Keluaren 9:1-35
9 Emaka nina Jahwe man Musa, “Jumpailah raja Mesir, kataken man bana, ‘Bagenda nina Jahwe Dibata kalak Heber, “Pediatlah umatKu lawes gelah banci layani kalak e Aku.+
2 Tapi adi la pediatndu kalak e lawes janah lalap halangindu,
3 Kuserang pagi asuh-asuhenndu. Kena penakit si mekelek pagi kerina kudandu, keledendu, untandu, lembundu, kambingndu, ras biri-birindu. Aku kap Jahwe.+
4 Kuban pagi bedana asuh-asuhen kalak Israel ras asuh-asuhen kalak Mesir. La pagi lit sada pe asuh-asuhen kalak Israel si mate.+ Aku kap Jahwe.”’”
5 Enggo tetapken Jahwe ndigan lakokenNa si e. Nina Jahwe, “Pagi, Kulakoken e bas negri enda.”
6 Paginna, ban Jahwe bagi si katakenNa. Mate kerina asuh-asuhen kalak Mesir,+ tapi asuh-asuhen kalak Israel la lit si mate.
7 Suruh raja anak buahna nungkun kai si terjadi, jenari tehna maka la lit sada pe asuh-asuhen kalak Israel si mate. Tapi ukur raja Mesir lalap mekeng janah la pediatna kalak Israel lawes.+
8 Kenca si e nina Jahwe man Musa ras Harun, “Demi duana tan kena alu abu dapur, janah i lebe-lebe raja pagi, arus benterken Musa abu e ku datas.
9 Merap pagi abu e ku belang-belang Mesir. Adi kena abu e ku manusia ras binatang, berubah abu e jadi bisul si ernanah.”
10 Emaka buat kalak e abu dapur ndai. Benterken Musa abu e ku datas, i lebe-lebe raja. Berubah abu e jadi bisul si ernanah adi kena ku manusia ras binatang.
11 Kalak si make ilmu gaib i Mesir la banci njumpai Musa, perban kalak e pe kena bisul bagi kalak Mesir si debanna.+
12 Tapi pediat Jahwe mekeng ukur raja, emaka la begikenna Musa ras Harun, pas bagi si enggo kataken Jahwe.+
13 Kenca si e nina Jahwe man Musa, “Lampas kam pagi medak janah jumpai raja Mesir. Kataken man bana, ‘Bagenda nina Jahwe Dibata kalak Heber, “Pediatlah umatKu lawes gelah banci layani kalak e Aku.
14 Adi la pediatndu, Kuban pagi bencana man bandu, man pejabat-pejabatndu, bage pe man rakyatndu. Alu bage tehndu maka la lit si bagi Aku i doni enda.+
15 Situhuna banci Kupake kuasaKu guna ngukum kam ras rakyatndu alu penakit si mekelek. Alu bage masap kena arah doni enda nari.
16 Tapi, Kupediat kam tetap nggeluh gelah banci Kucidahken kuasaKu man bandu, gelah itandai kalak gelarKu i belang-belang doni.+
17 Tetap denga nge kam sombong janah la pediatndu umatKu lawes?
18 Pagi, kira-kira bas waktu si bagenda, Kupenusur pagi udan es si luar biasa si lenga pernah terjadi bas sejarah Mesir.
19 Suruhlah gelah asuh-asuhenndu bage pe erta-ertandu si lit i darat ibaba ku ingan si aman. Jelma ntah pe binatang si tetap tading i darat janah la ibaba ku ingan si aman pasti mate sanga nusur udan es e.”’”
20 Piga-piga pejabat raja mbiar man Jahwe janah mis baba kalak e pelayan-pelayanna ras asuh-asuhenna ku ingan si aman.
21 Tapi lit ka si la diatena kata-kata Jahwe janah pediat kalak e pelayan-pelayanna ras asuh-asuhenna tetap i darat.
22 Jenari nina Jahwe man Musa, “Angkat tanndu, arahken ku langit gelah nusur udan es ku kerina daerah i Mesir,+ ku kerina jelma, binatang, ras sinuan-sinuan si lit i darat.”+
23 Emaka angkat Musa tongkatna ku arah langit. Kenca si e iban Jahwe lenggur ras udan es bage pe api* nusur ku doni. Terus ban Jahwe nusur udan es i negri Mesir.
24 Luar biasa kel udan es e janah lit api si erndilap-ndilap radu ras udan es e. Bas sejarah Mesir lenga pernah terjadi si bage.+
25 Kai pe si lit i darat bas negri Mesir hancur iban udan es e. Mate kerina jelma, binatang, sinuan-sinuan, bage pe batang-batang kayu si lit i darat.+
26 Bas ingan tading kalak Israel ngenca la lit nusur udan es, eme i taneh Gosen.+
27 Emaka suruh raja kalak ngelebuh Musa ras Harun janah nina, “Sekalenda, ngaku salah aku. Jahwe nge si benar. Aku ras rakyatku kap si salah.
28 Pindokenlah man Jahwe gelah pengadiNa lenggur ras udan es e. Kenca si e kupediat pagi kena lawes, lanai padah terdekahen kena tading i jenda.”
29 Nina Musa man bana, “Kenca ndarat pagi aku arah kota enda, ertoto pagi aku* man Jahwe. Ngadi pagi lenggur ras udan es e. Alu bage tehndu pagi maka Jahwe kap si mpuna doni enda.+
30 Amin pe bage, enggo nge kuteh, kam ras pejabat-pejabatndu labo pagi mbiar man Dibata Jahwe.”
31 Ceda me sinuan-sinuan rami* ras barli, perban paksa si e, barli sangana erbuah ras rami sangana erbunga.
32 Tapi gandum* la ceda, perban lenga waktuna erbuah.*
33 Lawes Musa arah kota e nari nadingken raja. Kenca si e ertoto ia man Jahwe alu ngangkat tanna janah ngadi udan ndai, lenggur, ras udan es e.+
34 Sanga idah raja enggo ngadi udan, lenggur, ras udan es e, mulihken ka mekeng ukurna+ bage pe ukur pejabat-pejabatna. Mulihi ka kalak e ngelakoken dosa.
35 Ukur raja tetap mekeng janah la pediatna kalak Israel lawes, bagi si enggo kataken Jahwe man Musa.+
Cataten i teruh
^ Mungkin maksudna kilap si luar biasa.
^ As. “kuangkat kari tanku.”
^ Sinuan si ipake kalak Mesir guna erban kain linen.
^ As. “gandum ras gandum spelta.” Gandum spelta eme salah sada jenis gandum si kurang jilena.
^ Ntah “perban pudin rani.”
