Keluaren 32:1-35
32 Sanga idah kalak Israel maka ndekah kel Musa nusur arah gunung nari,+ pulung kalak e i sekeliling Harun janah nina, “La siteh kai si terjadi man Musa, kalak si minpin kita ndarat arah Mesir nari, emaka banlah sada dibata guna minpin kami.”+
2 Nina Harun ngaloi kalak e, “Tangtangilah anting-anting emas+ si pake diberu kena, si pake anak-anak kena si dilaki ras si diberu janah bereken man bangku.”
3 Emaka kerina kalak e nangtangi anting-anting emas si lit bas cupingna jenari berekenna man Harun.
4 Kenca si e buat Harun emas ndai janah ukirna jadi sada patung anak lembu emas.+ Kenca si e nina kalak e, “O kalak Israel, enda me Dibata si minpin kena ndarat arah negri Mesir nari.”+
5 Sanga idah Harun si e, banna ingan nutung* persembahen i lebe-lebe patung e. Jenari umumken Harun bagenda, “Pagi lit perayan man Jahwe.”
6 Emaka paginna, lampas kalak e medak janah mulai ban kalak e persembahen tutungen ras korban persadan. Kenca si e, man ras minem kalak e janah ersenang-senang.+
7 Emaka nina Jahwe man Musa, “Nusurlah kam perban bangsa si pinpinndu ndarat arah Mesir nari enggo erban dosa si mbelin.+
8 Meter kel tadingken kalak e kai si enggo Kuperentahken.+ Ban kalak e patung anak lembu emas janah sujud kalak e man patung e jenari banna ka korban man bana, kenca si e nina, ‘O Israel, enda me Dibatata si minpin kita ndarat arah negri Mesir nari.’”
9 Nina Jahwe ka man Musa, “Enggo Kuteh maka kalak enda bangsa si mekeng.+
10 Emaka gundari ula halangindu Aku. Merawa kel Aku man bangsa e, Kukernepken ateKu. Padin keturunenndu si Kujadiken bangsa si mbelin.”+
11 Kenca si e mindo Musa man Jahwe Dibatana,+ nina, “O Jahwe, Kam kap si maba kalak e arah negri Mesir nari alu kuasaNdu si luar biasa ras alu tanNdu si megegeh, engkai maka merawa kel Kam man bangsaNdu e?+
12 Adi bage banNdu, pasti kataken bangsa Mesir maka babaNdu kalak e ndarat arah Mesir nari alu tujun si jahat eme guna munuh kalak e i gunung janah engkernepken kalak e arah doni enda nari.+ Ula nai min Kam merawa, ula nai min bage ukurNdu janah ula min banNdu terjadi cilaka e man bangsaNdu.
13 Ingetlah sumpahNdu man budakNdu Abraham, Isak, ras Israel, sanga nindu man kalak e, ‘Enterem pagi Kuban keturunenndu bali buena bagi bintang i langit,+ Kubereken pagi kerina taneh enda man keturunenndu. Alu bage taneh enda banci jadi jang kalak e seh rasa lalap.’”+
14 Emaka berubah ukur Jahwe janah la surung banNa cilaka e man umatNa.+
15 Kenca si e, nusur Musa arah gunung e nari, babana dua lembar batu+ e bas tanna.+ Bas dua bagin batu e tertulis perentah Dibata.
16 Dibata si erban dua lembar batu e, tulisen si lit i je pe Dibata si ngukirsa.+
17 Sanga begi Josua sora kalak e si sangana serko-serko, nina man Musa, “Lit kubegi bagi sora kalak erperang i perkemahen.”
18 Tapi nina Musa,
“Sora e labo bagi lagu kemenangen,Sora e labo ka bagi lagu tangis perban talu erperang,Lagu si deban nge si kubegi.”
19 Sanga Musa enggo ndeher ku perkemahen, idahna patung anak lembu emas e+ bage pe kalak si sangana landek-landek. Emaka merawa kel ia, benterkenna dua lembar batu ndai i teruh gunung e jenari pecah batu-batu e.+
20 Buatna ka patung anak lembu emas e jenari tutungna janah gilingna seh asa jadi abu.+ Kenca si e amburkenna abuna e ku lau janah suruhna inem kalak Israel.+
21 Jenari nina Musa man Harun, “Kai kin si iban kalak e man bandu maka nggit kam erban dosa si bage belinna?”
22 Nina Harun ngaloisa, “Ula kam merawa, Tuanku. Tehndu nge maka bangsa enda lalap atena erban si jahat.+
23 Emaka nina kalak e man bangku, ‘La siteh kai si terjadi man Musa, kalak si minpin kita ndarat arah Mesir nari, emaka banlah sada dibata guna minpin kami.’+
24 Emaka ningku man kalak e, ‘Ise pe si lit emasna, tangtangi janah bereken man bangku.’ Kenca si e, kubenterken kerina emas e ku api janah jadi anak lembu emas e.”
25 Idah Musa maka enggo pediat Harun bangsa e rate-ate, emaka enggo pemela kalak e dirina i lebe-lebe musuhna.
26 Kenca si e tedis Musa i pintu gerbang perkemahen janah nina, “Ise si erpihak man Jahwe, reh ku jenda!”+ Emaka pulung kerina kalak Lewi i sekeliling Musa.
27 Jenari nina Musa man kalak Lewi e, “Bagenda nina Jahwe Dibata Israel, ‘Kerina kena masing-masing arus maba pedang janah erdalanlah ku kerina perkemahen, arah gerbang ku gerbang. Bunuhlah senina kena, tetangga-tetangga kena, bage pe teman kompak kena.’”+
28 Lakoken kalak Lewi perentah Musa ndai. Emaka lit kira-kira 3.000 dilaki si ibunuh bas wari e.
29 Kenca si e nina Musa, “Bas wari enda, pebadialah diri kena guna ngelayani Jahwe. Pasti kena ipasu-pasuNa wari enda+ perban nggit kena ngelawan anak kena bage pe senina kena.”+
30 Paginna, nina Musa man bangsa e, “Enggo mbelin kel dosa si lakoken kena, emaka gundari nangkih ateku ku gunung guna erban pemindon man Jahwe. Mbera-mbera nggit Ia ngampuni dosa kena.”+
31 Emaka nangkih Musa ku gunung janah nina man Jahwe, “La tanggung belinna dosa bangsa enda! Enggo ban kalak e berhala arah emas nari!+
32 Tapi adi banci, ampuniNdulah bangsa e.+ Adi lang, hapus saja gelarku si enggo tulisNdu bas bukuNdu.”+
33 Tapi nina Jahwe man Musa, “Ise pe si erdosa man bangKu, pasti Kuhapus gelarna arah bukuKu.
34 Gundari laweslah, pinpinlah bangsa e ku ingan si enggo Kukataken man bandu. MalekatKu pagi arah lebe si minpin kena.+ Aminna pe bage, lit pagi waktuna Kuhukum kalak e perban dosa-dosana.”
35 Kenca si e, hukum Jahwe kalak e perban enggo suruh kalak e Harun erban patung anak lembu emas.
