Keluaren 4:1-31
4 Tapi nina Musa, “Uga adi kalak e la tek man bangku janah la begikenna aku?+ Pasti nina kalak e pagi, ‘Labo mungkin jumpai Jahwe kam.’”
2 Nina Jahwe man bana, “Kai si jemakndu ena?” Nina Musa, “Tongkat.”
3 Nina Dibata, “Benterken tongkatndu e ku taneh.” Emaka benterken Musa tongkat e ku taneh janah jadi nipe tongkat e.+ Kiam me Musa je nari.
4 Nina Jahwe man Musa, “Tangkap ikur nipe e.” Emaka tangkapna nipe e jenari berubah jadi tongkat bas tanna.
5 Kenca si e nina Dibata, “Bage pagi banndu gelah tek kalak e maka enggo ijumpai Jahwe kam+ eme Dibata nini bulang kalak e, Dibata Abraham, Isak, ras Jakup.”+
6 Nina Jahwe sekali nari man bana, “Cuba masukken tanndu ku bas jubahndu.” Emaka masukken Musa tanna ku bas jubahna. Sanga ipedaratna, tanna enggo kena kusta, mbentar bagi salju.+
7 Kenca si e nina Dibata, “Masukken mulihi tanndu ku bas jubahndu.” Emaka masukken Musa mulihi tanna ku bas jubahna. Sanga ipedaratna, tanna e enggo malem!
8 Nina Dibata, “Adi la kalak e tek ntah pe la diatena mukjizat si pertama, sanga idahna mukjizat si peduaken pasti pagi kalak e tek man bandu.+
9 Tapi, adi tetap pagi kalak e la tek ras la begikenna kam aminna pe enggo idahna duana mukjizat e, buatndulah lau arah Lau Nil, jenari amburken ku taneh si kerah.+ Berubah pagi lau e jadi dareh.”
10 Nina Musa man Jahwe, “Ampuni aku, Jahwe. Mbarenda nari aku la beluh ngerana. Gundari pe bage denga, amin gia enggo ngerana Kam ras aku, sebap aku la lancar ngerana.”+
11 Nina Jahwe man bana, “Tehndu kin ise si erban babah manusia? Ise kin si banci erban manusia bisu, pasek, erpengidah, ras pentang? La kin Aku Jahwe si erbanca?
12 Emaka laweslah kam, Aku pagi si nampati kam ngerana, Aku pagi si ngajari kam kerna kai si arus katakenndu.”+
13 Tapi nina, “Ampuni aku Jahwe, kalak si deban sajalah suruhNdu, ise pe ateNdu suruhNdu.”
14 Emaka merawa Jahwe man Musa, nina, “La kin seninandu nge Harun+ kalak Lewi e? Si Kuteh ia beluh ngerana. Ia sangana bas dalan, jumpaina atena kam. Adi idahna kam, pasti meriah ukurna.+
15 Emaka ngeranalah kam man bana janah kataken si Kukataken ndai.+ Aku pagi si nampati kena ngerana.+ Aku pagi si ngajari kena kerna kai si arus lakoken kena.
16 Ia pagi si jadi juru bicarandu sanga ngerana kam man kalak Israel janah tempa-tempa jadi Dibata pagi kam man Harun.*+
17 Babandulah tongkat ena, pakendulah pagi erban mukjizat-mukjizat.”+
18 Emaka mulih Musa ndahi Jetero mamana+ janah nina man bana, “Bere min aku ndahi senina-seninaku i Mesir guna ngenen uga keadan kalak e gundari.” Nina Jetero man Musa, “Berkatlah kam alu mejuah-juah.”
19 Kenca si e nina Jahwe man Musa i Midian, “Mulihlah kam ku Mesir perban kalak si atena munuh kam enggo mate.”+
20 Kenca si e dilo Musa diberuna ras anak-anakna janah penangkihna ku datas kelede jenari berkat kalak e ku negri Mesir. Selain si e baba Musa ka tongkat Dibata si benar bas tanna.
21 Jenari nina Jahwe man Musa, “Enggo Kubereken kuasa man bandu erban mukjizat.+ Kenca seh pagi kam i Mesir, cidahkenlah kerina mukjizat e i lebe-lebe raja Mesir. Tapi Kupediat pagi piher ukurna,+ labo pagi pediatna umatKu lawes.+
22 Bagenda me si arus katakenndu man raja Mesir, ‘Nina Jahwe, “Israel e anakKu sintua.+
23 Enda me perentahKu, pediatlah anakKu e lawes guna ngelayani Aku. Tapi adi la berendu kalak e lawes, Kubunuh pagi anakndu sintua.”’”+
24 Bas perdalanen, sanga bas ingan erberngi, jumpai Jahwe*+ me ia janah bunuhNa ateNa ia.*+
25 Dungna ibuat Sipora+ batu si ntelap, jenari sunatna anakna si dilaki. Kenca si e benterkenna kulit sunaten e ku nahena.* Nina, “Kam kap penganten dareh man bangku.”
26 Emaka la bunuh Dibata ia. Sanga si e nina Sipora, “Penganten dareh,” perban sunat e.
27 Kenca si e nina Jahwe man Harun, “Jumpailah Musa i taneh mesawang.”*+ Emaka lawes ia njumpai Musa i gunung Dibata si benar+ janah sanga jumpa kalak e iemana Musa.
28 Ceritaken Musa man Harun kerina si enggo kataken Jahwe man bana+ bage pe kerina mukjizat si suruh Dibata lakokenna.+
29 Kenca si e lawes Musa ras Harun janah pepulungna kerina peminpin kalak Israel.+
30 Ceritaken Harun man kalak e kerina si enggo kataken Jahwe man Musa, janah cidahkenna mukjizat-mukjizat+ i lebe-lebe kalak Israel.
31 Tek dungna kalak Israel.+ Sanga begi kalak e maka enggo perdiateken Jahwe kalak Israel+ bage pe kesusahenna,+ sujud kalak e.
Cataten i teruh
^ Ntah “janah kam kari jadi wakil Dibata man Harun.”
^ Maksudna, malekat si ngewakili Jahwe.
^ Mungkin maksudna anak Musa si dilaki.
^ Mungkin nahe malekat e.
^ Taneh si mbelang si jarang iingani.
