Keluaren 39:1-43
39 Ban kalak e baju si mejile si itenun arah benang biru, benang wol ungu, ras benang megara,+ si ipake guna ngelayani bas ingan si badia. Ban kalak e ka baju si badia man Imam Harun+ bagi si perentahken Jahwe man Musa.
2 Ban kalak e epod*+ arah benang emas nari, benang biru, benang wol ungu, benang megara, ras linen halus si ipintal.
3 Tempahna emas jadi lembar-lembar si menipes, jenari potong-potongna jadi benang. Sulamkenna benang emas e radu ras benang biru, benang wol ungu, benang megara, ras linen halus ku epod.*
4 Ban kalak e tutup bara man epod* gelah ersada duana ujung epod si arah datas.
5 Tenunna ka ikat pinggang epod* e arah bahan si seri eme linen halus si ipintal, benang emas, benang biru, benang wol ungu, ras benang megara, bagi si perentahken Jahwe arah Musa. Ikat pinggang e pagi si ipakeken ku epod e guna ngiketsa alu nteguh.+
6 Kenca si e tamana batu-batu oniks* bas pengiket si iban arah emas nari. Ukirna gelar anak-anak Israel bas batu e, bagi ngukir cincin.+
7 Tamana batu-batu e bas tutup bara epod* guna jadi tanda peringeten man kalak Israel+ bagi si perentahken Jahwe arah Musa.
8 Kenca si e sulam Besalel penutup dada+ bagi cara erban epod,* eme alu benang emas, benang biru, benang wol ungu, benang megara, ras linen halus si ipintal.+
9 Penutup dada e bentukna arus segi empat sanga ilipat dua janah gedang ras belangna sada jengkal.*
10 Isusun kalak e batu e jadi empat baris. Baris pertama batu mirah, topas, ras zamrud.
11 Bas baris si peduaken eme batu pirus, sapir, ras jaspis.
12 Bas baris si peteluken eme batu lesyem,* akik, ras amatis.*
13 Bas baris si peempatken eme batu krisolit, oniks, ras giok. Tiap batu e pasang kalak e ku pengiketna si iban arah emas nari.
14 Bas batu-batu e iukir gelar 12 anak Israel bagi erban ukiren bas cincin. Tiap gelar jadi wakil sada suku arah 12 suku Israel.
15 Ban kalak e dua nali arah emas murni+ nari si bentukna bagi nali si ipiuh* guna jadi nali penutup dada.
16 Ban kalak e ka dua cincin arah emas nari janah tamana bas duana sudut si arah datas penutup dada e.
17 Kenca si e masukken kalak e nali emas e ku duana cincin si itama bas duana sudut si arah datas penutup dada e.
18 Dung e masukken kalak e duana ujung nali emas e ku bas ingan pengiket si iban arah emas si enggo ipasang bas tutup bara epod,* alu bage penutup dada e lit i bagin arah lebe epod.
19 Jenari ban kalak e ka dua cincin emas janah pasangkenna ku duana sudut si arah teruh penutup dada e, eme bas sudutna si arah bas si pengalana ku epod.*+
20 Kenca si e ban kalak e dua nari cincin emas janah pasangna bas bagin arah lebe epod,* eme i teruh duana penutup barana, si lit i datas ikat pinggang epod i deher bagin persambungenna.
21 Dung e iket kalak e penutup dada alu nali biru si imasukken arah cincin si lit i penutup dada ku cincin si lit i epod,* gelah penutup dada e la ergeser arah epod si lit i datas ikat pinggang, bagi si perentahken Jahwe arah Musa.
22 Banna ka rompi si gedang si ipake i teruh epod,* rompi e iban arah benang biru nari.+
23 I rompi e lit banna lubang kerahungna bagi lubang kerahung baju perang. Bas sekeliling lubang kerahungna e ijait alu rapat gelah la nukah merigat.
24 Bas pinggir rompi e si arah teruh, banna ka hiasen buah delima si ipintal arah benang biru, benang wol ungu, ras benang megara.
25 I antara hiasen buah delima e tama kalak e lonceng emas. Bage me ban kalak e bas sekeliling rompi e si arah teruh.
26 Pasang kalak e ka sada lonceng ras sada hiasen delima, selang-seling banna i sekeliling bagin rompi e si arah teruh. Rompi e ipake guna ngelayani bagi si perentahken Jahwe arah Musa.
27 Tenun kalak e jubah arah linen halus man Harun ras anak-anakna.+
28 Selain si e ban kalak e ka penutup takal+ ras pengiketna+ si mejile arah linen halus bage pe celana pendek*+ arah linen halus si ipintal,
29 ras tenun kalak e ka ikat pinggang jubah e arah linen halus si ipintal, benang biru, benang wol ungu, bage pe benang megara bagi si perentahken Jahwe arah Musa.
30 Dung e ban kalak e lempengen si erndilap eme lempengen si badia si iban arah emas murni nari, si jadi tanda maka Harun enggo pisahken Dibata. Bas lempengen e ukir kalak e kata-kata enda bagi ngukir cincin: “Jahwe badia kap.”+
31 Iket kalak e lempengen emas e ku penutup takal ndai alu nali biru bagi si perentahken Jahwe arah Musa.
32 Emaka dung kerina dahin guna erban kemah ingan ersembah eme kemah perjumpan. Lakoken kalak Israel kerina si perentahken Jahwe arah Musa.+ Lakoken kalak e tepat bagi si iperentahken.
33 Kenca si e baba kalak e kemah+ ingan ersembah+ ras kerina perlengkapenna man Musa, termasuk pantuk-pantukna,+ rangka-rangkana,+ beloti-belotina,+ tiang-tiangna ras alas-alasna si erlubang,+
34 penutupna si iban arah kulit biri-biri jantan si enggo iwarnai megara,+ penutupna si iban arah kulit anjing laut, tirai-tirai pemisahna,+
35 Peti Perjanjin* ras tongkat-tongkatna+ bage pe penutupna,+
36 meja ras kerina perlengkapenna+ bage pe roti persembahen,
37 ingan lampu si iban arah emas murni ras lampu-lampuna+ si iban erbaris, kerina perlengkapenna+ bage pe minak lampuna,+
38 ingan nutung* persembahen+ si iban arah emas nari, minak pelantiken,+ kemenyan si merim,+ tirai+ man pintu masuk kemah,
39 ingan nutung persembahen arah tembaga+ nari ras jirjakna si iban arah tembaga nari, tongkat-tongkatna,+ kerina perlengkapenna,+ baskom ras nahena,+
40 tirai man halamen, tiang-tiang ras alasna si erlubang,+ tirai+ man gerbang halamen, nali-nali kemah ras pantuk-pantukna,+ kerina perlengkapen guna ngelayani bas kemah ingan ersembah eme bas kemah perjumpan,
41 baju si itenun alu mejile guna ngelayani bas ingan si badia, baju si badia man Imam Harun+ bage pe man anak-anakna si dilaki si ngelayani jadi imam.
42 Lakoken kalak Israel kerina dahin si perentahken Jahwe arah Musa.+
43 Sanga pereksa Musa kerina si dahiken kalak e, idahna maka kerina si lakoken kalak e tepat bagi si perentahken Jahwe. Emaka pasu-pasu Musa kalak e kerina.
Cataten i teruh
^ Ntah “batu-batu si merga.”
^ Mungkin maksudna batu ambar, hyacinth, opal, turmalin.
^ Ntah “kecubung.”
^ Ntah “ipuyu.”
^ Ntah “paken dalam.”
^ Ntah “Peti Perpadanen.”
