Keluaren 28:1-43
28 “Lebuhlah seninandu Harun+ ras kerina anakna si dilaki+ eme Nadap, Abihu,+ Eleasar, ras Itamar.+ Pisahken kalak e arah kalak Israel nari gelah kalak e jadi imam guna ngelayani Aku.+
2 Banlah baju imam* man seninandu Harun gelah teridah ia mulia ras metunggung.+
3 Lebuhlah kerina kalak si beluh* si enggo Kubereken kepentaren+ gelah ban kalak e paken man Harun, gelah Harun ipebadia guna ngelayani jadi imam man bangKu.
4 “Arus ban kalak e penutup dada,+ epod,*+ rompi si gedang,+ jubah si corakna kotak-kotak, penutup takal,+ ras ikat pinggang.+ Baju-baju imam* enda arus iban man seninandu Harun bage pe man anak-anakna, gelah Harun ras anak-anakna banci ngelayani Aku jadi imam.
5 Kerinana e arus ban kalak e arah benang emas nari, arah benang biru, arah benang wol ungu, arah benang megara, ras arah linen halus nari.
6 “Banlah epod* arah benang emas nari, benang biru, benang wol ungu, benang megara, ras linen halus si ipintal. Epod e arus isulam.+
7 Arus lit dua tutup bara epod* e guna mpersada duana ujung epod e si arah datas.
8 Tenunlah ikat pinggang+ man epod* e arah bahan si seri eme linen halus si ipintal, benang emas, benang biru, benang wol ungu, ras benang megara. Ikat pinggang e pagi si ipakeken ku epod e guna ngiketsa alu nteguh.
9 “Buatlah dua batu oniks,*+ ukir bas batu e gelar anak-anak Israel si dilaki.+
10 Enem gelar ban bas sada batu, enem gelar nari ban bas batu si sada nari. Cocokken ras uruten kelahirenna.
11 Arus ukir tukang batu gelar anak-anak Israel i datas dua batu e bagi ukiren si lit bas cincin.+ Kenca si e, ban pengiket batu e arah emas nari.
12 Pasangken batu-batu e bas tutup bara epod* e guna jadi tanda peringeten man kalak Israel.+ Baba Harun gelar kalak e bas barana sanga ia reh ku lebe-lebe Jahwe.
13 Ban ka dua pengiketna arah emas
14 ras dua nali arah emas murni. Nali e arus iban bagi nali si ipiuh.*+ Sambungken nali e ras pengiket si iban arah emas ndai.+
15 “Suruhlah tukang sulam erban sada penutup dada penghakimen.+ Cara erbanca arus bali bagi cara erban epod* eme alu benang emas, benang biru, benang wol ungu, benang megara, ras linen halus si ipintal.+
16 Penutup dada e bentukna arus segi empat sanga ilipat dua. Gedangna ras belangna arus sada jengkal.*
17 Pasang batu-batu permata si enggo iban pengiketna ku penutup dada e. Susun e jadi empat baris. Baris pertama batu mirah, topas, ras zamrud.
18 Bas baris si peduaken eme batu pirus, sapir, ras jaspis.
19 Bas baris si peteluken eme batu lesyem,* akik, ras amatis.*
20 Bas baris si peempatken eme batu krisolit, oniks, ras giok. Tiap batu e arus ipasang ras pengiketna si iban arah emas nari.
21 Ukirlah gelar 12 anak Israel bas batu-batu e, bagi erban ukiren bas cincin. Ukir sada gelar i datas sada batu. Tiap gelar jadi wakil sada suku arah 12 suku Israel.
22 “Banlah dua nali arah emas murni nari si bentukna bagi nali si ipiuh* guna jadi nali penutup dada ndai.+
23 Ban ka dua cincin arah emas nari janah tama e bas duana sudut si arah datas penutup dada e.
24 Masukken nali emas e ku dua cincin si itama bas duana sudut si arah datas penutup dada e.
25 Masukken duana ujung nali emas e ku bas ingan pengiket si iban arah emas ndai si enggo ipasang bas tutup bara epod,* alu bage penutup dada e lit i bagin arah lebe epod.
26 Banlah dua cincin emas, pasangken ku duana sudut si arah teruh penutup dada e, eme bas sudutna si arah bas si pengalana ku epod.*+
27 Ban dua nari cincin emas, pasang e bas bagin arah lebe epod,* eme i teruh duana penutup barana, si lit i datas ikat pinggang epod i deher bagin persambungenna.+
28 Masukken nali biru arah cincin si lit i penutup dada ku cincin si lit i epod,* gelah penutup dada e la ergeser arah epod si lit i datas ikat pinggang.
29 “Sanga masuk Harun ku Ingan si Badia, arus pakena penutup dada penghakimen si i je tertulis gelar anak-anak Israel. Arus pasang Harun e pas bas jantungna. Penutup dada e lalap pagi jadi penginget i lebe-lebe Jahwe.
30 Tamalah Urim ras Tumim*+ bas penutup dada e. Duana arus itama tepat bas jantung Harun sanga ia reh ku lebe-lebe Jahwe. Sanga Harun ngadap man Jahwe, arus lalap babana Urim ras Tumim, si ipake guna ngakimi kalak Israel.
31 “Banlah rompi si gedang si ipake i teruh epod,* rompi e iban arah benang biru nari.+
32 I bagin tengah rompi e arus lit lubang kerahungna, bas sekeliling bagin pinggir lubang kerahungna arus itenun tukang tenun. Lubang e arus iban bagi lubang kerahung baju perang gelah ula nukah merigat.
33 Bas pinggirna si arah teruh, banlah hiasen buah delima arah benang biru nari, benang wol ungu, ras benang megara. I antara hiasen e tama lonceng emas.
34 Pasanglah sada lonceng si iban arah emas nari ras sada hiasen delima, selang-seling ban bas sekeliling bagin rompi e si arah teruh.
35 Arus pake Harun rompi e sanga ia ngelayani. Sora lonceng e arus terbegi sanga ia masuk ku ingan si badia ku lebe-lebe Jahwe ntah pe sanga ia ndarat je nari, gelah ula ia mate.+
36 “Banlah lempengen si erndilap arah emas murni nari. Bas lempengen e, ukirlah kata-kata enda bagi ngukir cincin: ‘Jahwe badia kap.’+
37 Iketken lempengen e bas bagin arah lebe penutup takal+ alu nali biru. Lempengen e arus tetap leket i je.
38 Lempengen e arus terus pake Harun bas perdempakenna. Harun si ertanggung jawap adi lit kalak si ersalah nandangi barang-barang si badia,+ si enggo pisahken kalak Israel jadi pemere si badia. Lempengen e arus tetap lit bas perdempaken Harun, gelah nggit Jahwe ngaloken kalak Israel.
39 “Tenunlah jubah si corakna kotak-kotak, penutup takal, ras ikat pinggang. Si e kerina arus iban arah linen halus nari.+
40 “Arus ka banndu jubah, ikat pinggang, ras penutup takal man anak-anak Harun+ gelah kalak e teridah mulia ras metunggung.+
41 Pakekenlah kerina e man seninandu Harun bage pe man anak-anakna. Tuangkenlah minak ku kalak e janah lantik+ ras pebadiaken kalak e+ guna ngelayani Aku selaku imam.
42 Ban ka celana pendek arah linen guna nutupi awak kalak e seh ku pahana, gelah ula teridah bagin si la perlu teridah.+
43 Kerina enda arus pake Harun ras anak-anakna sanga kalak e masuk ku kemah perjumpan ntah pe sanga kalak e ndeheri ingan nutung* persembahen guna ngelayani bas ingan si badia. Alu bage kalak e la erdosa janah la mate. Enda ndai me peraturen si arus terus ikutken Harun ras kerina keturunenna.
Cataten i teruh
^ As. “baju si badia.”
^ As. “beluh rukur.”
^ As. “Baju-baju si badia.”
^ Ntah “batu si merga.”
^ Ntah “ipuyu.”
^ Mungkin maksudna batu ambar, hyacinth, opal, turmalin.
^ Ntah “kecubung.”
^ Ntah “ipuyu.”
