Keluaren 29:1-46
29 “Enda me si arus lakokenndu guna mpebadiaken kalak e jadi imam si ngelayani Aku: Buat sada lembu jantan si nguda ras dua biri-biri jantan si sehat,+
2 roti si kibul si la itama ragi, roti si bentukna bagi gelang si icampur minak, bage pe roti si menipes si iolesi alu minak.+ Banlah roti e kerina arah tepung gandum si mejile nari.
3 Tamakenlah e kerina bas sada keranjang.+ Jenari baba keranjang e radu ras lembu bage pe duana biri-biri ndai.
4 “Lebuh Harun ras anak-anakna ku pintu masuk kemah perjumpan,+ suruh kalak e mbersihken dirina alu lau.+
5 Kenca si e, pakeken baju imam*+ man Harun, jubah, rompi si gedang, epod,* ras penutup dada. Enteguh pasangken ikat pinggang epod e bas awakna.+
6 Tamaken penutup takal bas takalna janah iketken lempengen emas si badia* bas penutup takal e.+
7 Buatlah minak guna pelantiken+ jenari tuangken ku takalna guna ngelantik ia.+
8 “Kenca si e, lebuhlah anak-anak Harun si dilaki, pakekenlah jubah man kalak e.+
9 Iketken ikat pinggang jubah e man kalak e bagi si enggo ibanndu man Harun janah tamaken penutup takal kalak e. Kalak e me pagi si jadi imam janah e me peraturen si arus terus ilakoken.+ Bage me carana kam ngelantik Harun ras anak-anakna jadi imam.+
10 “Babalah lembu jantan e ku lebe-lebe kemah perjumpan. Jenari arus tama Harun ras anak-anakna tanna ku takal lembu e.+
11 Gelehlah lembu jantan e i lebe-lebe Jahwe i pintu masuk kemah perjumpan.+
12 Buat sitik dareh lembu jantan si igeleh e alu jari-jarindu, jenari tamaken ku tanduk-tanduk si lit bas ingan nutung* persembahen.+ Sisana amburken ku teruh ingan nutung persembahen.+
13 Kenca si e, buatlah kerina lemak+ si nutupi ususna, lemak si lit bas atena, bage pe duana ginjalna ras lemakna. Tutung kerina e bas ingan nutung persembahen gelah nangkih asapna.+
14 Tapi dagingna, kulitna, ras kotorenna arus itutung i darat kemah. Lembu jantan e me si jadi persembahen dosa.
15 “Kenca si e buatlah sada biri-biri jantan jenari arus tamaken Harun ras anak-anakna tanna ku datas takal biri-biri e.+
16 Gelehlah biri-biri e, buat darehna jenari percikken ku sekeliling ingan nutung persembahen.+
17 Gelehlah biri-biri e menurut baginna, cuci usus+ ras nahena jenari erjejer ban menurut bagin dagingna seh ku takalna, i datas ingan nutung persembahen.
18 Tutunglah kerina biri-biri e i datas ingan nutung persembahen gelah nangkih asapna. E me si jadi persembahen tutungen man Jahwe, si merim akapNa.+ E me persembahen si itutung alu api man Jahwe.
19 “Kenca si e buatlah sada nari biri-biri. Jenari arus tama Harun ras anak-anakna tanna ku datas takal biri-biri e.+
20 Gelehlah biri-biri e jenari buat sitik darehna janah tama ku cuping Harun ras ku cuping anak-anakna si arah kanan, bage pe ku jempol tan ras jempol nahe kalak e si arah kanan. Jenari percikken dareh e ku sekeliling ingan nutung persembahen.
21 Kenca si e buat sitik dareh arah ingan nutung persembahen ras sitik minak pelantiken,+ jenari percikken ku Harun ras ku anak-anakna, bage pe ku baju kalak e. Alu bage Harun ras anak-anakna bage pe baju kalak e jadi badia.+
22 “Kenca si e buatlah lemak biri-biri jantan e, lemak ikurna, lemak si nutupi ususna, lemak atena, duana ginjal ras lemakna,+ bage pe nahena si arah kanan. Sebap biri-biri e guna biri-biri pelantiken.+
23 Buatlah roti-roti si la itama ragi si lit bas keranjang i lebe-lebe Jahwe, eme sada roti si bentukna kibul, sada roti si bentukna bagi gelang si icampur minak, ras sada roti si menipes.
24 Arus tamandu kerina e bas tan Harun ras tan anak-anakna, jenari ayunken i lebe-lebe Jahwe guna jadi persembahen si iayunken.
25 Kenca si e buat persembahen e arah tan kalak e jenari tutung i datas persembahen tutungen bas ingan nutung persembahen, sebap bauna merim akap Jahwe. E me persembahen si itutung alu api man Jahwe.
26 “Kenca si e buatlah dada biri-biri pelantiken+ si ipersembahken guna Harun. Ayunkenlah e i lebe-lebe Jahwe jadi persembahen si iayunken janah e me si jadi baginndu.
27 Arah biri-biri pelantiken+ si ipersembahken guna Harun ras anak-anakna, pebadialah dada arah persembahen si iayunken e ras nahe arah bagin si badia si enggo iayunken.
28 Dada ras nahe biri-biri ndai jadi bagin Harun ras keturunenna perban e bagin si badia. Si e bagin si badia si arus tetap ibereken kalak Israel.+ E jadi bagin si badia man Jahwe arah korban persadan kalak e.+ Enda jadi peraturen si tetap man kalak Israel.
29 “Baju imam*+ jang Harun arus ka ipake keturunenna+ adi kalak e enggo ilantik ras iangkat jadi imam.
30 Keturunen Harun si nggantiken Harun jadi imam bage pe si masuk ku kemah perjumpan guna ngelayani bas ingan si badia, arus make baju e pitu wari dekahna.+
31 “Buatlah daging biri-biri si ikorbanken sanga acara pelantiken imam, belganglah daging e bas ingan si badia.+
32 Arus pan Harun ras anak-anakna+ daging biri-biri e bage pe roti si lit bas keranjang i pintu masuk kemah perjumpan.
33 Arus pan kalak e persembahen si enggo ipersembahken jadi pendamen guna ngelantik ras mpebadiaken kalak e jadi imam. Tapi kalak si la ibere ijin* la banci ikut manca perban e badia.+
34 Adi lit si sisa arah daging korban pelantiken e bage pe roti ndai seh ngasa erpagi-pagi, si e la banci ipan tapi arus itutung,+ perban e badia.
35 “Enda me si arus lakokenndu man Harun ras anak-anakna bagi si enggo Kuperentahken man bandu. Banlah acara pelantiken kalak e pitu wari dekahna.+
36 Tiap wari, arus persembahkenndu lembu jantan jadi persembahen dosa guna pendamen bage pe mpebadia ingan nutung persembahen. Arus percikkenndu minak guna mpebadia ingan nutung persembahen.+
37 Pitu wari dekahna arus ban kena persembahen guna mpebadia ingan nutung persembahen. Alu bage ingan nutung persembahen e jadi seh kel badiana.+ Ise pe si ertugas bas ingan nutung persembahen arus badia.
38 “Enda me si arus terus lakokenndu: Tiap wari persembahkenlah dua biri-biri jantan si umurna sada tahun bas ingan nutung persembahen.+
39 Persembahken sada biri-biri sanga erpagi-pagi, sada nari sanga karaben.*+
40 Sanga mpersembahken biri-biri si pertama, persembahken ka sada kilo* tepung halus si icampur ras hampir sada liter* minak saitun murni, jenari persembahken ka hampir sada liter anggur jadi persembahen inemen.
41 Sanga karaben,* persembahkenlah biri-biri si peduaken radu ras tepung halus bage pe persembahen inemen bagi persembahen si ibanndu sanga erpagi-pagi. Bau persembahen si itutung alu api e merim akap Jahwe.
42 Bage me persembahen tutungen si arus terus persembahken keturunenndu alu ratur bas pintu kemah perjumpan i lebe-lebe Jahwe, eme bas ingan Aku ngerana ras kam.+
43 “Bas ingan e pagi Aku njumpai kalak Israel janah kemulianKu pagi si erban ingan e badia.+
44 Kupebadia pagi kemah perjumpan ras ingan nutung persembahen, Kupebadia pagi Harun ras anak-anakna.+ Alu bage banci kalak e ngelayani jadi imam man bangKu.
45 Tading pagi Aku i tengah-tengah kalak Israel janah Aku si jadi Dibatana.+
46 Teh kalak e pagi maka Aku kap Jahwe Dibatana, si maba kalak e ndarat arah Mesir nari. Alu bage banci Aku tading i tengah-tengah kalak e.+ Aku kap Jahwe Dibata kalak e.
Cataten i teruh
^ As. “baju si badia.”
^ Ntah “tanda si badia maka enggo bereken Harun geluhna man Dibata.”
^ As. “baju si badia.”
^ As. “kalak asing,” eme dilaki si labo arah keturunen Harun.
^ Maksudna, kenca terbenam matawari.
^ As. “ras 1/4 hin.”
^ Maksudna, kenca terbenam matawari.