Keluaren 34:1-35
34 Kenca si e nina Jahwe man Musa, “Banlah dua lembar batu si mbaru bagi si pertama sange.+ Kutulis pagi mulihi kata-kata si pernah Kutulis bas batu si pertama+ si enggo pecahkenndu.+
2 Arus kam ersikap sebap pagi erpagi-pagi arus kam nangkih ku Gunung Sinai. Dahindu pagi Aku i puncak gunung e.+
3 Tapi ise pe la banci ikut ras kam janah ise pe la banci lit i gunung e. Kambing, biri-biri, ras lembu pe la banci nggagat i je.”+
4 Emaka ban Musa dua lembar batu bagi batu si pertama sange janah pagi-pagi si lampas nangkih ia ku Gunung Sinai. Babana dua lembar batu si banna e bagi si perentahken Jahwe.
5 Kenca si e, nusur Jahwe+ bas embun jenari tedis Ia i deher Musa janah katakenNa man Musa kerna gelarNa eme Jahwe.+
6 Lewat Jahwe i lebe-lebe Musa janah nina, “Jahwe, Jahwe kap Dibata si perkuah,+ si mehuli,+ la nukah merawa,+ janah dem alu kekelengen si setia+ ras kebenaren.+
7 Kucidahken kekelengen si setia man ribun kalak.+ Kuampuni kesalahen, pelanggaren, ras dosa,+ tapi labo Kubebasken kalak jahat arah hukumen nari.+ Adi lit bapak-bapak si ersalah Kuhukum pagi ia ras anak-anakna bage pe kempu-kempuna seh ku keturunenna si peteluken ras si peempatken.”+
8 Mis Musa sujud.
9 Kenca si e nina Musa, “O Jahwe, adi jadi kin ateNdu aku, mindo kel aku man baNdu Jahwe, ikutlah Kam ras kami+ amin pe kami bangsa si mekeng.+ Ampunilah dosa kami,+ banlah kami jadi umatNdu.”
10 Nina Dibata ngaloisa, “Gundari Kuban perjanjin ras kena kerina. I lebe-lebe umat Israel Kucidahken pagi perbahanen si luar biasa si lenga pernah terjadi i tengah bangsa-bangsa i belang-belang doni.+ Kerina pagi bangsa si tading i sekeliling kena ngidah perbahanen Jahwe si luar biasa si nandangi Kulakoken i tengah-tengah kena.+
11 “Patuhilah perentah si Kubereken wari enda.+ Kupelawes pagi kalak Amori, kalak Kanaan, kalak Het, kalak Peris, kalak Hewi, ras kalak Jebusi arah tengah-tengah kena nari.+
12 Hati-hatilah kena janah ula ban kena perjanjin ras penduduk negri si nandangi idahi kena e,+ sebap e banci jadi jerat man kena.+
13 Tapi runtuhkenlah ingan-ingan nutung persembahen kalak e, hancurken tugu-tugu bage pe tiang-tiang si badia* akap kalak e.+
14 Ula sembah kena dibata-dibata si deban.+ Aku sajalah sembah kena. Aku kap Jahwe, Aku ngenca Dibata si banci sembah kena.+
15 Hati-hatilah janah ula iban kena perjanjin ras penduduk negri e. Sebap adi bage, sanga persembahken kalak e pagi korban janah sembahna dibata-dibatana,+ pasti pagi suruhna kena ikut janah pan kena pagi korban persembahenna e.+
16 Dungna pejabu kena pagi anak kena si dilaki ras anak kalak e si diberu.+ Kenca si e, perban sembah diberu-diberu e pagi dibata-dibatana, anak-anak kena pe pasti ikut nembah dibata kalak e.+
17 “Ula ban kena berhala.+
18 “Bas bulan Abip*+ arus ban kena Perayan Roti si La Itama Ragi+ perban bas bulan e kena ndarat arah Mesir nari. Bas waktu si enggo itentuken e, pitu wari dekahna arus pan kena roti si la itama ragi, bagi si enggo Kuperentahken man kena.
19 “Tiap anak dilaki sintua Aku kap si mpuna,+ termasuk kerina binatang kena si jantan si pertama lahir, la soal anak lembu ntah pe biri-biri.+
20 Anak kelede si pertama arus itebus alu sada biri-biri. Adi la tebus kena, kerahung kelede e arus ipenggelken. Tiap anak dilaki sintua pe arus tebus kena.+ Ise pe la banci reh ku lebe-lebeKu adi la maba kai pe.
21 “Enem wari dekahna kena banci erdahin, tapi bas wari si pepituken kena arus istrahat+ amin pe bas wari e kena sangana nuan ntah pe rani.
22 “Rayaken kenalah Perayan Peranin ras persembahken kenalah hasil gandum kena si pertama. Rayaken ka Perayan Sapo-Sapo bas akhir tahun.+
23 “Telu kali setahun kerina dilaki arus ngadap man Tuhan si benar eme Jahwe Dibata kalak Israel.+
24 Sebap Kupelawes pagi bangsa-bangsa e arah lebe-lebe kena+ janah Kupebelang pagi daerah kena. Ise pe pagi la lit si merhat muat daerah kena sanga ngadap kena man Jahwe telu kali setahun.
25 “Ula persembahken man bangKu dareh korban binatang radu ras kai pe si lit ragina.+ Korban guna Perayan Paskah la banci isimpan seh ngasa paginna.+
26 “Hasil rani si pertama arah juma kena nari, babalah si mejilena ku rumah Jahwe Dibata kena.+
“Ula belgang kena anak kambing bas susu indungna.”+
27 Nina Jahwe ka man Musa, “Tulislah kerina kata-kata enda.+ Perban arah kata-kata enda me Kuban perjanjin ras kam bage pe ras Israel.”+
28 Tading Musa i je ras Jahwe 40 wari 40 berngi dekahna. La ia man ras minem.+ Tulis Dibata kata-kata perjanjin e eme Sepuluh Perentah bas dua lembar batu ndai.+
29 Kenca si e nusur Musa arah Gunung Sinai nari, babana dua lembar batu si isina perjanjin.+ Sanga nusur ia arah gunung e nari, la teh Musa maka ayona ersinar perban enggo ngerana ia ras Dibata.
30 Sanga idah Harun ras kalak Israel maka ayo Musa ersinar, mbiar kalak e ndeheri Musa.+
31 Tapi lebuh Musa kalak e. Emaka reh Harun ras kerina peminpin kalak Israel jenari ngerana Musa man kalak e.
32 Kenca si e, kerina kalak Israel reh ndahi Musa. Kataken Musa man kalak e kerina perentah si bereken Jahwe man bana i Gunung Sinai.+
33 Kenca dung Musa ngerana ras kalak e, tutupi Musa ayona alu kain.+
34 Tapi adi lawes Musa ku kemah perjumpan guna ngerana ras Jahwe, lepaskenna kain si nutupi ayona e.+ Kenca ia ndarat, pesehna man kalak Israel kerina perentah si alokenna e.+
35 Idah kalak Israel ayo Musa ersinar. Emaka tutupina ka ayona alu kain seh ngasa mulihi ia masuk ku kemah guna ngerana ras Dibata.+
