Ketangkasen 17:1-18
-
Hukumen man “Babilon si Mbelin” (1-18)
17 Sada arah pitu malekat si maba pitu mangkok e+ reh janah ngerana man bangku, “Mari, kucidahken man bandu hukumen man pelacur si mbelin si kundul i datas lau si melala.+
2 Raja-raja i doni ngelakoken perbahanen seks si salah*+ ras pelacur si mbelin e. Kalak si tading i doni pe mabuk perban anggurna, eme perbahanen seksna si salah.”*+
3 Alu kesah si badia baba malekat e aku ku taneh mesawang.* Kuidah sekalak diberu kundul i datas binatang buas e si warnana megara bagi api, lit pitu takal binatang e ras sepuluh tandukna. Bas dagingna dem gelar-gelar si erban Dibata ihina.
4 Uis diberu e warnana ungu+ ras megara bagi api. Pakena emas, batu permata, ras mutiara.+ Bas tanna lit cangkir emas si dem alu kai si erban ciga ate bage pe si najis arah perbahanen seksna si salah.*
5 Bas perdempakenna lit tertulis sada gelar si rahasia: “Babilon si Mbelin, nande kerina pelacur+ ras kerina si erban ciga ate i doni.”+
6 Kuidah diberu e mabuk perban dareh kalak si badia ras dareh saksi-saksi Jesus.+
Mamang kel teku ngidah ia.
7 Nina malekat e man bangku, “Engkai maka mamang tendu? Kukataken man bandu rahasia diberu e+ ras binatang buas si maba diberu e, binatang si pitu takalna ras sepuluh tandukna ndai:+
8 Binatang buas si idahndu e, enggo pernah lit mbarenda, janah gundari lanai lit. Tapi ntisik nari, minter ia ndarat arah lubang si seh kel bagesna,*+ jenari ikernepken. Kemamangen pagi kalak si tading i doni, si gelarna la itulisken bas buku kegeluhen,+ si enggo lit mulai kin doni enda ijadiken,* perban binatang buas e enggo lit mbarenda, gundari lanai lit, tapi nandangi lit ka.
9 “Bas si e perlu kepentaren ras kebeluhen: Pitu takal+ ertina pitu gunung, janah diberu e kundul i datasna.
10 Lit pitu raja: Lima enggo ndabuh, sekalak lit denga, janah sekalak nari lenga reh. Tapi adi reh ia, ntisik ngenca ia lit.
11 Binatang buas e si mbarenda enggo pernah lit tapi gundari lanai lit,+ eme raja si pewaluhken. Asalna arah raja si pitu ndai. Dungna binatang buas e ikernepken.
12 “Sepuluh tanduk si idahndu e, ertina sepuluh raja si lenga merentah, tapi aloken kalak e pagi kuasa guna merentah jadi raja-raja radu ras binatang buas e sedekah sada jam.
13 Sepuluh raja e, sada kerina tujunna. Kerina ia mereken gegehna ras kuasana man binatang buas e.
14 Erperang pagi kalak e ngelawan Anak Biri-Biri e,+ tapi taluken Anak Biri-Biri e pagi kalak e,+ perban ia kap Tuan kerina tuan ras Raja kerina raja.+ Kalak e pe italuken kalak si radu ras Anak Biri-Biri e, eme kalak si idilo, si ipilih, ras si setia.”+
15 Ngerana ka malekat e man bangku, “Kerna lau si idahndu, lau si jadi ingan pelacur e kundul, ertina erbage-bage bangsa, rakyat, suku, ras bahasa.+
16 Sepuluh tanduk+ si idahndu e ras binatang buas e,+ rate segat pagi man pelacur e,+ janah rampasna kerina si lit bas ia, tilanjangina, panganina dagingna, janah tutungna ia alu api seh ngasa keri.+
17 Si enda terjadi perban enggo tamaken Dibata bas pusuh kalak e sura-sura guna ndalanken peraten Dibata.+ Ban Dibata kalak e ngelakoken tujun si seri eme mereken kerajan kalak e man binatang buas e,+ ngasa seh kai si enggo kataken Dibata.
18 Diberu+ si idahndu e ertina kota si mbelin si nguasai raja-raja i doni.”
Cataten i teruh
^ Taneh si mbelang si jarang iingani.
^ Maksudna, kenca anak-anak Adam ras Hawa lahir.