Ketangkasen 4:1-11
4 Kenca bage, lit kuidah terbuka sada pintu i surga. Janah kubegi sora bagi sora trompet, sora pertama si kubegi ngerana man bangku, nina, “Mari nangkih kam ku jenda, kucidahken kari bandu kai si pasti terjadi.”
2 Minter aku ikuasai kesah si badia. Kuidah sada tahta i surga, janah lit sekalak si kundul i tahta e.+
3 Ia si kundul i tahta e ersinar bagi batu jaspis+ ras batu sardis.* I sekeliling tahta e lit pelangi si teridah bagi zamrud.*+
4 Tahta e ikelilingi 24 tahta, janah kuidah lit 24 pertua si kundul i tahta-tahta e.+ Pake kalak e paken si mbentar ras mahkota emas.
5 Kuidah arah tahta e nari reh kilap,+ janah kubegi sora ras lenggur.+ I lebe-lebe tahta e, lit pitu lampu bagi api si gara, si e ertina pitu kesah si badia.+
6 I lebe-lebe tahta e lit bagi laut si teridah bagi kaca si bersih kel+ janah ersinar bagi kristal.
Tahta e lit i tengah, janah i sekelilingna lit empat mahluk si nggeluh.+ Empat mahluk si nggeluh e dem alu mata arah lebe ras arah pudina.
7 Mahluk si nggeluh si pertama bagi singa.+ Mahluk si nggeluh si peduaken bagi lembu jantan si nguda denga.+ Mahluk si nggeluh si peteluken+ ayona bagi manusia. Mahluk si nggeluh si peempatken+ bagi kuliki si sangana kabang.+
8 Tiap mahluk si nggeluh e lit enem kabengna, kerina kabengna e dem alu mata.+ Suari ras berngi, la erngadi-ngadi mahluk si nggeluh e ngataken, “Badia, badia, badia Dibata Jahwe,*+ Si Madakuasa, si enggo lit mbarenda nari, gundari, bage pe bas waktu si nandangi reh.”+
9 Bereken mahluk si nggeluh e kemulian, kehamaten, ras pengatan bujur man Ia si kundul i tahta e, eme Dibata si nggeluh seh rasa lalap.+ Tiap lakoken mahluk si nggeluh e bage,
10 sujud pertua-pertua si 24 e+ i lebe-lebe si kundul i tahta e janah sembahna Ia, si nggeluh seh rasa lalap. Benterken kalak e mahkotana ku lebe-lebe tahta e, jenari nina,
11 “O Jahwe* Dibata kami si erkuasa,+ Kam si metunggung* ngaloken kemulian,+ ras kehamaten.+ Sebap Kam si nciptaken kerina si lit,+ janah perban peratenNdu maka kerina e iciptaken janah lit.”
