Ketangkasen 2:1-29
2 “Man malekat+ runggun i Epesus,+ tulislah bagenda: Enda kata arah ia nari, si njemak pitu bintang alu tan kananna, si erdalan i tengah-tengah pitu nahe lampu emas e:+
2 ‘Kuteh kai si enggo lakokenndu, uga kerja kerasndu, ras kesabarenndu. La kam nggit ngaloken kalak jahat. Ujindu kalak si ngaku-ngaku rasul,+ tapi situhuna labo ia rasul, dungna tehndu ia perbual.
3 Adapindu ka melala kiniseran perban gelarku,+ tapi sabar* kam, la kam putus asa.+
4 Amin pe bage, lit kuakap si la payo bas kam, kekelengenndu lanai bagi si tangtangna mbarenda.
5 “‘Emaka inget min uga dauhna kam enggo ndabuh. Ertobatlah kam!+ Lakokenlah bagi si tangtangna lakokenndu mbarenda. Adi la kam ertobat,+ kudahi pagi kam janah kupedauh nahe lampundu+ arah inganna nari.
6 Tapi lit denga si mehuli bas kam: segat tendu perbahanen sekte Nikola.+ Aku pe segat teku sekte e.
7 Ise pe si ercuping, begikenlah kai si kataken kesah si badia man runggun-runggun:+ Man kalak si enggo menang,+ kupediat panna buah batang kayu kegeluhen+ si turah bas pardis Dibata.’
8 “Man malekat runggun i Semirna, tulis bagenda: Enda kata arah ia nari, ‘Si Pertama ras Si Terakhir,’+ si enggo mate tapi enggo nggeluh mulihi:+
9 ‘Kuteh nge kiniseranndu janah kuteh kam kalak mesera, tapi situhuna bayak kap kam.+ Kuteh kam ihina kalak si ngaku kalak Jahudi, tapi situhuna labo ia kalak Jahudi. Kalak e anggota kelompok* Setan.+
10 Ula kam mbiar kerna kiniseran si nandangi adapindu.+ Nenlah! Uji Iblis pagi kena janah piga-piga arah kena nari masukkenna ku penjara. Sepuluh wari dekahna adapi kena kiniseran. Tapi buktikenlah kam setia man bangku amin pe arus mate, janah kubereken man bandu mahkota kegeluhen.+
11 Ise pe si ercuping, begikenlah+ kai si kataken kesah si badia man runggun-runggun: Kalak si menang+ lanai pagi nanamina kematen si peduaken.’+
12 “Man malekat runggun i Pergamon, tulisken bagenda: Enda kata arah ia nari si lit pedangna si gedang, ntelap, janah dua babahna:+
13 ‘Kuteh i ja kam tading, e me bas tahta Setan. Tapi tetap kam setia man bangku*+ janah buktikenndu maka paguh kinitekenndu,+ amin pe saksi si setia eme Antipas,+ enggo ibunuh+ i lebe-lebendu, bas ingan Setan.
14 “‘Amin pe bage, lit kuakap piga-piga si la payo bas kam. Pediatndu piga-piga pengikut ajaren Bilham lit i tengah-tengahndu.+ Bilham mbarenda si ngajari Balak+ gelah mabai kalak Israel erdosa alu man pangan si ipersembahken man berhala, ras alu ngelakoken perbahanen seks si salah.*+
15 Bage ka pe, lit piga-piga bas kam si ngikutken ajaren sekte Nikola.+
16 Emaka ertobatlah! Adi lang, minter kam kudahi janah kulawan kalak si la nggit ertobat e, alu pedang si gedang si ndarat arah babahku nari.+
17 “‘Ise pe si ercuping, begikenlah kai si kataken kesah si badia man runggun-runggun:+ Man kalak si enggo menang+ kubereken man bana manna si terbuni,+ janah kubereken man bana sada batu mbentar si kitik, si enggo itulis alu gelar si mbaru. Selain si ngaloken batu e, ise pe la metehsa.’
18 “Man malekat runggun i Tiatira,+ tulis bagenda: Enda kata arah Anak Dibata nari, si matana ersinar bagi api,+ janah nahena bagi tembaga murni:+
19 ‘Kuteh kai si lakokenndu, kuteh kekelengenndu, kinitekenndu, pelayanenndu, kesabarenndu, bage pe kai si lakokenndu gundari buen asangken si tangtangna mbarenda.
20 “‘Amin pe bage, lit kuakap si la payo bas kam. Pediatndu diberu si bagi Isebel e,+ si ngaku-ngaku nabiah, papak banna budak-budakku alu ajarenna, alu bage lakoken kalak e perbahanen seks si salah,*+ janah panna pangan si enggo ipersembahken man berhala.
21 Enggo kubereken waktu man bana gelah ertobat, tapi la ia nggit ertobat arah perbahanen seks si salah.*
22 Nenlah! Kuban pagi ia sakit parah lanai banci keke. Kalak si erlua-lua ras ia e, pasti dat kiniseran si mbelin adi la kin ia ertobat arah perbahanenna.
23 Kubunuh pagi anak-anakna alu penakit si maba kematen. Alu bage teh kerina runggun maka aku si mereksa pusuh ras perukuren si terbuni. Kubalas pagi kena masing-masing menurut kai si enggo lakoken kena.+
24 “‘Tapi kukataken man kalak si lit i Tiatira, kerina si la ngikutken pengajaren enda, si la nggit meteh kerna kai si igelari “rahasia Setan,”+ kukataken maka lanai kutambahi baban kena.
25 Tapi tetaplah dalanken kai si mehuli si enggo lit bas kena gundari seh asa aku reh pagi.+
26 Man kalak si menang ras kalak si ndalanken perentahku seh ku kedungenna, kubereken pagi bana kuasa guna merentah bangsa-bangsa,+
27 bagi kuasa si enggo kualoken arah Bapakku nari. Permakanina pagi bangsa-bangsa alu tongkat besi.+ Alu bage kalak e bagi kudin taneh si iperperken pagi.
28 Kubere pagi bintang erpagi-pagi man bana.+
29 Ise pe si ercuping, begikenlah kai si kataken kesah si badia man runggun-runggun.’
