Ketangkasen 16:1-21
16 Kubegi sora si megang arah ingan si badia+ nari ngerana man pitu malekat, “Laweslah, amburken ku doni isi pitu mangkok rawa Dibata.”+
2 Lawes malekat si pertama, amburkenna isi mangkokna ku doni.+ Emaka kalak si lit bas ia tanda binatang buas+ ras kalak si nembah patungna+ kena bisul si parah si seh kel suina.+
3 Amburken malekat si peduaken isi mangkokna ku laut.+ Emaka berubah laut e jadi dareh,+ bagi dareh kalak si ibunuh. Kerina si nggeluh bas laut mate.+
4 Amburken malekat si peteluken isi mangkokna ku lau maler bage pe ku sumber-sumber lau.+ Emaka kerina berubah jadi dareh.+
5 Kubegi ngerana malekat si erkuasa man lau e nina, “O Kam si setia,+ si lit gundari, ras mbarenda nari pe enggo lit,+ adil kap Kam perban enggo banNdu keputusen enda.+
6 Amburken kalak e dareh kalak si badia ras nabi-nabi,+ emaka banNdu kalak e nginem dareh,+ si e patut aloken kalak e.”+
7 Kubegi sora arah ingan nutung* persembahen nari, nina, “Payo, o Dibata Jahwe,*+ keputusenNdu benar ras adil kap.”+
8 Amburken malekat si peempatken isi mangkokna ku matawari,+ matawari e ipediat nutung manusia alu api.
9 Meseng manusia perban lasna. Kalak e la ertobat tapi hinana gelar Dibata janah la muliakenna Dibata si erkuasa man bencana-bencana e.
10 Amburken malekat si pelimaken isi mangkokna ku tahta binatang buas e. Emaka kerajan binatang e jadi gelap+ janah karat manusia dilahna perban suina kapna.
11 Hina kalak e Dibata si i surga perban suina kapna ras perban bisul-bisulna. Tapi, la kalak e ertobat arah perbahanenna.
12 Amburken malekat si peenemken isi mangkokna ku lau si galang e eme Lau Eprat,+ emaka kerah lau e+ guna nikapken dalan man raja-raja+ si reh arah timur* nari.
13 Lit kuidah naga,+ binatang buas, bage pe nabi palsu. Masing-masing arah babahna ndarat kata-kata najis.* Teluna kata-kata najis e bagi katak.
14 Situhuna, kata-kata najis e rehna arah malekat-malekat jahat janah ibegi raja-raja si lit i belang-belang doni. Ban kata-kata e melala mukjizat+ gelah pulung raja-raja e guna erperang+ bas wari si mbelin eme wari Dibata Si Madakuasa.+
15 “Nenlah! Reh pagi aku bagi pinangko.+ Ermeriah ukur kalak si tetap sadar,+ janah bajuna si arah darat la buat kalak, gelah sanga idah kalak ia erdalan, la ia tilanjang janah la lit si man kemelankenna.”+
16 Emaka raja-raja e ipepulung ku ingan si igelari bas bahasa Heber, Harmagedon.*+
17 Amburken malekat si pepituken isi mangkokna ku udara. Jenari terbegi sora arah ingan si badia nari,+ arah tahta e, nina, “Enggo dung!”
18 Emaka teridah kilap, terbegi sora-sora, bage pe sora lenggur, janah terjadi gempa si seh kel gegehna, si lenga pernah terjadi mulai kin manusia lit i doni.+
19 Kota si mbelin+ pecah jadi telu, janah kota-kota si lit bas bangsa-bangsa pe jadi hancur. Jenari Babilon si Mbelin+ iinget Dibata, janah bereNa ia calung* si isina anggur rawaNa si mbelin.+
20 Kerina pulau ras gunung bene.+
21 Jenari nusur udan batu es si luar biasa si engkenai manusia.+ Berat tiap batu es e kira-kira 20 kilo.* Hina kalak Dibata perban bencana udan es+ si luar biasa e.
Cataten i teruh
^ Ntah “matawari terbit.”
^ As. “roh najis.”
^ Ntah “Armagedon.” Arah bahasa Heber si ertina, “Gunung Megido.”
^ Ntah “cangkir.”