Keluaren 25:1-40
25 Kenca si e nina Jahwe man Musa,
2 “Kataken man kalak Israel gelah berekenna sumbangen man bangKu. Pepulunglah sumbangen arah tiap kalak si tersuruh ukurna mereken sumbangen.+
3 Enda me sumbangen si arus pepulungndu arah kalak e: emas,+ pirak,+ tembaga,+
4 benang biru, benang wol ungu, benang si megara, linen halus, mbulu kambing,
5 kulit biri-biri jantan si enggo iwarnai megara, kulit anjing laut, kayu akasia,*+
6 minak lampu,+ balsem* guna minak pelantiken+ ras guna kemenyan si merim,+
7 batu oniks* bage pe batu si debanna guna ileketken ku epod*+ ras ku penutup dada.+
8 Banlah ingan si badia man bangKu, janah tading pagi Aku i tengah-tengah kalak e.+
9 Banlah kemah ingan ersembah ras kerina perkakasna bagi rancangen si nandangi Kucidahken man bandu.+
10 “Arus ban kalak e Peti Perjanjin* arah kayu akasia nari. Gedangna kira-kira 111 sentimeter, belangna ras ganjangna kira-kira 67 sentimeter.*+
11 Kenca si e, lapisi bagin si arah bas ras si arah darat Peti e alu emas murni.+ Jenari ban ka bingkai arah emas nari bas bagin si arah datas i sekeliling Peti e.+
12 Ban ka empat gelang arah emas nari, janah leketken i datas empatna nahe Peti e. Dua gelang ban bas sembelahna janah dua gelang nari bas sembelahna ka.
13 Banlah tongkat-tongkat arah kayu akasia nari janah lapisi tongkat e alu emas.+
14 Masukken tongkat-tongkat e ku gelang-gelang si lit i Peti Perjanjin ndai gelah Peti Perjanjin e banci ibaba alu tongkat e.
15 Tongkat-tongkat e arus tetap leket ku gelang-gelang si lit i Peti Perjanjin e janah la banci ilepasken je nari.+
16 Arus tamakenndu ku bas Peti Perjanjin e dua lembar batu si i je tertulis perentahKu si nandangi Kubereken man bandu.+
17 “Banlah tutup Peti e arah emas murni nari. Gedangna kira-kira 111 sentimeter janah belangna kira-kira 67 sentimeter.+
18 Tempahlah dua patung kerubim arah emas nari bas duana pinggir penutup Peti e.+
19 Banlah sada kerubim bas ujung penutup Peti e janah sada kerubim bas ujungna si sada nari.
20 Kerubim-kerubim e arus hadap-hadapen i datas tutup Peti e, janah pengala ayona ku teruh, ku tutup Peti e. Arus kimbang kabeng kerubim e duana, janah bayangen kabengna e arus nutupi tutup Peti e.+
21 Pasanglah tutup+ Peti Perjanjin e, janah masukken pagi Kotak Khusus* si Kubereken man bandu ku bas Peti Perjanjin e.
22 Ku je pagi Aku reh janah ngerana man bandu arah datas tutup Peti e nari.+ Arah tengah-tengah kerubim si lit i datas Peti Perjanjin e, Kukataken pagi man bandu kerina perentahKu si arus pesehndu man kalak Israel.
23 “Arus ka banndu sada meja+ arah kayu akasia nari, gedangna kira-kira 89 sentimeter, belangna 44,5 sentimeter, ras ganjangna kira-kira 67 sentimeter.*+
24 Arus lapisindu meja e alu emas murni janah ban bingkai i sekelilingna arah emas nari.
25 Arus banndu pinggiren asa tapak-tapak tan* i sekeliling meja e janah hiasi e alu bingkai emas.
26 Arus banndu empat gelang arah emas nari janah pasang gelang-gelang e ku empat sudut meja, eme ingan nahe meja e.
27 Gelang-gelang e arus itama i deher pinggiren meja e. Tongkat-tongkat guna ngangkat meja e imasukken pagi ku gelang-gelang e.
28 Banlah tongkat-tongkat arah kayu akasia nari janah lapisi alu emas. Babalah meja e alu tongkat-tongkat e.
29 “Arus banndu piga-piga piring, cangkir, guci, ras mangkok guna nuangken persembahen inemen. Kerina e arus iban arah emas murni nari.+
30 Arus ka tetap lit roti persembahen i datas meja e i lebe-lebeKu.+
31 “Tempahlah ingan lampu*+ arah emas murni nari. Banlah tapakna, batangna, cabang-cabangna, kelopak bungana, bunga si lenga mekar, ras bunga si enggo mekar, janah kerina e iban arah sada potong emas nari.+
32 Banlah enem cabang bas ingan lampu e, sembelah telu cabang, sembelah nari ka telu cabang.
33 Bas tiap cabang arus lit telu kelopak si bentukna bagi bunga almond. Banlah selang-seling ras bunga si lenga mekar bage pe si enggo mekar. Bagelah banndu bas enemna cabang si lit bas ingan lampu e.
34 Bas batang ingan lampu e banlah empat kelopak si bentukna bagi bunga almond. Banlah selang-seling ras bunga si lenga mekar bage pe si enggo mekar.
35 Arus lit sada bunga si lenga mekar bas teruh pasangen cabang si pertama, ras sada bunga si lenga mekar bas teruh pasangen cabang si peduaken, bage ka pe sada bunga si lenga mekar i teruh pasangen cabang si peteluken. Bage me enemna cabang si lit bas batang lampu e.
36 Bunga si lenga mekar e, cabang-cabangna, bage pe ingan lampu e arus itempah arah sada batang emas murni nari.+
37 Banlah pitu lampu bas ingan lampu e. Adi ipegara lampu e, terangina pagi ingan si lit i lebe-lebena.+
38 Penjepit-penjepit sumbuna ras ingan-ingan sumbuna arus iban arah emas murni nari.+
39 Ingan lampu e ras kerina peralatenna arus iban arah 34,2 kilo* emas murni nari.
40 Banlah kerina e bagi rancangen si enggo Kutuduhken man bandu i datas gunung enda.+
Cataten i teruh
^ Jenis batang kayu enda turah bas gurun pasir ntah pe taneh mesawang.
^ Minak si merim si iban arah sinuan-sinuan ntah pe batang kayu tertentu. E ipake guna jadi tambar ntah pe parfum.
^ Ntah “batu si merga.”
^ Ntah “Peti Perpadanen.”
^ I je itamaken dua lembar batu si tertulis Sepuluh Perentah.
^ Ntah “nahe ingan lampu.”
