Keluaren 38:1-31
38 Kenca si e ban Besalel ingan nutung* persembahen arah kayu akasia* nari. Bentukna segi empat. Gedangna ras belangna kira-kira dua meter, ganjangna kira-kira sada meter.*+
2 Jenari banna tanduk bas empatna sudut ingan nutung persembahen e, banna tanduk e ersada ras ingan nutung persembahen e. Jenari lapisina ingan nutung persembahen e alu tembaga.+
3 Kenca si e, banna kerina perlengkapen guna ingan nutung persembahen eme ember, sekop, mangkok, garpu, ras ingan rara. Kerina e iban arah tembaga nari.
4 Banna ka jirjak arah tembaga nari si bentukna bagi jaring, tamana jirjak e i teruh babah ingan nutung persembahen, eme bas baginna si arah tengah.
5 Banna ka gelang-gelang bas empatna sudut ingan nutung persembahen e, i deher jirjak tembaga ndai. Gelang-gelang e me si jadi ingan tongkat guna ngangkatsa.
6 Jenari banna tongkat-tongkat arah kayu akasia nari janah lapisina alu tembaga.
7 Masukkenna tongkat-tongkat e ku gelang-gelang si lit bas dingding ingan nutung persembahen guna ngangkatsa. Banna ingan nutung persembahen e bentukna bagi kotak kosong.
8 Kenca si e banna baskom ras nahena arah tembaga nari.+ Banna e arah cermin-cermin* si bereken diberu-diberu si ngelayani bas pintu masuk kemah perjumpan.
9 Kenca si e banna halamen+ kemah ingan ersembah. Bas bagin si pengalana ku selatan banna tirai si jadi dingding arah linen halus si ipintal. Gedang tirai e 44,5 meter.*+
10 Bas bagin e banna 20 tiang ras 20 alas tembaga si erlubang. Kawit-kawit bas tiang e ras kerina gelangna* banna arah pirak nari.
11 Bas bagin utara pe banna ka tirai si gedangna 44,5 meter. Banna ka 20 tiang ras 20 alas tembaga si erlubang guna tirai e. Kawit-kawit bas tiang e ras gelangna banna arah pirak nari.
12 Tapi bas bagin si pengalana ku barat banna tirai si jadi dingding si gedangna kira-kira 22 meter.* Banna ka sepuluh tiang ras sepuluh alas si erlubang. Banna ka kawit-kawitna ras gelang-gelangna* arah pirak.
13 Belang halamen si pengalana ku arah matawari terbit eme si ku arah timur kira-kira 22 meter.
14 I je me banna gerbang halamen e. I sebelah kanan gerbang e banna tirai si gedangna kira-kira pitu meter* bage pe telu tiang ras telu alas si erlubang.
15 Bas sebelah kiri gerbang e, banna tirai si gedangna kira-kira pitu meter bage pe telu tiang ras telu alas si erlubang.
16 Kerina tirai i sekeliling halamen e iban arah linen halus si ipintal.
17 Alas si erlubang guna tiang e iban arah tembaga nari, kawit-kawit ras gelang-gelang guna tiang e iban arah pirak nari janah bagin tiang si arah datas lapisina alu pirak. Banna ka penyambungna arah pirak nari man kerina tiang halamen e.+
18 Tirai gerbang halamen e iban arah linen halus si ipintal, benang wol ungu, benang si megara, ras benang biru. Gedangna kira-kira siwah meter, ganjangna kira-kira dua meter,* seri ganjangna ras tirai si jadi dingding halamen.+
19 Tirai e gantungkenna ku empat tiang i datas empat alasna si erlubang si iban arah tembaga nari. Kawit-kawitna ras gelang-gelangna* iban arah pirak nari, janah bagin tiang e si arah datas pe iban arah pirak nari.
20 Kerina pantuk-pantuk kemah ingan ersembah ras pantuk-pantuk i sekeliling halamen iban arah tembaga nari.+
21 Perentahken Musa kalak Lewi+ nulisken bahan-bahan si ipake guna erban kemah ingan ersembah eme ingan Peti Perjanjin.*+ Si ngawasi dahin e eme Itamar+ anak Imam Harun.
22 Besalel+ anak Uri kempu Hur arah suku Juda nari me si erban kerina si perentahken Jahwe arah Musa.
23 Si nampati Besalel eme Oholiap+ anak Ahisamah arah suku Dan nari. Oholiap sekalak tukang janah beluh ia nyulam. Beluh ka ia nenun arah benang biru, benang wol ungu, benang megara, bage pe arah linen halus.
24 Emas si igunaken man kerina dahin bas kemah ingan ersembah seri buena ras emas arah persembahen si iayunken.+ Berat emas e kira-kira 1.000 kilo* menurut timbangen si igunaken bas ingan si badia.
25 Pirak si ipepulung arah kalak si enggo idaftar bas kalak Israel nari buena lit 3.440 kilo,* menurut timbangen si igunaken bas ingan si badia.
26 Dilaki si umurna 20 tahun ku datas+ si enggo idaftar lit 603.550 kalak.+ Tiap kalak mereken 5,7 gram* pirak menurut timbangen si igunaken bas ingan si badia.
27 Pirak si ipake guna erban 100 alas si erlubang+ man tiang kemah ingan ersembah ras man tirai buena lit 3.420 kilo.* Lit 34,2 kilo* pirak si ipake guna erban tiap alas tiang.
28 Gunaken Besalel 20 kilo* pirak guna erban kawit-kawit man tiang-tiang ras guna ngelapisi bagin tiang si arah datas, jenari sambungkenna.
29 Lit kira-kira 2.421 kilo* tembaga si idat arah persembahen* nari.
30 Gunaken Besalel tembaga e erban alas si erlubang guna tiang gerbang kemah perjumpan, erban ingan nutung persembahen ras jirjak tembagana, erban kerina perlengkapen ingan nutung persembahen,
31 erban alas si erlubang man tiang i sekeliling halamen, erban alas si erlubang man gerbang masuk ku halamen, erban kerina pantuk-pantuk kemah ingan ersembah ras erban kerina pantuk-pantuk+ i sekeliling halamen.
Cataten i teruh
^ Jenis batang kayu enda turah bas gurun pasir ntah pe taneh mesawang.
^ Cermin e iban arah logam si igosok seh asa erndilap.
^ Ntah “si mpersadasa.”
^ Ntah “si mpersadasa.”
^ Ntah “si mpersadasa.”
^ Ntah “Peti Perpadanen.”
^ As. “1 talenta.”
^ Ntah “persembahen si iayunken.”
