Keluaren 30:1-38
30 “Banlah sada ingan nutung* persembahen+ arah kayu akasia*+ nari guna nutung kemenyan.
2 Bentuk ingan nutung persembahen e arus segi empat. Gedangna ras belangna 44,5 sentimeter ras ganjangna 89 sentimeter.* Tanduk-tandukna arus ersada ras ingan nutung persembahen e.+
3 Lapisilah alu emas murni kerina baginna si arah datas, empatna dingdingna, bage pe empatna tandukna. Jenari ban bingkai emas i sekelilingna.
4 I teruh bingkai e banlah gelang emas ingan tongkat guna mabasa. Banlah dua gelang emas bas sada dingdingna ras dua gelang bas dingdingna si sada nari.
5 Banlah tongkat-tongkatna arah kayu akasia nari jenari lapisi alu emas.
6 Tamakenlah ingan nutung persembahen e i lebe-lebe tirai Ingan Sibadiana i deher Kotak Khusus.*+ Kucidahken pagi diriKu man bandu arah datas tutup Kotak e.+
7 “Tiap erpagi-pagi, sanga Harun+ nikapken lampu,+ arus tutungna kemenyan si merim+ i datas ingan nutung persembahen e.+ Alu bage nangkih asap arah ingan e.
8 Paksa karaben,* arus tutung Harun kemenyan sanga pegarana lampu. Harun ras keturunenna arus ratur erban si bage i lebe-lebe Jahwe.
9 Ula persembahken kemenyan si la sah,*+ persembahen tutungen, persembahen pangan,* ras ula amburken persembahen inemen bas ingan e.
10 Sekali setahun arus pebadia Harun ingan e.+ Arus oleskenna sitik dareh binatang arah persembahen pendamen ku tanduk-tanduk ingan nutung persembahen e.+ Kerina keturunen Harun pe arus bage lakokenna. Badia kel ingan e bas Jahwe.”
11 Kenca si e nina Jahwe man Musa,
12 “Sanga banndu sensus janah kirandu jumlah anak-anak Israel si dilaki,+ tiap kalak arus mereken tebusen guna kesahna man Jahwe. Alu bage la kalak e kena cilaka sanga kalak e ndaftar.
13 Enda me si arus ibereken kalak si ndaftar e: setengah sekel* pirak menurut timbangen si ipake bas ingan si badia.+ Sada sekel seri ras 20 gera.* Setengah sekel eme sumbangen man Jahwe.+
14 Si arus mereken sumbangen man Jahwe eme kerina dilaki si umurna 20 tahun ku datas.+
15 Kalak si bayak la banci lebih sumbangkenna janah kalak si mesera la banci kurang sumbangkenna. Kerina arus mereken setengah sekel man Jahwe guna nebus kesah kalak e.
16 Pepulunglah sen pirak guna pendamen si bereken kalak Israel, pakelah sen e guna mbiayai kerina dahin bas kemah perjumpan. Sen pirak e me si jadi tebusen man kesah kalak e janah jadi peringeten i lebe-lebe Jahwe.”
17 Nina Jahwe ka man Musa,
18 “Banlah baskom arah tembaga nari janah ban nahena.+ Kenca si e tamaken i antara kemah perjumpan ras ingan nutung persembahen, janah isi lau ku baskom e.+
19 I je pagi Harun ras anak-anakna mbersihken tanna ras nahena.+
20 Arus bersihken kalak e lebe dirina alu lau gelah kalak e la mate sanga masuk ku kemah perjumpan, ntah pe sanga ngelayani bas ingan nutung persembahen, bage pe sanga erban persembahen tutungen man Jahwe.
21 Arus bersihken kalak e tan ras nahena gelah ula kalak e mate. Enda me peraturen si arus terus ikutken Harun, anak-anakna, bage pe keturunenna.”+
22 Nina Jahwe ka man Musa,
23 “Kenca si e buatlah rempah-rempah si mejilena, eme enem kilo getah mur, telu kilo batang kayu manis, telu kilo jerangau,*
24 ras enem kilo* lawang, bage pe kira-kira empat liter* minak saitun menurut timbangen si ipake bas ingan si badia.+
25 Alu bahan-bahan e banlah minak pelantiken si badia si iracik alu mehuli.+ Enda me si arus jadi minak pelantiken si badia.
26 “Percikkenlah minak pelantiken e ku kemah ingan perjumpan+ ras Peti Perjanjin,*
27 ku meja ras kerina perlengkapenna, ku ingan lampu ras kerina perlengkapenna, ku ingan nutung persembahen kemenyan,
28 ku ingan nutung persembahen tutungen ras kerina perlengkapenna, bage pe ku baskom ras nahena.
29 Pebadialah kerina e gelah kerinana jadi seh kel badiana.+ Ise pe si njemak barang-barang e arus badia.+
30 Lantiklah Harun+ ras anak-anakna+ alu minak pelantiken, pebadia kalak e jadi imam si ngelayani Aku.+
31 “Bagendalah nindu man kalak Israel, ‘Minak pelantiken e lalap badia man bangKu seh ku kerina keturunenndu.+
32 Minak e la banci ipake ku daging manusia, ise pe la banci erban kai pe alu ramuan si seri. Minak e badia. Arus lalap badia akap kena.
33 Ise pe si erban minak bagi minak pelantiken e ntah pe si makeken minak e man kalak si la ibere ijin* arus ibunuh.’”+
34 Kenca si e nina Jahwe man Musa, “Buatlah rempah-rempah si merim eme:+ getah rasamala, kulit kerang, getah galbanum, ras kemenyan mbentar si murni. Kerinana arus seri buena.
35 Campurken ramuan rempah e ndai alu mehuli, tama sira+ ku bas, gelah ramuan kemenyan e+ jadi badia ras murni.
36 Deba arah ramuan e arus gilingndu seh asa halus janah sebagin arah ramuan si enggo halus e arus tamandu i lebe-lebe Peti Perjanjin si lit bas kemah perjumpan, ingan Aku reh njumpai kam. Ramuan kemenyan e arus badia kel akap kena.
37 Ula ban kena ramuan kemenyan si seri guna kepentingen kena.+ Kemenyan e badia akap Jahwe, emaka kena pe arus bage akap kena.
38 Ise pe si erban ramuan kemenyan si bagenda guna kepentingen dirina arus ibunuh.”
Cataten i teruh
^ Jenis batang kayu enda turah bas gurun pasir ntah pe taneh mesawang.
^ I je itamaken dua lembar batu si tertulis Sepuluh Perentah.
^ Maksudna, kenca terbenam matawari.
^ Ntah “la cocok ras undang-undang.”
^ 1 gera = 0,57 gram.
^ As. “1 hin.”
^ Ntah “Peti Perpadanen.”
^ As. “kalak asing,” eme dilaki si labo arah keturunen Harun.
