Ketangkasen 20:1-15
20 Jenari kuidah sada malekat nusur surga nari janah bas tanna lit kunci lubang si seh kel bagesna*+ bage pe rante si galang.
2 Tangkapna naga e,+ nipe si pertama,+ si igelari Iblis+ ras Setan,+ jenari iiket ia 1.000 tahun dekahna.
3 Kenca si e, benterken malekat e ia ku lubang si seh kel bagesna,*+ tutupna lubang e janah meteraikenna. Alu bage, lanai tipu naga e bangsa-bangsa seh asa dung 1.000 tahun e. Kenca si e, ilepasken ka ia mulihi bas waktu si ntisik.+
4 Jenari kuidah tahta-tahta, janah kalak si kundul i je ibereken kuasa guna ngakimi. Payo, kuidah dareh* kalak si ibunuh* perban mereken kesaksin kerna Jesus ras perban cakapkenna kerna Dibata. Kalak e si la nembah binatang buas ntah pe patungna, janah la aloken kalak e tanda bas perdempaken ntah pe i tanna.+ Kalak e nggeluh mulihi janah merentah jadi raja-raja radu ras Kristus+ sedekah 1.000 tahun.
5 Enda kekeken si pertama.+ (Kalak mate si deban+ la nggeluh mulihi seh asa dung 1.000 tahun e.)
6 Ise pe si ikut bas kekeken si pertama, ermeriah ukur janah badia.+ Kematen si peduaken+ lanai erkuasa man kalak e.+ Kalak e pagi si jadi imam-imam+ Dibata ras imam-imam Kristus. Kalak e merentah jadi raja-raja radu ras Kristus sedekah 1.000 tahun.+
7 Kenca dung si 1.000 tahun e, minter Setan ibebasken arah inganna ipenjaraken.
8 Ndarat ia janah tipuna bangsa-bangsa arah empat ujung doni, eme Gog ras Magog. Pepulungna kalak e guna erperang, teremna kalak e bagi kersik i tepi laut.
9 Merap kalak e ku belang-belang doni janah kepungna kemah kalak si badia bage pe kota si kelengi Dibata. Tapi nusur api langit nari janah keri kalak e tutungna.+
10 Iblis si enggo nipu kalak e, ibenterken ku danau api si lit belerangna. Binatang buas+ bage pe nabi palsu ndai enggo lit i je.+ Kalak e ihukum* suari ras berngi seh rasa lalap.
11 Lit kuidah sada tahta si galang si mbentar warnana, kundul Dibata i je.+ Langit ras doni kiam arah lebe-lebeNa nari,+ i japa pe lanai banci ijumpai.
12 Kuidah kalak si enggo mate, kalak si biasa-biasa saja bage pe kalak si penting tedis i lebe-lebe tahta. Jenari ibuka gulungen-gulungen. Gulungen si deban pe ibuka, eme buku kegeluhen.+ Kalak si mate ihakimi menurut kai si tertulis bas gulungen-gulungen e, menurut perbahanen kalak e.+
13 Emaka ibereken laut kalak mate si lit bas ia, kematen ras Kuburen* pe mereken kalak mate si lit bas ia. Tiap kalak ihakimi menurut perbahanenna masing-masing.+
14 Kenca si e, kematen ras Kuburen* ibenterken ku danau api.+ Danau api enda+ ngertiken kematen si peduaken.+
15 Selain si e, ise pe si gelarna la tertulis bas buku kegeluhen,+ ibenterken ku danau api.+
