Ketangkasen 18:1-24
18 Kenca si e, kuidah sada malekat nusur surga nari. Bas ia lit kuasa si mbelin janah terangina doni alu kemulianna.
2 Alu sora megang ngerana ia, nina, “Enggo ndabuh ia! Babilon si Mbelin enggo ndabuh!+ Ia jadi ingan tading malekat-malekat jahat, ingan roh* si najis, janah ingan kerina perik si najis ras si erban segat ate!+
3 Si e terjadi perban anggurna eme napsuna guna ngelakoken perbahanen seks si salah.*+ Kerina raja-raja i doni ngelakoken perbahanen seks si salah ras ia,+ kalak si erbinaga* i doni jadi bayak perban barang-barang mewah si pepulungna alu la meteh mela.”
4 Kenca si e, kubegi sora si deban langit nari, nina, “Ndaratlah, o umatKu!+ Ndaratlah je nari, adi la ate kena ikut bas dosa-dosana, adi la ate kena ngaloken bencana-bencanana.+
5 Sebap dosa-dosana enggo ergun-gun seh ku langit,+ janah inget Dibata kerina perbahanenna si jahat.+
6 Banlah man bana bagi si lakokenna man kalak si deban,+ balaslah dua kali lipat.+ Berekenlah man bana inemen dua kali lipat lebih keras, tama ku bas cangkir+ si enggo isikapkenna guna ncampur inemen.+
7 Perban muliakenna bana janah mewah pergeluhna ras la tehna mela, emaka arus adapina kiniseran ras ceda ate. Sebap katawari pe nina bas pusuhna, ‘Aku enda ratu, aku labo janda, ndigan pe labo kuidah kiniseran.’+
8 E me sebapna bas sada wari reh man bana bencana-bencana eme kematen, ate ceda, ras kelihen. Itutung pagi ia seh asa keri,+ perban Dibata Jahwe* si ngakimi ia e megegeh.+
9 “Sanga idah raja-raja i doni asap api si nutung ia, tangis raja-raja e, pekpekina bana perban cedana atena. Pernah kalak e ras ngelakoken perbahanen seks si salah* janah mewah pergeluhna.
10 Tedis raja-raja e dauh-dauh nari perban mbiar kalak e ihukum bagi ia. Nina, ‘Andiko! Mekuah naring kel ate, seh kel ate mekuahna, o Babilon kota si mbelin+ ras megegeh. Bas sada jam saja, enggo seh hukumenndu!’
11 “Kalak si erbinaga* i doni pe erceda ate janah tangisina ia, perban lanai lit si mborong barang si dayakenna:
12 eme kerina emas, pirak, batu permata, mutiara, kain linen, kain si warna ungu, kain sutra, bage pe kain si warna megara bagi api. Kai pe si iban arah kayu si merim nari, arah gading, arah kayu si merga, arah tembaga, arah besi, bage pe arah marmar nari.
13 Bage ka pe, kulit manis, rempah ratus India, kemenyan, minak wangi, kemenyan mbentar, anggur, minak saitun, tepung halus, gandum, lembu, biri-biri, kuda, gereta, budak, ras manusia.
14 Lanai pagi lit buah-buahen si merhat kam. Kerina pangan si entabeh ras barang-barang si mejile pe enggo lanai lit, janah ndigan pe lanai datndu mulihi.
15 “Perbinaga* si ndayaken barang-barang e enggo bayak perban diberu e. Tedis kalak e dauh-dauh nari perban mbiar kalak e ihukum bagi diberu e. Tangis kalak e ras ceda atena,
16 nina, ‘Andiko! Mekuah naring kel ate, seh kel ate mekuahna, o kota si mbelin! Mbarenda pakendu linen si halus, kain si warna ungu, kain si warna megara bagi api, janah melala pakendu perhiasen mewah si iban arah emas nari, batu permata, bage pe mutiara.+
17 Tapi bas sada jam saja, kerina kebayakenndu si seh kel buena enggo ikernepken!’
“Kerina kapten kapal, penumpang-penumpang, ras pegawai-pegawai kapal, bage pe kerina si pencarinna arah laut nari, tedis dauh-dauh nari,
18 sanga idah kalak e asap api si nutung diberu e, nina alu sora megang, ‘Kota si apai kin si bagi kota si mbelin e?’
19 Amburken kalak e abu ku takalna, tangis kalak e ras ceda atena, nina, ‘Andiko! Mekuah naring kel ate, seh kel ate mekuahna, o kota si mbelin! Kota si erbanca bayak kerina kalak si lit kapalna erlayar ku laut perban kebayaken kota e. Tapi bas sada jam saja, kam enggo ikernepken!’+
20 “O surga,+ bage pe kena kalak si badia,+ rasul-rasul, ras nabi-nabi, ermeriah ukurlah perban enggo ihukum Dibata diberu e guna kena!”+
21 Kenca si e, lit sada malekat si megegeh ngangkat sada batu si bagi batu penggilingen si galang, jenari benterkenna ku laut, nina, “Bagenda pagi terna kota Babilon si mbelin e ibenterken ku teruh, asa ndigan pe ia lanai lit.+
22 O kam Babilon, asa ndigan pe lanai terbegi arah kam sora kalak si rende alu harpa,* kalak si main musik, kalak si ngembus suling ntah pe trompet. Lanai pagi lit sekalak pe si erdahin, ras sora batu penggilingen si galang pe lanai pagi ibegi.
23 Lanai pagi lit lampu si nerangi kam, lanai pagi terbegi sora penganten dilaki ras penganten diberu arah kam nari. Perbinagandu* eme kalak si meganjang pangkatna bas doni enda, janah kerina bangsa-bangsa itipundu alu ilmu sihirndu.+
24 Payo, bas diberu e idapeti dareh nabi-nabi, kalak si badia,+ bage pe kerina kalak si enggo ibunuh i doni enda.”+
Cataten i teruh
^ Ntah banci saja “kesah; udara; kata-kata.”
^ Ntah “janah saudagar-saudagar.”
^ Ntah “Saudagar-saudagar.”
^ Ntah “Saudagar-saudagar.”
^ Harpa eme alat musik si ersenar bagi gitar, tapi bentukna beda.
^ Ntah “Saudagar-saudagarndu.”
