pulah, arus ulihkenndu man bana.+
5 Adi idahndu kelede kalak si rate segat man bandu ndabuh perban mbuesa babanna, ula pediatndu saja ntah pe tadingkenndu. Arus sampatindu ia mpenusur baban keledena e.+
6 “Berekenlah keadilen man kalak mesera sanga ngurus perkarana.+
7 “Ula terlibat bas tuduhen si la tuhu, ula bunuh kalak si la ersalah bage pe kalak si benar, sebap labo pagi Kukataken perbahanen kalak jahat e benar.+
8 “Ula aloken kena sogok, sebap sogok banci erban lanai diate kalak kai si benar janah erban kalak si benar ngubah kata-katana.+
9 “Ula siksa kena penduduk asing. Enggo teh kena uga nanamna jadi penduduk asing perban kena pe sange jadi penduduk asing i negri Mesir.+
10 “Enem tahun dekahna banci suani kena juma kena janah perani kena hasilna.+
11 Tapi bas tahun si pepituken ula urus ras ula suani kai pe i juma kena. Pediatlah kalak si mesera muat hasil juma e. Kai pe si tading, pediat ipan binatang liar. Bage ka me si arus ban kena man kebun anggur ras kebun saitun kena.
12 “Enem wari dekahna kena erdahin, tapi bas wari si pepituken, ula kena erdahin. Alu bage, lembu ras kelede kena banci istrahat. Anak arah budak kena si diberu ras penduduk asing si tading ras kena pe banci istrahat.+
13 “Arus tuhu-tuhu dalanken kena kerina si Kukataken man kena.+ Ula kena erlebuh man dibata-dibata si deban. Ula sempat terbelasken kena gelarna.+
14 “Tiap tahun, arus ban kena telu perayan man bangKu.+
15 Bas bulan Abip*+ arus ban kena Perayan Roti si La Itama Ragi,+ perban bas bulan e kena ndarat arah Mesir nari. Bas waktu si enggo itentuken e, pitu wari dekahna arus ipan kena roti si la itama ragi, bagi si enggo Kuperentahken man kena. Ise pe la banci reh ku lebe-lebeKu adi la maba kai pe.+
16 Arus ka ban kena Perayan Peranin* sanga perani kena hasil si pertama arah juma kena.+ Bas akhir tahun, arus ka ban kena Perayan Sapo-Sapo sanga pepulung kena hasil juma kena.+
17 Telu kali setahun, kerina dilaki arus ngadap man Tuhan si benar eme Jahwe.+
18 “Ula persembahken man bangKu dareh korban binatang radu ras kai pe si lit ragina. Selain si e lemak arah korban si ipersembahken guna perayan man bangKu la banci isimpan seh ngasa paginna.
19 “Arah hasil rani si pertama arah juma kena nari, babalah si mejilena ku rumah Jahwe Dibata kena.+
“Ula belgang kena anak kambing bas susu indungna.+
20 “Kusuruh pagi malekat i lebe-lebe kena+ guna njagai kena bas perdalanen janah mabai kena ku negri si enggo Kusikapken man kena.+
21 Perdiateken ras begiken katana. Sebap ia reh bas gelarKu. Ula lawan kena ia, perban labo pagi ampunina salah kena e.+
22 Tapi, adi tuhu-tuhu begiken kena ia janah lakoken kena bagi si Kukataken, musuh kena jadi musuhKu janah imbang kena jadi imbangKu.
23 Sebap arah lebe-lebe kena pagi malekatKu e janah babaina kena ku negri kalak Amori, kalak Het, kalak Peris, kalak Kanaan, kalak Hewi, ras kalak Jebusi. Kukernepken pagi kalak e kerina.+
24 Ula kena sujud man dibata-dibata kalak e, ula kena merhat nembah man bana. Ula ikuti kebiasan kalak e.+ Arus hancurken kena patung-patung ras tugu-tugu si badia kalak e.+
25 Arus sembah kena Jahwe Dibata kena.+ Kupasu-pasu pagi pangan* kena ras inemen kena.+ Kumasapken pagi penakit bas kena nari.+
26 Bas negri kena la pagi lit diberu si keguguren ntah pe mandul.+ Kuban pagi gedang umur kena.
27 “Lenga pe kena seh i jah, enggo mbiar pagi bangsa-bangsa man bangKu.+ Bangsa si apai pe pagi si erperang ras kena pasti Kuban kacau. Kuban pagi talu kerina musuh kena janah kiam ia nadingken kena.+
28 Ope lenga kena seh i jah, Kuban pagi musuh-musuh kena mbiar.+ Kupelawes pagi kalak Hewi, kalak Kanaan, ras kalak Het arah kena nari.+
29 Labo pagi Kupelawes kalak e bas sada tahun, gelah lit denga si ngurus negri e, binatang liar pe la reh buena gelah ula ibanna kena bahaya.+
30 La pagi mis Kupelawes kalak e kerina, seh ngasa reh teremna kena guna ngiani negri e.+
31 “Batas negri si nandangi Kubereken man kena eme arah Laut Merah nari seh ku Laut Tengah,* arah taneh mesawang* nari seh ku Lau Eprat.+ Kubereken pagi penduduk negri e man kena janah pasti pelawes kena pagi kalak e.+
32 Ula ban kena perjanjin ras kalak e bage pe ras dibata-dibatana.+
33 Ula bere kalak e tading bas negri kena, perban banci pagi babai kalak e kena erdosa man bangKu. Adi ikut kena nembah dibata-dibata kalak e, kena siding pagi kena.”+
Cataten i teruh
^ Itandai kalak ka Perayan Pentakosta.
^ As. “roti.”
^ Ntah “laut kalak Pilisti.”
^ Taneh si mbelang si jarang iingani.
