Kolose 2:1-23
2 Ateku min gelah teh kena uga beratna perjuangenku guna kena, guna kalak si lit i Laodikea,+ bage pe guna kerina kalak si lenga pernah jumpa ras aku.
2 Ateku min gelah kalak e iapuli+ janah ipersada alu mehuli bas kekelengen.+ Alu bage banci aloken kalak e kerina kebayaken si rehna arah pengangkan si jelas ras pasti, janah alokenna pemeteh si tepat kerna rahasia si badia Dibata eme Kristus.+
3 Kerina kepentaren ras pemeteh si bali bagi erta, terbuni bas ia.+
4 Enda kukataken gelah ula kena tertipu alu kata-kata si licik.
5 Amin pe aku la ras kena, tapi ukurku ras kena kap. Meriah ukurku ngidah uga raturna kena,+ bage pe ngidah kiniteken kena si nteguh man Kristus.+
6 Emaka, perban enggo aloken kena Tuan Jesus Kristus, teruslah erdalan ras Kristus.
7 Bagi si enggo pelajari kena, kiniteken kena arus mbages uratna, nteguh,+ janah ibangun i datas pondasi,+ pondasi e eme Kristus. Teruslah kataken bujur man Dibata.+
8 Hati-hatilah gelah la kena iperbudak kalak alu ajaren manusia ras tipun kosong+ si rehna arah adat manusia, bage pe arah pendapat doni enda si rehna labo arah Kristus nari,
9 perban Kristus dem alu sipat-sipat Dibata.+
10 Emaka, kena la kurang kai pe perban ia kepala kerina kerajan ras penguasa.+
11 Selaku pengikutna, kena pe enggo isunat, labo alu tan tapi alu ngambekken sura-sura daging si erdosa,+ perban bage kap sunat man pelayan Kristus.+
12 Kena enggo ikubur radu ras ia bas peridinna,+ janah selaku pengikut Kristus, kena pe ipekeke+ radu ras ia perban kena erkiniteken man perbahanen Dibata si luar biasa, si mpegeluh Kristus bas si mate nari.+
13 Selain si e, amin pe kena enggo mate perban dosa kena janah perban la isunat, ban Dibata kena nggeluh ras ia.+ Alu kiniulin Dibata, ampuniNa kerina dosata+
14 janah masapkenNa undang-undang si tertulis+ si ncidahken kesalahenta.+ SasapkenNa e alu kematen Kristus bas tiang siksan.*+
15 Perban tiang siksan* e, talukenNa pemerentah ras penguasa-penguasa janah cidahkenNa man jelma si enterem+ bas pawai kemenangenNa maka kalak e enggo talu.
16 Emaka, ula pediat ise pe ngakimi kena kerna pangan, kerna inemen,+ perayan, ntah pe perayan bulan baru,+ ntah pe kerna Sabat.+
17 Kerina e bayangen kerna kai si nandangi reh,+ tapi daging situhu-tuhu e eme Kristus.+
18 Hati-hatilah man kalak si banci erban kena la ngaloken hadiah,+ eme kalak si tempa-tempa meteruk ukur, si meriah kapna nembah malekat, janah “nteguh jemakna”* kai si idahna. Perban carana rukur bagi manusia si erdosa, megah kapna man kai si la lit ertina.
19 Kalak si bage la ngikutken takal e,+ eme si mere kerina keperlun daging, si erban kerina anggota daging jadi ersada, janah arah ia kap maka iban Dibata daging e jadi reh belinna.+
20 Adi kena enggo mate ras Kristus janah enggo tulak kena pendapat doni enda,+ engkai maka perbahanen kena tempa-tempa bagin bas doni enda denga? Engkai maka terus patuhi kena peraturen enda:+
21 “Ula jemak, ula nanami, ula kuit”?
22 Kerina enda peraturen kerna kai si banci keri adi ipan ras iinem, janah si e perentah ras ajaren manusia saja ngenca.+
23 Amin pe peraturen e tempa-tempa dem kepentaren, tapi si e kerina la lit gunana bas naluken sura-sura daging si erdosa, sebap kalak e si nentuken carana ersembah, kalak e tempa-tempa meteruk ukur, janah la berekenna keperlun dagingna.+
Cataten i teruh
^ Ikutip arah kata-kata si ibelasken anggota si mbaru bas acara agama si la nembah Dibata.