Keluaren 8:1-32
8 Kenca si e nina Jahwe man Musa, “Jumpailah raja Mesir, kataken man bana, ‘Bagenda nina Jahwe, “Pediatlah umatKu lawes gelah banci layani kalak e Aku.+
2 Adi la pediatndu kalak e lawes, Kuhukum janah Kuban pagi kerina negri Mesir dem alu katak.+
3 Dem pagi Lau Nil alu katak janah ndaraten katak arah lau e, jenari masuk ku rumahndu, ku kamarndu, ku ingan medemndu, ku rumah pejabat-pejabatndu ras rumah rakyatndu, ku inganndu manggang roti, bage pe ku baskom-baskom inganndu erban adonen roti.+
4 Serbu katak-katak e pagi kam ras pejabat-pejabatndu bage pe rakyatndu.”’”
5 Kenca si e nina Jahwe man Musa, “Kataken man Harun, ‘Angkat tongkatndu, arahken ku kerina lau maler, saluren-saluren Lau Nil, ras kolam-kolam, gelah ndaraten katak-katak e janah serbuna negri Mesir.’”
6 Emaka angkat Harun tongkatna janah arahkenna ku kerina lau si lit i Mesir, jenari mulai ndaraten katak-katak e janah tutupina kerina negri Mesir.
7 Tapi tukang sihir si lit i Mesir pe banci erban si bage alu ilmu rahasia kalak e. Emaka iban kalak e ka ndaraten melala katak nutupi negri Mesir.+
8 Kenca si e, lebuh raja me Musa ras Harun janah nina, “Pindolah man Jahwe gelah pelawesNa katak-katak e arah aku nari bage pe arah rakyatku nari.+ Kupediat pagi kalak Israel lawes gelah banci persembahkenna korban man Jahwe.”
9 Nina Musa man raja, “Ue, banci kupindoken man Dibata gelah pelawesNa katak-katak e arah kam nari, arah pejabat-pejabatndu, arah rakyatndu, bage pe arah kerina rumahndu. Bas Lau Nil ngenca pagi lit katak-katak e. Ndigan kin atendu kupindoken kerna si e?”
10 Megi si e, nina raja, “Pagi.” Emaka nina Musa, “Terjadi pagi bagi si katakenndu e, jenari tehndu pagi maka la lit si bali bagi Jahwe Dibata kami.+
11 Lawes pagi katak-katak e arah kam nari, arah kerina rumahndu, arah pejabat-pejabatndu, bage pe arah rakyatndu. Bas Lau Nil ngenca pagi lit katak-katak e.”+
12 Tadingken Musa ras Harun me raja, janah pindo Musa man Jahwe gelah pelawesNa katak-katak si banNa nyerbu raja.+
13 Ban Jahwe bagi si pindoken Musa janah maten katak-katak si lit bas rumah-rumah, i halamen, bage pe si lit i juma-juma.
14 Emaka pepulung kalak Mesir bangke katak-katak e seh asa ergun-gun janah bau macik negri e.
15 Tapi sanga idah raja lanai lit katak-katak e, mulihken ka mekeng ukurna+ janah la begikenna Musa ras Harun, pas bagi si enggo kataken Jahwe.
16 Nina Jahwe man Musa, “Kataken man Harun, ‘Angkat tongkatndu, pekpekken ku taneh jenari berubah pagi abu si lit i belang-belang negri Mesir jadi rengit.’”*
17 Lakoken kalak e bage. Angkat Harun tongkatna janah pekpekkenna ku taneh jenari kerina abu si lit i belang-belang Mesir berubah jadi rengit.*+ Emaka serbu rengit e manusia ras binatang.
18 Cubaken kalak si make ilmu gaib e ka erban si bage alu ilmu rahasiana,+ tapi la banci. Terus serbu rengit* e manusia ras binatang.
19 Emaka nina kalak si make ilmu gaib e man raja, “Enda pasti perban kuasa* Dibata!”+ Tapi ukur raja lalap mekeng janah la ia nggit megiken Musa ras Harun, pas bagi si enggo kataken Jahwe.
20 Kenca si e nina Jahwe man Musa, “Pagi lampas kam medak janah laweslah kam ku Lau Nil perban reh pagi raja ku je. Arus katakenndu, ‘Bagenda nina Jahwe, “Pediatlah umatKu lawes gelah banci layani kalak e Aku.
21 Tapi adi la pediatndu umatKu lawes, Kuban pagi laneng* nyerbu kam, pejabat-pejabatndu, rakyatndu, bage pe kerina rumahndu. Melala pagi laneng bas kerina rumah si lit i Mesir janah tutupi laneng pagi taneh kalak Mesir.
22 Paksa si e Kulindungi pagi daerah Gosen, ingan umatKu tading. La pagi lit laneng i je.+ Alu bage tehndu pagi maka Aku eme Jahwe lit bas negri enda.+
23 Beda pagi Kuban keadan umatKu ras rakyatndu. Pagi me terjadi mukjizat* e.”’”
24 Emaka lakoken Jahwe bagi si katakenNa ndai. Melala kel laneng nyerbu istana raja, rumah pejabat-pejabatna, bage pe kerina negri Mesir.+ Ceda negri e iban laneng-laneng e.+
25 Dungna lebuh raja me Musa ras Harun, janah nina, “Ban dage persembahen man Dibata kena, tapi bas negri enda.”
26 Tapi nina Musa, “La banci. Perban persembahen si nandangi bereken kami man Jahwe Dibata kami, banci erban nembeh ate kalak Mesir.+ Adi persembahken kami korban e i lebe-lebe kalak Mesir, pasti benterina pagi kami alu batu.
27 Arus kami lawes ku taneh mesawang* janah i je persembahken kami pagi korban man Jahwe Dibata kami, bagi si perentahkenNa man kami.+ Lit pagi telu wari dekahna maka kami seh i jah.”
28 Jenari nina raja, “Kupediat kena lawes mpersembahken korban man Jahwe Dibata kena i taneh mesawang.* Tapi ula kena ndauhsa lawes. Banlah pemindon man Dibata kena guna kepentingenku.”+
29 Nina Musa, “Kenca lawes pagi aku jenda nari, kuban pemindon man Jahwe. Pagi, kerina laneng e pasti enggo lawes arah istanandu, arah rumah pejabat-pejabatndu, bage pe arah rumah rakyatndu. Tapi ula nai tipundu* kami. Pediatlah kami lawes guna mpersembahken korban man Jahwe.”+
30 Lawes Musa nadingken raja Mesir jenari banna pemindon man Jahwe.+
31 Emaka ban Jahwe bagi si pindoken Musa. Lawes kerina laneng e arah istana raja, arah rumah pejabat-pejabatna, bage pe arah rumah rakyatna. La lit sada pe si tading.
32 Tapi, mulihken ka mekeng ukur raja janah la berena kalak Israel lawes.
Cataten i teruh
^ Ntah “agas.”
^ Ntah “agas.”
^ Ntah “agas.”
^ As. “jari.”
^ Laneng enda banci ngkarat.
^ As. “tanda.”
^ Taneh si mbelang si jarang iingani.
^ Taneh si mbelang si jarang iingani.
^ Ntah “ipermainkenndu.”
