Ketangkasen 7:1-17
7 Kenca si e, kuidah empat malekat tedis bas empat ujung doni. Tagangina empatna angin i doni enda, gelah ula lit angin si rembus ku doni, ku laut, ntah pe ku batang kayu si apai pe.
2 Kuidah ka malekat si deban nangkih arah timur* nari maba meterai si alokenna arah Dibata si nggeluh. Alu sora megang erlebuh ia man empat malekat e si enggo ibere ijin ncedai doni ras laut,
3 nina, “Ula cedai doni, laut, ntah pe batang kayu, seh asa dung tamaken kami meterai+ i perdempaken budak-budak Dibatata.”+
4 Kubegi maka kalak si imeteraiken e buena lit 144.000 kalak.+ Kalak e ibuat arah tiap suku Israel nari:+
5 Arah suku Juda lit 12.000 si imeteraiken,arah suku Ruben lit 12.000,arah suku Gat lit 12.000,
6 arah suku Aser lit 12.000,arah suku Naptali lit 12.000,arah suku Manase+ lit 12.000,
7 arah suku Simeon lit 12.000,arah suku Lewi lit 12.000,arah suku Isakar lit 12.000,
8 arah suku Sebulon lit 12.000,arah suku Jusup lit 12.000,ras arah suku Benyamin lit 12.000 si imeteraiken.
9 Lit kuidah sada kelompok jelma si enterem. Ise pe la ngasup ngkira jumlahna. Kalak e reh arah kerina bangsa, suku, umat, ras bahasa.+ Kerina kalak e tedis i lebe-lebe tahta bage pe i lebe-lebe Anak Biri-Biri e, pake kalak e jubah mbentar+ ras jemak kalak e bulung batang kurma.+
10 Terus kalak e ersurak alu megang, “Keselamatenta reh arah Dibatata nari, eme si kundul i tahta e+ bage pe arah Anak Biri-Biri e nari.”+
11 Kerina malekat tedis i sekeliling tahta e, pertua-pertua e,+ bage pe empat mahluk si nggeluh e. Sujud kalak e i lebe-lebe tahta janah nembah man Dibata,
12 nina, “Amin! Mbera-mbera Dibatata si pentar, erkuasa, ras megegeh ngaloken pujin, pengatan bujur, kemulian, ras kehamaten seh rasa lalap.+ Amin.”
13 Jenari salah sada pertua e nungkun man bangku, nina, “Ise kerina kalak si erjubah mbentar e,+ ja nari kalak e?”
14 Minter kujawap, “O Tuanku, kam si metehsa.” Nina ka man bangku, “Kalak e kap si selamat ngelewati kiniseran si mbelin e.+ Enggo cucina jubahna, banna mbentar alu dareh Anak Biri-Biri.+
15 E me sebapna kalak e lit i lebe-lebe tahta Dibata. Bereken kalak e pelayanen si badia man baNa suari ras berngi bas rumah pertotonNa. Ia si kundul i tahta e+ kimbangkenNa kemahNa guna ngelindungi kalak e.+
16 Lanai kalak e muas ntah pe melihe. Matawari ntah pe las matawari la erban kalak e meseng.+
17 Sebap permakani+ Anak Biri-Biri+ si lit i deher tahta e pagi kalak e. Babana pagi kalak e ku sumber lau kegeluhen.+ Apusi Dibata pagi kerina iluh kalak e.”+
Cataten i teruh
^ Ntah “matawari terbit.”