Ketangkasen 3:1-22
3 “Man malekat runggun i Sardis, tulislah bagenda: Enda kata arah ia, si lit pitu kesah si badia+ ras pitu bintang bas ia:+ ‘Kuteh kai si lakokenndu, gelarna ngenca kam nggeluh tapi situhuna kam mate.+
2 Erjaga-jagalah,+ pegegehi kai si lit denga bas kam, si hampir mate, perban kuidah lenga dungindu pendahin si lakokenndu i lebe-lebe Dibataku.
3 Emaka ingetlah kai si enggo alokenndu ras si begindu. Teruslah patuhi e janah ertobatlah.+ Adi la kam medak, reh pagi aku bagi pinangko+ janah la tehndu ndigan aku reh.+
4 “‘Tapi lit denga piga-piga kalak i Sardis si la erban pakenna najis.+ Erdalan kalak e ras aku alu make paken si mbentar,+ sebap cocok* kalak e ngelakoken si e.
5 Kalak si menang+ pakena pagi paken si mbentar,+ janah asa ndigan pe labo pernah kuhapus gelarna arah buku kegeluhen nari.+ Kuakui gelarna i lebe-lebe Bapakku, bage pe i lebe-lebe malekat-malekatNa.+
6 Ise pe si ercuping, begikenlah kai si kataken kesah si badia man runggun-runggun.’
7 “Man malekat runggun i Piladelpia, tulislah bagenda: Enda kata arah ia si badia,+ si benar,+ si njemak kunci Daud.+ Adi bukana, ise pe la banci nutupsa, janah adi tutupna, ise pe la banci mbukasa:
8 ‘Kuteh kai si lakokenndu. Kuteh labo kam megegeh, tapi patuhindu kata-kataku janah tetap kam setia man gelarku. Enggo kubuka pintu man bandu,+ janah ise pe la banci nutupsa.
9 Enda si nandangi kulakoken man anggota kelompok* Setan, si erbual janah ngaku-ngaku ia kalak Jahudi padahal situhuna labo kalak Jahudi.+ Kuban kalak e reh janah sujud i lebe-lebe nahendu, janah kuban gelah teh kalak e keleng teku kam.
10 Perban patuhindu kai si begindu kerna kesetianku,*+ kujaga pagi kam sanga kam iuji.+ Kerina pagi penduduk doni dat ujin e. Si enda terjadi guna nguji kerina kalak si tading i doni.
11 Minter pagi aku reh!+ Teruslah jaga kai si lit bas kam, gelah ula lit kalak si muat mahkotandu.+
12 “‘Kalak si menang pagi si kujadiken tiang bas rumah pertoton Dibataku, janah asa ndigan pe lanai tadingkenna ingan e. Kutulisken bas ia gelar Dibataku+ bage pe gelar kota Dibataku, eme Jerusalem si Mbaru+ si nusur arah surga nari, arah Dibataku nari. Kutulisken ka bas ia gelarku si mbaru.+
13 Ise pe si ercuping, begikenlah kai si kataken kesah si badia man runggun-runggun.’
14 “Man malekat runggun i Laodikea,+ tulislah bagenda: Enda kata arah Amin+ nari, eme saksi+ si setia ras benar,+ ciptan Dibata si pertama:+
15 ‘Kuteh kai si lakokenndu. Kam la mbergeh, la ka melas. Ateku min, kam mbergeh ntah pe melas.
16 Tapi perban kam setengah-setengah, melas pe lang,+ mbergeh pe lang,+ kuutahken pagi kam arah babahku nari.
17 Nindu, “Bayak aku,+ melala ertaku, janah labo aku kurang kai pe,” tapi la kam sadar maka situhuna kam mesera, la ermeriah ukur, pentang, janah tilanjang.
18 Emaka kusuruh gelah tukurndu barang-barang enda arah aku nari: emas si imurniken alu api gelah kam jadi bayak, paken si mbentar guna nutupi dagingndu si tilanjang si man kemelanken e,+ bage pe salep mata guna tambar matandu+ gelah banci kam erpengidah.+
19 “‘Kerina kalak si kukelengi, kupersingeti ras kuajarken.+ Emaka, semangatlah janah ertobatlah.+
20 Nenlah! Aku tedis i lebe-lebe pintu janah kutuktuk pintu e. Adi lit kalak megi soraku jenari bukana pintu, masuk aku ku rumahna, jenari man berngi aku ras ia janah ia man berngi ras aku.
21 Kalak si menang+ si kupediat kundul bas tahtaku,+ bagi aku pe enggo menang janah kundul+ ras Bapakku i tahtaNa.
22 Ise pe si ercuping, begikenlah kai si kataken kesah si badia man runggun-runggun.’”
Cataten i teruh
^ Ntah “metunggung.”
^ As. “sinagoga.”
^ Ntah banci saja “Perban ikutkenndu usihen kesetianku.”
