Keluaren 35:1-35
35 Kenca si e lebuh Musa kerina kalak Israel pulung janah nina man kalak e, “Enda si perentahken Jahwe guna silakoken:+
2 Enem wari dekahna kena erdahin, tapi wari si pepituken arus badia akap kena sebap wari e wari Sabat man Jahwe.+ Ise pe si erdahin bas wari Sabat arus ibunuh.+
3 I japa pe kena tading la banci pegara kena api sanga wari Sabat.”
4 Kenca si e nina Musa man kerina kalak Israel, “Enda si perentahken Jahwe:
5 ‘Pepulunglah sumbangen kena man Jahwe.+ Ise pe si tersuruh ukurna+ mere sumbangen man Jahwe banci berekenna emas, pirak, tembaga,
6 benang biru, benang wol ungu, benang si megara, linen halus, mbulu kambing,+
7 kulit biri-biri jantan si enggo iwarnai megara, kulit anjing laut, kayu akasia,*
8 minak lampu, balsem* guna minak pelantiken ras guna kemenyan si merim,+
9 batu oniks,* bage pe batu si debanna guna ileketken ku epod*+ ras ku penutup dada.+
10 “‘Kerina kalak si ahli+ i tengah-tengah kena arus reh guna erban kerina si perentahken Jahwe,
11 eme kemah ingan ersembah termasuk kain kemahna ras penutupna, kawit-kawitna ras rangkana, beloti-belotina, tiang-tiangna, ras alasna si erlubang,
12 Peti Perjanjin*+ ras tongkat-tongkatna,+ tutupna+ ras tirai+ pembatasna,
13 meja+ ras tongkat-tongkatna bage pe kerina perlengkapenna ras roti persembahen,+
14 ingan lampu+ ras perlengkapenna bage pe lampu ras minakna,+
15 ingan nutung* persembahen guna nutung kemenyan+ ras tongkat-tongkatna, minak pelantiken ras kemenyan si merim,+ tirai-tirai man pintu masuk kemah ingan ersembah,
16 ingan nutung persembahen guna mpersembahken persembahen tutungen+ ras jaring tembagana, tongkat-tongkatna ras kerina perlengkapenna, baskom ras nahena,+
17 tirai si jadi dingding halamen,+ tiang-tiangna ras alasna si erlubang, tirai masuk ku bas pintu halamen,
18 pantuk-pantuk kemah ingan ersembah, pantuk-pantuk ras nali halamen kemah,+
19 baju si itenun alu mejile+ guna ngelayani bas ingan si badia, baju si badia man Imam Harun+ bage pe man anak-anakna si dilaki si ngelayani jadi imam.’”
20 Emaka lawes kerina kalak Israel si pulung e nadingken Musa.
21 Kerina kalak si tersuruh ukurna+ bage pe si teriahken ukurna, berekenna sumbangen man Jahwe gelah ipake erban kemah ingan ersembah, baju imam,* bage pe kerina si iperluken i je.
22 Kerina si tersuruh ukurna terus rehen mereken sumbangen, la soal dilaki ntah pe diberu. Baba kalak e kancing perhiasen, anting-anting, cincin, perhiasen si debanna, bage pe erbage-bage barang arah emas nari. Kerina emas e persembahken kalak e* man Jahwe.+
23 Kerina kalak si lit benang biruna, benang wol unguna, benangna si megara, linen halusna, mbulu kambingna, kulit biri-biri jantanna si enggo iwarnai megara, bage pe kulit anjing lautna, sumbangkenna kerina.
24 Kerina kalak si lit pirakna ras tembagana, sumbangkenna man Jahwe, bage pe kerina si lit kayu akasiana,* sumbangkenna guna keperlun dahin e.
25 Kerina diberu si beluh+ mintal, babana si enggo pintalna eme: benang biru, wol ungu, benang megara, ras linen halus.
26 Kerina diberu si beluh mintal, pintalna ka benang arah mbulu kambing, perban tersuruh ukurna.
27 Peminpin-peminpin bangsa e maba batu oniks* bage pe batu si debanna guna ileketken ku epod* ras ku penutup dada,+
28 minak balsem* ras minak lampu, bage pe minak guna pelantiken+ ras guna kemenyan si merim.+
29 Kerina dilaki bage pe diberu si tersuruh ukurna, reh maba sumbangen guna dahin si perentahken Jahwe arah Musa. Kerina e ibereken kalak Israel jadi persembahen sukarela man Jahwe.+
30 Kenca si e nina Musa man kalak Israel, “Enggo pilih Jahwe Besalel anak Uri kempu Hur arah suku Juda nari.+
31 Enggo banNa ia dem alu kesah si badia, bereNa ia kepentaren, pengertin, pemeteh kerna erbage-bage keahlin
32 guna erban rancangen, erban barang-barang arah emas, pirak, ras tembaga,
33 guna motong ras mbentuk batu-batu si merga, ras erban kerina ukiren si iban arah kayu nari.
34 Bereken Dibata ka man Besalel ras Oholiap kengasupen guna ngajari kalak si deban. Oholiap+ e anak Ahisamah arah suku Dan nari.
35 Bereken Dibata man kalak e kengasupen+ ngelakoken kerina pendahin tukang, erban erbage tenunen, ras erban erbage sulamen arah benang biru, benang wol ungu, benang megara, ras linen halus, bage pe erban erbage-bage tenunen si debanna. Kalak enda si erban erbage-bage rancangen ras ngelakoken erbage-bage pendahin.
Cataten i teruh
^ Jenis batang kayu enda turah bas gurun pasir ntah pe taneh mesawang.
^ Minak si merim si iban arah sinuan-sinuan ntah pe batang kayu tertentu. E ipake guna jadi tambar ntah pe parfum.
^ Ntah “batu si merga.”
^ Ntah “Peti Perpadanen.”
^ As. “baju si badia.”
^ Ntah “jadi persembahen si iayunken.”
^ Jenis batang kayu enda turah bas gurun pasir ntah pe taneh mesawang.
^ Ntah “batu si merga.”
^ Minak si merim si iban arah sinuan-sinuan ntah pe batang kayu tertentu. E ipake guna jadi tambar ntah pe parfum.
