Kolose 3:1-25
3 Adi kena enggo ipegeluh mulihi radu ras Kristus,+ teruslah usahaken gelah dat kena kai si lit i datas, bas ingan Kristus kundul i sebelah kanan Dibata.+
2 Tetapkenlah ukur kena man kai si lit i datas,+ labo man kai si lit i doni.+
3 Sebap kena enggo mate, janah kegeluhen kena lit bas tan Kristus, sesuai ras peraten Dibata.
4 Kristus kap kegeluhenta,+ janah sanga cidahkenna kemulianna,* kena pe ncidahken kemulian radu ras ia.+
5 Emaka, matekenlah kerina sura-sura daging*+ kena si ngikutken doni, eme perbahanen seks si salah,* perbahanen si najis, napsu seks si la terkuasai,+ sura-sura si jahat, bage pe merangap si seri ras nembah berhala.
6 Si e kerina erban Dibata merawa.
7 Mbarenda pe bage perbahanen kena.+
8 Tapi gundari, arus ambekken kena si e bas kena nari, eme merawa, ngamuk, perbahanen si jahat,+ ngisak-ngisakken,+ janah ula belasken cakap kotor.*+
9 Ula erbual sada ras si debanna.+ Tangtangilah sipat-sipat si ndekah+ ras kerina perbahanenna,
10 pakelah sipat-sipat si mbaru+ si enggo bereken Dibata. Alu pemeteh si benar, banlah sipat-sipat kena jadi mbaru sesuai ras sipat-sipat Dibata.+
11 Emaka lanai bo lit kalak Junani ntah kalak Jahudi, kalak si isunat ntah la isunat, kalak asing ntah kalak Sekit,* budak ntah pe kalak si bebas. Tapi, Kristus jadi kai pe guna kita, janah kita kerina ersada ras ia.+
12 Emaka selaku kalak si ipilih Dibata,+ si badia ras si ikelengi, pakelah kekelengen, perkuah ate,+ mehuli, meteruk ukur,+ lembut,+ bage pe sabar.+
13 Bicara lit pe alasen kena megelut,+ kena arus tetap sabar janah alu bulat ukur ampunilah sada ras si debanna.+ Bagi Jahwe* alu bulat ukur ngampuni kena, lakoken ka bage.+
14 Tapi selain si e kerina, pakelah kekelengen,+ sebap kekelengen kap si mpersadaken kerina alu sempurna.+
15 Mbera-mbera kedamen Kristus erkuasa bas pusuh kena+ perban kena enggo ipilih jadi sada daging. Janah teruslah kataken bujur.
16 Mbera-mbera pengajaren Kristus dem bas pusuh kena, alu bage kena jadi pentar. Teruslah ngajar janah pegegehi* sada ras si debanna alu masmur,+ muji Dibata, ngendeken lagu pengatan bujur, janah rendelah man Jahwe* bas pusuh nari.+
17 Kai pe si kataken kena ras si lakoken kena, lakokenlah kerina e bas gelar Tuan Jesus. Arah ia, katakenlah bujur man Dibata, Bapakta.+
18 O kena ndehara, patuhlah kena man perbulangen kena,+ sebap bage arusna si ilakoken pengikut Tuan.
19 O kena perbulangen, teruslah kelengi ndehara kena,+ ula kena kasar man bana.+
20 O anak-anak, patuhlah kena man orang tua kena bas kerinana,+ sebap si e ngena ate Tuan.
21 O perbapan, ula ban merawa anak-anak kena+ gelah ula bene semangatna.*
22 O budak-budak, patuhlah kena man tuan kena si lit i doni bas kai pe,+ labo saja sanga idahna gelah erban manusia senang, tapi arah ukur nari perban mbiar man Jahwe.*
23 Kai pe si lakoken kena, lakokenlah alu bulat ukur bagi man Jahwe,*+ labo man manusia,
24 perban teh kena maka arah Jahwe* nari kap aloken kena upah eme warisen.+ Erdahinlah bagi budak man Kristus, Tuanta.
25 Kalak si erban salah pasti ihukum sesuai ras kesalahenna,+ sebap Dibata la erpilihen.+
Cataten i teruh
^ As. “sanga ia jadi nyata.”
^ As. “kerina anggota daging.”
^ Ntah “ula cakapken kai pe si lit hubungenna ras porno.”
^ Kalak Sekit eme kalak si kolot.
^ Ntah “mereken nasehat.”
^ Ntah “ula kitik ukurna.”