Ketangkasen 9:1-21
9 Embus malekat si pelimaken trompetna.+ Jenari kuidah sada bintang si ndabuh arah langit nari ku doni. Ibereken man bana kunci guna mbuka lubang si seh kel bagesna.*+
2 Bukana lubang si seh kel bagesna* e, jenari ndarat asap si mekapal bagi asap arah tungku si galang. Perban asap e, matawari ras udara jadi gelap.+
3 Ndaraten labang arah asap e janah nusur ku doni.+ Ibereken man labang-labang e kuasa bagi kuasa si ibereken man kalajengking i doni enda.
4 Ikataken man labang-labang e gelah ula cedaina dukut-dukut, batang kayu, ras sinuan-sinuan si meratah si apai pe si lit i doni. Manusia si la lit meterai bas perdempakenna ngenca si banci siksana.+
5 Labang-labang e la banci munuh manusia, tapi banci siksana manusia sedekah lima bulan. Suina isiksa labang e bali ras cit kalajengking.+
6 Sanga si e, darami manusia cara gelah mate, tapi la datna. Merhat kel kalak e mate, tapi la mate-mate.
7 Labang-labang e teridah bagi kuda si ersikap guna erperang.+ Bas takalna tempa lit bagi mahkota emas. Ayona bagi ayo dilaki,
8 tapi bukna bagi buk diberu, ipenna bagi ipen singa.+
9 Lit si ngelindungi dadana, si iban bagi arah besi nari. Sora kabengna bagi sora gereta-gereta kuda si lawes erperang.+
10 Labang-labang e lit ikurna, ikurna e erbisa bagi bisa ikur kalajengking. Bas ikurna e lit kuasa guna nyiksa manusia sedekah lima bulan.+
11 Labang-labang e lit rajana, eme malekat si njagai lubang si seh kel bagesna.*+ Gelar rajana e bas bahasa Heber, eme Abaddon,* bas bahasa Junani, gelarna Apolion.*
12 Cilaka si pertama enggo lewat. Kenca si e, nandangi reh ka dua cilaka nari.+
13 Embus malekat si peenemken+ trompetna.+ Jenari, kubegi sora arah tanduk-tanduk ingan nutung* persembahen si iban arah emas nari+ si lit i lebe-lebe Dibata,
14 nina sora e man malekat si peenemken si njemak trompet e, “Lepasken empatna malekat si iiket i deher lau si galang e eme Lau Eprat.”+
15 Emaka empatna malekat e ilepasken. Malekat-malekat e enggo isikapken bas jam, wari, bulan, bage pe tahun si enggo itentuken guna munuh sepertelu manusia.
16 Kubegi pasuken tentera si erkuda lit 200 juta buena.
17 Enda si kuidah kerna kuda ras si nangkihisa: Si nangkih kuda e lit si ngelindungi dadana, pelindungna e warna megara bagi api, biru tua, bage pe warna megersing bagi belerang. Takal kuda e bagi takal singa,+ arah babahna nari ndaraten api, asap, ras belerang.
18 Sepertelu manusia ibunuh alu telu bencana, eme api, asap, ras belerang si ndarat arah babahna nari.
19 Kuasa kuda-kuda e lit bas babahna ras ikurna. Ikurna bagi nipe janah ikurna e lit takalna, alu ikurna e siksana manusia.
20 Tapi manusia si deban si la ibunuh alu bencana-bencana e, la nggit robah arah perbahanenna.* Tetap sembah kalak e malekat-malekat jahat, berhala-berhala si iban arah emas, pirak, tembaga, batu, ras kayu nari, si la erpengidah, la erpemegi, janah la banci erdalan.+
21 Kalak e pe la robah arah dosa-dosana, dosana e eme munuh, ngelakoken perbahanen si lit hubungenna ras malekat jahat,* ngelakoken perbahanen seks si salah,* bage pe nangko.
