Keluaren 36:1-38
36 “Besalel erdahin pagi ras Oholiap bage pe ras kerina kalak si ahli si enggo bere Jahwe kepentaren ras pengertin. Alu bage banci teh kalak e ngelakoken kerina pendahin guna pelayanen si badia bagi si iperentahken Jahwe.”+
2 Kenca si e lebuh Musa me Besalel ras Oholiap bage pe kerina kalak si ahli si enggo bere Jahwe kepentaren,+ eme kerina si tersuruh ukurna ngelakoken dahin e alu sukarela.+
3 Jenari bereken Musa man kalak e barang-barang si sumbangken+ kalak Israel guna pelayanen si badia. Kalak Israel pe terus mereken sumbangen sukarela man Musa tiap erpagi-pagi.
4 Kenca mulai kalak e dahin si badia e, reh kalak e sada per sada
5 ndahi Musa janah nina, “Sumbangen si bereken kalak Israel guna dahin si perentahken Jahwe enggo buen asangken si iperluken.”
6 Emaka suruh Musa gelah pengumumen enda ipeseh ku kerina perkemahen: “Lanai padah baba kena sumbangen guna mbangun kemah ingan ersembah.” Emaka lanai baba kalak e sumbangen kai pe.
7 Enggo bias sumbangen si bere kalak e guna ndungi kerina pendahin e, malahen lebih.
8 Emaka kerina kalak si ahli+ e erban sepuluh kain kemah guna kemah ingan ersembah.+ Kain kemah e iban arah linen halus si ipintal, benang biru, benang wol ungu, bage pe benang megara. Kenca si e sulam kalak e gambar-gambar kerubim bas kain kemah e.+
9 Tiap kain kemah e gedangna 12,5 meter, belangna 1,8 meter.* Kerina kain kemah e seri belangna.
10 Kenca si e sambungken kalak e lima kain kemah jadi sada kain kemah si mbelang, bage ka banna man lima kain kemah si debanna.
11 Jenari ban kalak e ka gelang-gelang arah benang biru nari bas duana pinggir kain kemah si mbelang e, gelah duana kain kemah si mbelang e banci isambungken.
12 Banna 50 gelang bas kain si mbelang e, banna ka 50 gelang bas pinggir kain kemah si sada nari, alu bage sanga gelang-gelang e ipersada lit kerina pasangenna.
13 Banna ka 50 kawit-kawit arah emas nari janah pakena kawit-kawit e mpersada kain kemah si mbelang ndai duana. Emaka duana kain kemah si mbelang ndai jadi sada guna kemah ingan ersembah.
14 Kenca si e banna 11 kain kemah arah mbulu kambing jadi penutup kemah ingan ersembah.+
15 Tiap kain kemah e gedangna 13,4 meter, belangna 1,8 meter.* Kerina kain kemah e seri belangna.
16 Kenca si e sambungkenna lima kain kemah jadi kain kemah si mbelang, enem kain kemah si debanna pe sambungkenna ka jadi kain kemah si mbelang.
17 Jenari banna ka 50 gelang bas pinggir kain kemah si mbelang e ras 50 gelang bas pinggir kain kemah si sada nari, alu bage duana kain kemah si mbelang e banci isambungken.
18 Banna ka 50 kawit-kawit arah tembaga nari guna mpersada duana kain kemah si mbelang e.
19 Banna penutup kemah e arah kulit biri-biri jantan si enggo iwarnai megara. Banna ka penutup si iban arah kulit anjing laut nari si itama pagi i datasna.+
20 Kenca si e banna rangka-rangka man kemah ingan ersembah arah kayu akasia*+ nari janah pasangna kerina tegak lurus.+
21 Tiap rangka ganjangna 445 sentimeter, belangna kira-kira 67 sentimeter.*
22 Bas tiap rangka lit dua pen* si sejajar. Bage me banna man kerina rangka kemah ingan ersembah.
23 Banna ka 20 rangka jadi dingding kemah ingan ersembah si pengalana ku selatan.
24 Dung e banna ka 40 alas pirak si erlubang guna ipasang i teruh 20 rangka ndai. Dua alas pirak ipasangken man sada rangka sebap bas tiap rangka lit dua pen.*+
25 Banna ka 20 rangka jadi dingding kemah ingan ersembah si pengalana ku utara,
26 ras 40 alas pirak si erlubang. Dua alas pirak man sada rangka janah tiap rangka lit dua alas pirak i teruhna.
27 Banna enem rangka si pengalana ku arah barat bas bagin si arah pudi kemah ingan ersembah.+
28 Banna ka dua rangka guna nahan duana sudut si arah pudi bas kemah ingan ersembah.
29 Bas duana sudut si arah pudi bas kemah ingan ersembah, banna dua kayu si iban teruh nari seh ku datas janah ipersada bas gelang si pertama.
30 Emaka jumlah rangka e kerina lit waluh janah jumlah alas pirak si erlubang lit 16, dua alas pirak i teruh tiap rangka.
31 Kenca si e banna ka beloti-beloti arah kayu akasia nari. Lima beloti man sembelah rangka dingding kemah ingan ersembah,+
32 lima beloti ka man rangka kemah ingan ersembah si sembelah nari. Lima beloti man rangka dingdingna si arah pudi si pengalana ku barat.
33 Bas bagin tengah i tiap dingding kemah ingan ersembah banna ka beloti arah ujung ku ujung.
34 Lapisina ka rangka-rangka e alu emas, banna ka gelang-gelang arah emas nari guna nahan beloti-beloti ndai janah lapisina ka beloti-beloti e alu emas.+
35 Banna tirai+ arah benang biru, benang wol ungu, benang megara, ras linen halus si ipintal. Sulamna ka gambar kerubim-kerubim+ bas tirai e.+
36 Dung e banna ka empat tiang arah kayu akasia nari janah lapisina alu emas. Banna ka kawit-kawit arah emas nari bage pe empat alas pirak si erlubang guna tiang-tiang ndai.
37 Bas pintu masuk ku kemah, banna ka sada tirai si itenun arah benang wol ungu, benang biru, benang megara, ras linen halus si ipintal.+
38 Banna ka lima tiang ras kawit-kawit man tirai e. Bas bagin si arah datas tiang e bage pe kawit-kawitna ilapisina alu emas, tapi lima alasna si erlubang banna arah tembaga nari.
Cataten i teruh
^ Jenis batang kayu enda turah bas gurun pasir ntah pe taneh mesawang.
^ Pen maksudna bagin si nduldul bas ujung rangka e. E me kari si ipersada ras bagin si debanna.
^ Pen maksudna bagin si nduldul bas ujung rangka e. E me kari si ipersada ras bagin si debanna.
