Keluaren 5:1-23
5 Kenca si e, lawes Musa ras Harun njumpai raja Mesir janah nina, “Enda me si kataken Jahwe Dibata Israel, ‘Pediatlah umatKu lawes ku taneh mesawang* guna erban perayan man bangKu.’”
2 Tapi nina raja ngaloisa, “Ise kin Jahwe e?+ Engkai maka arus kupatuhi kata-kataNa janah kupediat kalak Israel lawes?+ La kutandai ise Jahwe e. Emaka labo kupediat kalak Israel lawes.”+
3 Tapi nina kalak e bana, “Dibata kalak Heber enggo ngerana man kami. Emaka pediatlah kami lawes ku taneh mesawang* guna mpersembahken korban man Jahwe Dibata kami.+ Telu wari pagi dekahna maka seh kami i jah. Adi lang, pasti banNa pagi kami kena penakit ntah pe pediatNa kami ibunuh alu pedang.”
4 Nina raja Mesir man Musa ras Harun, “Engkai maka merhat kel kena erban kalak e nadingken dahinna? Erdahin kena mulihi!”+
5 Nina raja ka, “Maksud kena, suruh kena ate kena kalak e kerina ngadi erdahin guna ngikutken kena?”
6 Bas wari e, mis bereken raja perentah man pengawas budak-budak bage pe man kalak Israel si ipilih jadi mandor, nina,
7 “Ula nai bere kena nggala* man kalak e guna erban batu bata.+ Suruh kalak e saja si ndaramisa.
8 Tapi jumlah batu bata si ban kalak e arus seri buena bagi biasana. Ula kurangi. Enggo santaisa* kalak e, emaka lawes atena erban persembahen man Dibatana.
9 Bereken terbuen dahin man kalak e, gelah lanai lit waktuna megiken cakap si la tuhu.”
10 Emaka lawes pengawas budak+ ras mandor-mandor e ndahi kalak Israel janah nina, “Bagenda nina raja, ‘Lanai kubere nggala man kena.
11 Kena saja si ndaramisa, ate kena ku ja ate kena ndaramisa. Tapi jumlah batu bata si iban kena arus tetap seri buena.’”
12 Emaka lawes kalak Israel e ku kerina daerah i Mesir guna mpepulung nggala.
13 Terus ipaksa pengawas e kalak Israel janah nina, “Jumlah batu bata si ban kena tiap wari arus seri buena bagi sanga isediaken denga nggala man kena.”
14 Mandor-mandor si ipilih arah kalak Israel pe ipekpeki pengawas si ipilih raja.+ Nina pengawas e, “Engkai maka batu bata si ban kena la seri buena bagi biasana? Nderbih kurang, sekalenda pe kurang.”
15 Emaka jumpai mandor Israel raja guna mpeseh keberatenna janah nina, “Engkai maka bage banndu man budak-budakndu, Tuan?
16 La sediaken pengawas si pilihndu e nggala, tapi suruhna kami erban batu bata. Pekpekina ka kami, situhuna kalak e nge si salah.”
17 Tapi nina raja, “Kena enggo santaisa!*+ Enggo santaisa kena! Emaka lawes ate kena mpersembahken korban man Jahwe.+
18 Gundari, erdahin kena mulihi! Labo pagi lit nggala si ibereken man kena. Tapi jumlah batu bata si ban kena arus tetap seri buena.”
19 Kenca teh mandor Israel maka jumlah batu bata si ban kalak e arus seri buena tiap wari, teh kalak e maka situasina enggo seh kel serana.
20 Kenca jumpai kalak e raja, jumpa kalak e ras Musa bage pe Harun si sangana tedis nimai kalak e.
21 Mis nina mandor e man kalak e, “Mbera-mbera idah Jahwe perbahanen kena janah hukumNa kena. Gara-gara kena enggo segat ate raja ras pejabat-pejabatna man kami. Enggo bere kena pedang bas tanna guna munuh kami.”+
22 Kenca si e, nina Musa man Jahwe, “O Jahwe, engkai maka rate mesui banNdu umatNdu? Engkai maka suruhNdu aku?
23 Mulai kin aku ngerana man raja Mesir jadi wakilNdu,*+ reh jahatna perbahanenna man umatNdu+ janah la lit kai pe si banNdu guna mbebasken kalak e.”+
Cataten i teruh
^ Taneh si mbelang si jarang iingani.
^ Taneh si mbelang si jarang iingani.
^ Ntah “jerami.”
^ Ntah “kisatsa.”
^ Ntah “kisatsa.”
^ As. “man raja Mesir bas gelarNdu.”
