Keluaren 6:1-30
6 Emaka nina Jahwe man Musa, “Idahndu pagi kai si Kulakoken man raja Mesir.+ Alu kuasaKu, Kupaksa pagi ia gelah berena kena lawes. Kenca ngidah kuasaKu, suruhna pagi kena ndarat arah negrina.”+
2 Kenca si e nina Dibata man Musa, “Aku kap Jahwe.
3 Mbarenda rusur Kucidahken bangKu selaku Dibata Si Madakuasa+ man Abraham, Isak, ras Jakup. Tapi kerna gelarKu eme Jahwe,+ lenga pernah Kupetandaken alu jelas man kalak e.+
4 Kuban ka perjanjin ras kalak e guna mereken negri Kanaan. Bas negri e me mbarenda kalak e tading jadi kalak asing.+
5 Gundari enggo Kubegi sora nderkuh kalak Israel si jadi budak kalak Mesir, labo Kulupaken perjanjinKu.+
6 “Emaka kataken bagenda man kalak Israel, ‘Aku kap Jahwe. Kubebasken pagi kena arah kerja paksa ras perbudaken kalak Mesir.+ Kuselamatken pagi kena alu tanKu si dem kuasa, mberat pagi Kuban hukumen man kalak Mesir.+
7 Kuban kena jadi umatKu janah Aku jadi Dibata kena.+ Teh kena pagi maka Aku kap Jahwe Dibata kena si mbebasken kena arah perbudaken Mesir nari.
8 Kubaba pagi kena masuk ku negri si Kujanjiken alu sumpah man Abraham, Isak, ras Jakup. Kubereken pagi negri e jadi jang kena.+ Aku kap Jahwe.’”+
9 Peseh Musa si e kerina man kalak Israel, tapi la begiken kalak e Musa perban perbudaken si kejam e janah perban lanai kalak e semangat.+
10 Kenca si e, nina Jahwe man Musa,
11 “Laweslah kam njumpai raja Mesir e, kataken man bana maka arus ipediatna kalak Israel lawes arah negrina.”
12 Tapi nina Musa man Jahwe, “Kalak Israel pe la nggit megiken aku,+ apai ka raja Mesir, me la mungkin nggit ia megiken aku? Aku la lancar ngerana.”+
13 Tapi kataken Jahwe ka man Musa ras Harun perentah si arus ipeseh kalak e man kalak Israel bage pe man raja Mesir, gelah banci baba kalak e kalak Israel ndarat arah negri Mesir nari.
14 Enda me dilaki-dilaki si pernah jadi peminpin suku Israel: Bas suku Ruben eme Henoh, Pallu, Hesron, ras Karmi.+ Enda ndai me anak-anak Ruben. Ruben e anak Israel sintua.+
15 Bas suku Simeon si dilaki eme Jemuel, Jamin, Ohad, Jakin, Sohar, ras Saul. Mamak Saul kalak Kanaan.+ Enda ndai me anak-anak Simeon.
16 Enda me gelar keturunen Lewi+ menurut silsilah kalak e: Anak-anak Lewi eme Gerson, Kohat, ras Merari.+ Lit 137 tahun dekahna Lewi nggeluh.
17 Menurut silsilah keluargana, anak-anak Gerson si dilaki eme Lipni ras Simei.+
18 Anak-anak Kohat si dilaki eme Amram, Ishar, Hebron, ras Usiel.+ Lit 133 tahun dekahna Kohat nggeluh.
19 Anak-anak Merari si dilaki eme Mahli ras Musi.
Enda me keturunen Lewi menurut silsilah kalak e.+
20 Amram erjabu ras turang bapakna eme Johebet.+ Lahirken Johebet me Harun ras Musa.+ Lit 137 tahun dekahna Amram nggeluh.
21 Anak-anak Ishar si dilaki eme Korah,+ Nepeg, ras Sikri.
22 Anak-anak Usiel si dilaki eme Misael, Elisapan,+ ras Sitri.
23 Iempoi Harun me Eliseba anak Aminadap. Eliseba e turang Nahesson.+ Lahirken Eliseba me Nadap, Abihu, Eleasar, ras Itamar.+
24 Anak-anak Korah si dilaki eme Asir, Elkana, ras Abiasap.+ Enda ndai me keturunen Korah.+
25 Eleasar+ anak Harun ngempoi salah sada anak Putiel. Lahirken diberu Eleasar me Pinehas.+
Enda me gelar-gelar peminpin keluarga bapak arah suku Lewi, menurut silsilah kalak e.+
26 Enda ndai me silsilah Harun ras Musa. Perentahken Jahwe kalak e guna maba kalak Israel ndarat arah Mesir nari bali bagi pasuken prajurit.+
27 Musa ras Harun me si njumpai raja Mesir guna maba kalak Israel ndarat arah Mesir nari.+
28 Sanga ngerana Jahwe man Musa i negri Mesir,
29 nina Jahwe man Musa, “Aku kap Jahwe. Kataken man raja Mesir e, kerina si enggo Kukataken man bandu.”
30 Kenca si e nina Musa man Jahwe, “La mungkin begiken raja e aku, perban aku la lancar ngerana.”+
