Ketangkasen 22:1-21
22 Jenari cidahken malekat e man bangku lau maler eme lau kegeluhen,+ si bersih kel bagi kristal. Lau maler e maler arah tahta Dibata bage pe arah tahta Anak Biri-Biri e+
2 ku tengah-tengah pasar si galang si lit bas kota e. Bas dua tepi lau e lit batang-batang kayu kegeluhen si erbuah 12 kali setahun, eme sebulan sekali. Bulungna ipake mpepalem bangsa-bangsa.+
3 Kota e labo pagi isumpahi Dibata. Tapi tahta Dibata ras tahta Anak Biri-Biri e+ lit bas kota e, janah budak-budak Dibata mereken pelayanen si badia man baNa.
4 Idah kalak e ayoNa,+ gelarNa tertulis bas perdempaken kalak e.+
5 Lanai lit berngi.+ Lanai kalak e perlu lampu bage pe matawari, sebap Dibata Jahwe* si nerangi kalak e,+ kalak e jadi raja seh rasa lalap.+
6 Nina malekat e man bangku, “Kata-kata enda tuhu janah terteki.*+ Payo, Jahwe* Dibata si ngerana arah nabi-nabi+ enggo suruhNa malekatNa ncidahken man budak-budakNa kai si ntisik nari pasti terjadi.
7 ‘Nenlah! Minter aku reh.+ Ermeriah ukur kalak si patuh man kata-kata si lit bas gulungen e.’”+
8 Aku Johanes, si megi ras si ngidah si e kerina. Kenca kubegi ras kuidah, sujud aku nembah malekat si enggo ncidahken kerina si e.
9 Tapi nina man bangku, “Ula! Ula bage! Sembahlah Dibata. Aku pe budak bagi kam ras turang seninandu si jadi nabi-nabi, bage pe kalak si patuh man kata-kata si lit bas gulungen enda.”+
10 Nina ka man bangku, “Ula rahasiaken* nubuat si lit bas gulungen e, perban waktu si itetapken enggo ndeher.
11 Pediatlah kalak si jahat terus ngelakoken kai si jahat, kalak si najis terus ngelakoken kai si najis. Tapi pediatlah kalak si benar terus ngelakoken kai si benar, kalak si badia terus ngelakoken kai si badia.
12 “‘Nenlah! Minter Aku reh, janah Kubaba upah man tiap jelma menurut kai si enggo lakokenna.+
13 Aku kap Alpa ras Omega,*+ si pertama ras si terakhir, si pemena ras si pendungi.
14 Ermeriah ukur kalak si cucina jubahna,+ alu bage lit hakna man buah batang-batang kayu kegeluhen+ janah banci masuk ku kota e arah gerbang-gerbangna.+
15 I darat kota e lit biang* bage pe kalak si ngelakoken perbahanen kai pe si lit hubungenna ras malekat jahat,* si ngelakoken perbahanen seks si salah,* pembunuh, kalak si nembah berhala, ras kerina si nggit erbual ras biasa erbual.’+
16 “‘Aku Jesus, kusuruh malekatku ngataken man kena kerna si e guna kepentingen runggun-runggun. Aku kap keluarga* ras keturunen Daud.+ Aku kap bintang erpagi-pagi si ersinar.’”+
17 Nina kesah si badia ras penganten si diberu e,+ “Marilah!” Ise pe si megisa, katakenna ka min, “Marilah!” Ise pe si muas,+ rehlah ia! Janah ise pe si merhat, banci buatna lau kegeluhen, la perlu nggalar.+
18 “Kukataken man ise pe si megiken nubuat bas gulungen enda: Adi lit si nambahi isina,+ tambahken Dibata man bana bencana-bencana si tertulis bas gulungen e.+
19 Janah adi lit si kurangina isi nubuat si itulis bas gulungen e, labo pediat Dibata ia dat kai si mehuli si enggo itulis bas gulungen e. Labo banci panna buah arah batang-batang kayu kegeluhen+ janah labo ia banci masuk ku kota si badia e.+
20 “Ia si mpeseh kerna si e kerina ngataken, ‘Payo, minter aku reh.’”+
“Amin! Rehlah, Tuan Jesus.”
21 Mbera-mbera kiniulin si luar biasa arah Tuan Jesus lit bas kalak si badia.
Cataten i teruh
^ Ntah “setia.”
^ As. “meteraiken.”
^ Ntah “A ras Z.” Alpa ras Omega eme hurup pertama ras terakhir bas hurup Junani.
^ Maksudna, kalak si terus ngelakoken kai si erban ciga ate Dibata.
^ As. “urat.”
