Kuan-kuanen 28:1-28
28 Kalak jahat kiam amin pe la lit si ngayakisa,Tapi kalak bujur pang ia bagi singa.*+
2 Adi lit si mberontak bas sada negri, ganti-ganti pagi penguasana,+Tapi alu penampat kalak si lit pengertinna ras pemetehna, sekalak penguasa banci ndekah merentah.+
3 Kalak mesera si nipu kalak si lemah,+Bali bagi udan si erban gedap kerina pangan.
4 Kalak si la ngikutken undang-undang, muji kalak jahat,Tapi kalak si ndalanken undang-undang, merawa ia man kalak e.+
5 Kalak jahat la banci angkana keadilen,Tapi kalak si ndarami Jahwe banci angkana kai pe.+
6 Pangen kalak mesera si erdalan bas dalan kesetian,Asangken kalak bayak si jahat perbahanenna.+
7 Anak si lit pengertinna patuh man undang-undang,Tapi kalak si erteman ras kalak si rangap, mpermelaken bapakna.+
8 Kalak si nambahi ertana alu keuntungen si la jujur bage pe alu bunga sen,+Mpepulung ertana man kalak si rate mekuah man kalak si mesera.+
9 Kalak si la patuh man undang-undang,Totona pe erban ciga ate.+
10 Kalak si erban kalak bujur ngelakoken si jahat, ndabuh pagi ku lubang si ibanna,+Tapi kalak si bersih pusuhna, ngaloken si mehuli pagi.+
11 Kalak bayak, pentar kapna bana,+Tapi kalak mesera, banci idahna uga kin situhuna kerna kalak bayak e.+
12 Adi berhasil kalak bujur, lit i je kemulian,Tapi adi kalak jahat erkuasa, kerina kalak cebuni.+
13 Kalak si tutup-tutupina kesalahenna, labo pagi berhasil,+Tapi kalak si akuina salahna janah lanai lakokenna, datna pagi perkuah ate.+
14 Ermeriah ukur kap kalak si lalap mbiar man Dibata,Tapi kalak si mekeng, nanamina pagi kesusahen.+
15 Bagi singa si erngaung ras beruang si nyerang,Bage me penguasa si jahat merentah rakyat si la ergegeh.+
16 Peminpin si la lit pengertinna, salahgunakenna kuasana,+Tapi kalak si rate segat man keuntungen si la jujur, gedang pagi umurna.+
17 Sekalak pembunuh, rutang dareh ia janah lalap pagi iayaki seh ku kuburen.+
Ula min lit si nampati ia.
18 Kalak si bersih lagu langkahna, iselamatken pagi,+Tapi kalak si jahat perbahanenna, ndabuh pagi.+
19 Kalak si urusna jumana, melala pagi panganna,Tapi kalak si ngayaki kai si la erguna, mesera pagi geluhna.+
20 Kalak si setia, melala pagi datna pasu-pasu,+Tapi kalak si meter atena bayak, pasti lakokenna kesalahen.+
21 La mehuli adi berat sebelah,+Tapi lit kalak erban salah guna ndatken sepotong roti.
22 Kalak si rangap, pala-palaina ndatken kebayaken,Tapi la tehna mesera pagi geluhna.
23 Ngenan pagi ate kalak+ man kalak si nggit mpersingeti kalak si deban+Asangken kalak si nggit muji-muji.
24 Kalak si ngerampok bapakna ras mamakna janah nina, “Enda la salah,”+
Teman perampok kap ia.+
25 Kalak si merangap,* mpeturah perubaten,Tapi kalak si ngandalken Jahwe, makmur pagi.+
26 Kalak si tek man pusuhna eme kalak si motu,+Tapi kalak si erdalan bas dalan kepentaren, selamat pagi.+
27 Kalak si mere man kalak mesera, labo pagi kurang kai pe,+Tapi kalak si la nggit mere man kalak mesera, lalap pagi isumpahi.
28 Adi kalak jahat si erkuasa, cebuni kalak,Tapi sanga kernep kalak jahat e, reh buena kalak bujur.+