Ketangkasen 13:1-18
13 Naga e tetap tedis i pantai.
Kenca si e, kuidah sada binatang buas+ ndarat arah laut nari.+ Lit sepuluh tandukna, pitu takalna. Tiap tanduk lit sada mahkotana, bas tiap takal lit tertulis gelar-gelar si erban Dibata ihina.
2 Binatang buas e kuidah bagi arimo tultul, tapi nahena bagi nahe beruang, babahna bagi babah singa. Ibereken naga e+ man bana gegehna, tahtana, ras kuasana si mbelin.+
3 Kuidah lit sada takalna bagi pernah luka parah, tapi luka si maba kematen e enggo malem.+ Kerina kalak i doni jengang ras ngikutken ia.
4 Sembah kalak e naga ndai sebap enggo berekenna kuasa man binatang buas e. Sembah kalak e ka binatang buas e, janah nina, “Ise kin si seri ras binatang buas e? Ise kin si ngasup erperang ngelawan ia?”
5 Binatang buas e dat kuasa gelah banci sombong janah banci hinana Dibata, ras ate-atena ngelakoken kai pe sedekah 42 bulan.+
6 Bukana babahna janah hinana+ Dibata, gelarNa, inganNa tading, bage pe kerina si tading i surga.+
7 Ipediat ia erperang ngelawan ras naluken kalak si badia.+ Man bana ibereken kuasa man tiap suku, umat, bahasa, ras bangsa.
8 Kerina manusia si tading i doni, sembahna pagi binatang buas e. Mulai kin doni enda ijadiken,* la lit sada pe gelar kalak e itulis bas buku kegeluhen+ si lit bas Anak Biri-Biri si enggo igeleh e.+
9 Ise pe si ercuping, begikenlah.+
10 Adi lit kalak si arus itaban, itabanlah ia. Adi lit kalak si munuh alu pedang,* pasti ia ibunuh alu pedang.+ E me sebapna kalak si badia+ arus setia*+ janah erkiniteken.+
11 Kuidah sada binatang buas si deban ndarat arah doni nari. Lit dua tandukna bagi tanduk anak biri-biri, pengeranana bagi naga.+
12 Pakena kuasa arah binatang buas si pertama ndai+ i lebe-lebe binatang e. Banna kerina kalak i doni nembah binatang si pertama si enggo malem arah lukana si parah.+
13 Banna mukjizat-mukjizat si luar biasa janah penusurna ka api langit nari ku doni i lebe-lebe kerina manusia.
14 Ipediat ia erban mukjizat-mukjizat i lebe-lebe binatang buas e, guna nipu kerina kalak i doni. Suruhna ka ban kalak e patung+ binatang buas si ilukai alu pedang janah gundari enggo malem.+
15 Ipediat ia mereken kesah man patung binatang buas e, gelah patung e banci ngerana ras mereken perentah guna munuh kerina kalak si la nggit nembah man bana.
16 Kerina jelma ipaksana ngaloken tanda bas tan kanan kalak e ntah pe bas perdempaken kalak e,+ eme kalak si biasa-biasa saja, kalak si penting, kalak bayak, kalak mesera, kalak si bebas, ntah pe budak.
17 Ise pe la banci nukur ntah pe ndayaken, selain kalak si lit tandana e, eme gelar+ binatang buas ntah pe nomor si ngertiken gelarna.+
18 Ise pe si beluh, hitungna min nomor binatang buas e, sebap e nomor manusia, janah nomorna e 666.+ Kalak si beluh ngenca si banci ngangkaisa.
Cataten i teruh
^ Maksudna, kenca anak-anak Adam ras Hawa lahir.
^ Ntah “megenggeng.”
^ Ntah banci saja “Ise pe si ibunuh alu pedang.”
