Keluaren 40:1-38
40 Kenca si e nina Jahwe man Musa,
2 “Bas wari si pertama bas bulan si pertama, pasanglah kemah ingan ersembah eme kemah perjumpan e.+
3 Tamaken Peti Perjanjin* ku bas kemah e+ janah ban tirai pemisah i lebe-lebe Peti Perjanjin e.+
4 Tamaken meja+ ku bas janah atur perlengkapen meja e i datasna. Tamaken ka ingan lampu+ ku bas janah pegara lampuna.+
5 Kenca si e baba ingan nutung* persembahen kemenyan+ si iban arah emas nari ku lebe-lebe Peti Perjanjin janah pasang tirai man pintu kemah ingan ersembah.+
6 “Tamaken ingan nutung persembahen tutungen+ i lebe-lebe pintu masuk kemah perjumpan eme i lebe-lebe pintu masuk kemah ingan ersembah.
7 Tamaken baskom i antara kemah perjumpan ras ingan nutung persembahen janah isi lau ku baskom e.+
8 Kenca si e pasang tirai si jadi dingding bas halamen+ janah pasang tirai+ bas gerbang halamen e.
9 Buatlah minak pelantiken,+ percikken ku kemah ingan ersembah bage pe ku kerina isina.+ Pebadialah ingan e bage pe kerina perlengkapenna gelah jadi badia kerina.
10 Percikken ka ku ingan nutung persembahen tutungen bage pe ku kerina perlengkapenna janah pebadia ingan nutung persembahen e gelah badia kel ingan e.+
11 Percikken ka ku baskom ras ku nahe baskom e gelah badia baskom e ras nahena.
12 “Kenca si e, babalah Harun ras anak-anakna ku pintu masuk kemah perjumpan, suruh kalak e mbersihken dirina alu lau.+
13 Pakekenlah baju imam*+ man Harun, lantik ia+ janah pebadia gelah layanina Aku selaku imam.
14 Kenca si e babalah anak-anak Harun, pakeken jubah man kalak e.+
15 Lantiklah kalak e bagi kam enggo ngelantik bapakna+ gelah banci kalak e ngelayani jadi imam man bangKu. Alu bage kalak e ras keturunenna banci jadi imam guna ngelayani Aku.”+
16 Lakoken Musa kerina si perentahken Jahwe man bana.+ Lakoken Musa tepat bagi si perentahkenNa.
17 Bas bulan si pertama bas tahun si peduaken, bas wari si pertama bulan e, kemah ingan ersembah enggo dung iban.+
18 Kenca pasang Musa kemah ingan ersembah e, pasangna ka alas-alasna si erlubang,+ rangka-rangkana,+ beloti-belotina+ si arah bas, bage pe tiang-tiangna.
19 Kimbangken Musa kain penutup kemah+ i datas kemah ingan ersembah, tamakenna ka kain penutup+ si debanna ku datasna, bagi si perentahken Jahwe man bana.
20 Kenca si e buatna dua lembar batu+ si tertulis i je perentah Dibata janah tamana ku bas Peti Perjanjin.+ Pasangna tongkat-tongkat+ i Peti Perjanjin e janah pasangkenna ka penutup+ Peti Perjanjin e.+
21 Baba Musa Peti Perjanjin e ku kemah ingan ersembah janah pasangna tirai+ pemisah guna nutupi Peti Perjanjin e,+ bagi si perentahken Jahwe man bana.
22 Kenca si e tama Musa meja+ ku bas kemah perjumpan, tamana i darat tirai i sebelah utara kemah perjumpan.
23 Jenari tamakenna roti+ i datas meja e i lebe-lebe Jahwe bagi si perentahken Jahwe man bana.
24 Tamaken Musa ingan lampu+ ku bas kemah perjumpan. Tamakenna i lebe-lebe meja eme i sebelah selatan kemah ingan ersembah.
25 Pegara Musa lampu-lampu+ e i lebe-lebe Jahwe bagi si perentahken Jahwe man bana.
26 Kenca si e babana ingan nutung persembahen si iban arah emas nari+ ku bas kemah perjumpan, tamakenna e i lebe-lebe tirai.
27 Ingan nutung persembahen e guna nutung kemenyan si merim+ gelah nangkih asapna,+ bagi si perentahken Jahwe man bana.
28 Kenca si e pasangna tirai+ bas pintu masuk ku kemah ingan ersembah.
29 Tamakenna ingan nutung persembahen tutungen+ i pintu masuk kemah ingan ersembah, eme kemah perjumpan. Alu bage banci persembahkenna persembahen tutungen+ ras persembahen pangan* i je, bagi si perentahken Jahwe man bana.
30 Kenca si e tamakenna baskom i antara kemah perjumpan ras ingan nutung persembahen janah isina lau ku baskom e.+
31 Musa ras Harun bage pe anak-anakna mbersihken tanna ras nahena arah lau baskom e.
32 Arus bersihken+ kalak e dirina adi masuk ate kalak e ku kemah perjumpan ntah pe sanga ndeheri ingan nutung persembahen, bagi si perentahken Jahwe man Musa.
33 Si terakhir, pasangna tirai bas halamen+ i sekeliling kemah ingan ersembah ras ingan nutung persembahen. Pasangna ka tirai bas gerbang halamen e.+
Dung me dahiken Musa dahin e.
34 Kenca si e mulai kemah perjumpan e tutupi embun janah dem kemah ingan ersembah e alu kemulian Jahwe.+
35 Musa la banci masuk ku bas kemah perjumpan e perban itutupi embun kemah e. Kemah ingan ersembah e dem alu kemulian Jahwe.+
36 Adi nangkih kenca embun e arah kemah ingan ersembah nari, bongkar kalak Israel kemahna janah pindah kalak e ku ingan si deban.+
37 Adi la nangkih embun e arah kemah e, la pindahken kalak e inganna erkemah.+
38 Segedang perdalanen kalak Israel bas taneh mesawang,* sanga ciger banci idah kalak e embun Jahwe i datas kemah ingan ersembah janah sanga berngi idah kalak e tiang api i datas kemah ingan ersembah e.+
Cataten i teruh
^ Ntah “Peti Perpadanen.”
^ As. “baju si badia.”
^ Taneh si mbelang si jarang iingani.