Ketangkasen 8:1-13
8 Sanga buka Anak Biri-Biri e+ meterai si pepituken,+ setengah jam dekahna la lit sora kai pe i surga.
2 Jenari, kuidah pitu malekat+ tedis i lebe-lebe Dibata, ibereken man kalak e pitu trompet.
3 Kenca si e, reh sada malekat si deban, babana ingan nutung kemenyan, ingan e iban arah emas nari, tedis ia i deher ingan nutung* persembahen.+ Ibereken man bana melala kemenyan,+ gelah banci tutungna bas ingan nutung persembahen si iban arah emas nari+ si lit i lebe-lebe tahta Dibata, sanga terbegi kerina toto kalak si badia.
4 Toto kalak si badia bage pe asap kemenyan si lit bas tan malekat e+ ras-ras nangkih ku lebe-lebe Dibata.
5 Jenari buat malekat e ingan kemenyan ndai, tamana sitik api ku bas, api e ibuat arah ingan nutung persembahen nari, jenari ambekkenna ku doni. Kenca si e, terbegi sora lenggur, terbegi ka sora-sora si deban, lit kilap,+ ras terjadi gempa.
6 Jenari ersikap malekat si pitu e ngembus trompetna.+
7 Embus malekat si pertama trompetna. Jenari reh udan es, bage pe udan api si icampur ras dareh nusur ku doni.+ Emaka meseng sepertelu doni enda, sepertelu batang kayu, ras kerina dukut-dukut si meratah.+
8 Embus malekat si peduaken trompetna. Jenari lit teridah bagi gunung si galang si tertutung ibenterken ku laut.+ Emaka sepertelu laut berubah jadi dareh,+
9 sepertelu mahluk si nggeluh i laut pe mate,+ janah sepertelu kapal pe hancur.
10 Embus malekat si peteluken trompetna. Jenari ndabuh arah langit nari sada bintang si galang si ersinar bagi lampu. Dabuhina sepertelu lau maler ras sumber-sumber lau.+
11 Gelar bintang e Sinuan-Sinuan si Pagit. Emaka sepertelu lau e berubah jadi pagit, janah enterem kalak mate perban lau e enggo berubah jadi pagit.+
12 Embus malekat si peempatken trompetna. Jenari sepertelu matawari,+ sepertelu bulan, ras sepertelu bintang jadi gelap. Janah la lit terang bas sepertelu suari ras sepertelu berngi.+
13 Kenca si e, kuidah lit kuliki kabang meganjang i langit, janah kubegi sorana si megang, nina, “Cilaka, cilaka, cilaka+ kel kalak si tading i doni perban sora trompet telu malekat si debanna. Sebap lanai ndekah minter embus malekat-malekat e trompetna e!”+
