Keluaren 7:1-25
7 Kenca si e nina Jahwe man Musa, “Enggo Kuban kam bali bagi Dibata* man raja Mesir janah Harun seninandu Kuban jadi nabindu.+
2 Pesehlah man Harun seninandu kerina si enggo Kukataken man bandu, ia pagi si ngerana man raja Mesir. Dungna bere raja pagi kalak Israel ndarat arah negrina.
3 Kupediat pagi mekeng ukur raja Mesir,+ Kuban pagi reh buena mukjizat i negri Mesir.+
4 Tapi labo pagi begiken raja e kena. Kupake tanKu si erkuasa ngelawan Mesir, Kubaba pagi umatKu Israel ndarat i je nari bali bagi pasuken prajurit. Kuhukum pagi Mesir alu hukumen si mberat.+
5 Sanga Kugunaken pagi kuasaKu ngelawan Mesir janah Kubaba kalak Israel ndarat arah tengah-tengah kalak Mesir, itehna pagi maka Aku kap Jahwe.”+
6 Lakoken Musa ras Harun tepat bagi si perentahken Jahwe.
7 Sanga jumpai kalak e raja Mesir,+ umur Musa 80 tahun janah umur Harun 83 tahun.
8 Nina Jahwe man Musa ras Harun,
9 “Adi suruh raja Mesir pagi kena erban mukjizat, kataken man Harun gelah benterkenna tongkatna i lebe-lebe raja. Berubah pagi tongkat e jadi nipe si galang.”+
10 Emaka lawes Musa ras Harun ndahi raja Mesir, janah lakoken kalak e tepat bagi si perentahken Jahwe. Benterken Harun tongkatna i lebe-lebe raja ras pejabat-pejabatna, janah berubah tongkat e jadi nipe si galang.
11 Tapi lebuh raja kalak si beluh, tukang sihir, bage pe kalak si make ilmu gaib si lit i Mesir+ janah alu ilmu kalak e ibanna ka bage.+
12 Kerina kalak e mbenterken tongkatna ku teruh janah berubah tongkat kalak e jadi nipe si galang. Bendut nipe* Harun nipe* kalak e.
13 Tapi lalap mekeng ukur raja e+ janah la begikenna kalak e pas bagi si enggo ikataken Jahwe.
14 Kenca si e nina Jahwe man Musa, “Raja Mesir e kalakna mekeng.+ Labo pagi pediatna umatKu lawes.
15 Pagi erpagi-pagi, timaindu raja e i tepi Lau Nil sebap lawes pagi ia ku je, gelah banci kam jumpa ras ia. Baba tongkatndu si berubah jadi nipe ndai.+
16 Arus katakenndu man bana, ‘Jahwe Dibata kalak Heber enggo nuruh aku njumpai kam,+ janah nina, “Pediatlah umatKu lawes gelah banci layani kalak e Aku i taneh mesawang.”* Tapi seh asa gundari lalap la patuhindu.
17 Bagenda nina Jahwe, “Tehndu pagi maka Aku kap Jahwe.+ Kupekpek pagi Lau Nil e alu tongkatKu, jenari berubah pagi lau e jadi dareh.
18 Maten pagi ikan-ikan si lit bas Lau Nil e janah bau macik pagi lau e. Kalak Mesir pe lanai pagi banci minem arah Lau Nil nari.”’”
19 Kenca si e nina Jahwe man Musa, “Bagendalah nindu man Harun, ‘Buat tongkatndu janah arahken ku kerina mata lau si lit i Mesir,+ ku launa si maler, ku saluren launa,* ku kolamna,+ bage pe ku ingan nampung launa.’ Kerina lau si lit i Mesir berubah pagi jadi dareh, termasuk lau si lit bas ingan si iban arah kayu ras batu nari.”
20 Mis lakoken Musa ras Harun bagi si perentahken Jahwe. Angkat Harun tongkatna i lebe-lebe raja ras pejabat-pejabatna, janah pekpekna Lau Nil e. Berubah kerina lau e jadi dareh.+
21 Maten ikan-ikan si lit bas lau e+ janah lau e pe bau macik. Lanai banci inem kalak Mesir lau arah Lau Nil+ janah kerina lau bas negri Mesir berubah jadi dareh.
22 Tapi kalak si make ilmu gaib si lit i Mesir pe banci ngelakoken si bage alu ilmu rahasia kalak e.+ Emaka tetap mekeng ukur raja, janah la begikenna Musa ras Harun pas bagi si enggo kataken Jahwe.+
23 Emaka mulih raja ku istanana janah sitik pe la ukurina kerna kerina si terjadi e.
24 Emaka kerina kalak Mesir nggali taneh si lit i sekeliling Lau Nil guna ndarami lau si banci iinem, perban lanai banci inem kalak e lau si arah Lau Nil nari.
25 Pitu wari dekahna iban Jahwe Lau Nil berubah jadi dareh.
Cataten i teruh
^ Ntah “kam jadi Dibata.”
^ As. “tongkat.”
^ As. “tongkat.”
^ Taneh si mbelang si jarang iingani.
^ Maksudna, lau si maler arah Lau Nil nari.
