Ketangkasen 5:1-14
5 Kuidah Ia si kundul bas tahta e+ njemak sada gulungen bas tan kananNa. Lit tulisen arah lebe ras arah pudi gulungen e, janah gulungen e itutup rapat alu pitu meterai.
2 Jenari kuidah sada malekat si megegeh, umumkenna alu sora megang, nina, “Ise kin si cocok mbuka gulungen e ras ngagui meterai-meteraina?”
3 La lit sekalak pe si banci mbuka gulungen e ras ngenen isina, la soal i surga, i doni, ntah pe i teruh doni.
4 Tangis aku, sedih kel kuakap, sebap la lit sekalak pe si cocok mbuka gulungen e ntah pe ngenen isina.
5 Jenari ngerana salah sada pertua e man bangku nina, “Ula nai kam tangis. Nenlah! Singa arah suku Juda,+ arah keluarga*+ Daud,+ enggo menang.+ Ia cocok mbuka gulungen e, bage pe pitu meteraina.”
6 Jenari lit kuidah sada anak biri-biri+ si teridah bagi enggo pernah igeleh.+ Anak biri-biri e tedis i lebe-lebe empat mahluk si nggeluh si tedis i deher tahta e, janah pertua-pertua e+ lit i sekelilingna. Lit pitu tanduk anak biri-biri e ras pitu matana. Pitu matana e ngertiken pitu kesah si badia+ si enggo isuruh ku belang-belang doni.
7 Minter ku lebe Anak Biri-Biri e, jenari buatna gulungen e arah tan kanan Ia si kundul i tahta e.+
8 Sanga buatna gulungen e, empat mahluk si nggeluh e ras pertua-pertua si 24 e+ sujud i lebe-lebe Anak Biri-Biri e. Masing-masing pertua e njemak sada harpa* ras mangkok emas si dem alu kemenyan. (Kemenyan e ngertiken toto kalak si badia.)+
9 Jenari, kerina kalak e ngendeken lagu si mbaru,+ “Kam si cocok muat gulungen e ras mbuka meterai-meteraina. Sebap kam enggo igeleh, janah alu darehndu enggo tukurndu manusia arah tiap suku, bahasa, umat, ras bangsa guna Dibata.+
10 Jadikenndu kalak e raja*+ ras imam guna ngelayani Dibatata.+ Merentah kalak e jadi raja+ nandangi doni enda.”
11 Kunen ka janah kubegi sora malekat si buena puluhen ribu kali puluhen ribu ras ribun kali ribun.+ Tedis malekat e kerina i sekeliling tahta e, empat mahluk si nggeluh e, ras pertua-pertua e,
12 janah kataken kalak e alu sora megang, “Anak Biri-Biri si enggo igeleh e+ cocok ngaloken kuasa, kebayaken, kepentaren, gegeh, kehamaten, kemulian, ras puji-pujin.”+
13 Jenari, kubegi kerina mahluk si lit i langit, i doni, i teruh doni,+ ras si lit bas laut, payo, kerina si nggeluh ngataken, “Puji-pujin, kehamaten,+ kemulian, ras kuasa, ibereken man Ia si kundul i tahta e+ ras Anak Biri-Biri e,+ seh rasa lalap.”+
14 Nina empat mahluk si nggeluh e, “Amin!” janah sujud pertua-pertua e nembah Dibata.
Cataten i teruh
^ As. “urat.”
^ Harpa eme alat musik si ersenar bagi gitar, tapi bentukna beda.
^ As. “kerajan.”
