Keluaren 3:1-22
3 Permakani Musa asuh-asuhen mamana eme Imam Jetero+ kalak Midian e, sebap Musa enggo jadi sekalak permakan. Bas sada wari, babana asuh-asuhenna ku arah barat taneh mesawang,* dungna seh ia i Gunung Horep*+ eme gunung Dibata si benar.
2 Cidahken malekat Jahwe dirina man Musa bas peren si erduri.+ Malekat e teridah bagi gara api bas peren si erduri e. Lalap tatap Musa peren si gara e, tapi peren e la meseng.
3 Emaka mamang ate Musa, janah nina, “Engkai maka la meseng peren e? Kunenlah terdeheren ku je.”
4 Sanga idah Jahwe maka Musa enggo reh deherna, erlebuh Ia arah tengah-tengah peren e nari, nina, “Musa! Musa!” Nina Musa ngaloi, “Enda aku.”
5 Nina Dibata, “Ula nai kam terdeheren. Lepasken selopndu, sebap kam sangana tedis bas taneh si badia.”
6 Nina Dibata ka, “Aku kap Dibata bapakndu, Dibata Abraham,+ Dibata Isak,+ ras Dibata Jakup.”+ Jenari tutupi Musa ayona, perban mbiar ia ngidah Dibata si benar.
7 Nina Jahwe ka, “Enggo Kuidah uga suina akap umatKu i Mesir, janah enggo Kubegi sora kalak e nderkuh perban isuruh kerja paksa. Enggo jelas Kuteh uga suina akap kalak e.+
8 Emaka nusur pagi Aku nelamatken kalak e arah kalak Mesir nari.+ Kubaba pagi kalak e ndarat arah negri e janah Kubaba ku negri si tanehna subur ras mbelang, si melala kel susu ras madu,+ eme ku daerah kalak Kanaan, kalak Het, kalak Amori, kalak Peris, kalak Hewi, ras daerah kalak Jebusi.+
9 Enggo Kubegi sora nderkuh kalak Israel janah enggo Kuidah uga kejamna perbahanen kalak Mesir man kalak e.+
10 Gundari Kusuruh kam ndahi raja Mesir, janah kam pagi si maba umatKu Israel ndarat arah Mesir nari.”+
11 Tapi nina Musa man Dibata si benar, “Ise kin aku enda? Labo mungkin aku ndahi raja Mesir janah maba kalak Israel ndarat arah Mesir nari.”
12 Nina Dibata, “Aku pagi si nemani kam.+ Erjanji Aku maka pasti Kubaba umatKu ndarat arah Mesir nari, janah i gunung enda pagi isembah kena Aku, Dibata si benar.+ Alu bage tek kam maka Aku si ngutus kam.”
13 Tapi nina Musa man Dibata si benar, “Bicara kujumpai pagi kalak Israel janah ningku, ‘Dibata nini bulang kena enggo nuruh aku njumpai kena.’ Adi sungkun kalak e aku, ‘Ise gelarNa?’+ Uga pagi ningku?”
14 Emaka nina Dibata man Musa, “Aku Banci Jadi Kai Pe AteKu.”*+ Nina Dibata ka, “Bagendalah nindu man kalak Israel, ‘Dibata si erti gelarNa “Aku Banci Jadi Kai Pe AteKu” enggo nuruh aku ndahi kena.’”+
15 Kenca si e, sekali nari nina Dibata ka man Musa,
“Bagendalah nindu man kalak Israel, ‘Jahwe Dibata nini bulang kena eme Dibata Abraham,+ Dibata Isak,+ ras Dibata Jakup+ kap si nuruh aku.’ Enda me gelarKu seh rasa lalap,+ janah bage me Aku arus iinget arah jaman ku jaman.
16 Gundari laweslah kam, pepulung peminpin-peminpin Israel jenari kataken man kalak e, ‘Enggo jumpai Jahwe aku eme Dibata nini bulang kena Abraham, Isak, ras Jakup, nina, “Enggo Kuperdiateken kena+ janah Kuteh kai si enggo ilakoken man kena i Mesir.
17 Emaka erjanji Aku mbebasken kena arah penindasen+ kalak Mesir nari, jenari Kubaba kena ku negri kalak Kanaan, kalak Het, kalak Amori,+ kalak Peris, kalak Hewi, ras kalak Jebusi,+ eme negri si melala kel i je susu ras madu.”’+
18 “Pasti begiken peminpin-peminpin e pagi kam.+ Kenca si e laweslah kam ras kalak e ndahi raja Mesir. Kataken kenalah man bana, ‘Jahwe Dibata kalak Heber+ enggo ngerana man kami. Emaka, ijinkenlah kami lawes ku taneh mesawang* gelah banci persembahken kami korban man Jahwe Dibata kami.+ Telu wari pagi dekahna maka seh kami i jah.’
19 Tapi, enggo Kuteh maka labo pagi ibere raja Mesir kena lawes, adi la kin lit si maksa ia.+
20 Emaka Kuhukum pagi Mesir alu kuasaKu. Kuban pagi perbahanen si luar biasa i Mesir. Kenca si e pagi maka suruhna kena lawes.+
21 Janah Kuban pagi jadi ate kalak Mesir man kena. Sanga kena lawes, pasti lit pagi si ibaba kena.+
22 Tiap diberu arah kalak Israel arus mindo barang-barang si iban arah emas ras pirak bage pe baju-baju man tetanggana si kalak Mesir bage pe man kalak asing si tading bas rumahna, janah pakekenlah e man anak-anak kena. Ijarah kena pagi erta kalak Mesir.”+
Cataten i teruh
^ Ntah “Gunung Sinai.”
^ Taneh si mbelang si jarang iingani.
^ Taneh si mbelang si jarang iingani.
