Lukas 1:1-80
1 Enterem kalak usahakenna mpepulung ras nulisken keterangen kerna kai si enggo terjadi si banci tuhu-tuhu terteki.+
2 Kai si tulisken kalak enda cocok menurut kai si enggo sibegi arah kalak si ngidah kejadin e+ bage pe arah si mpeseh berita e.+
3 Emaka o Teopilus,+ Kalak si Ihamati, kuputusken ka nuliskenca man bandu alu teratur, perban enggo kuselidiki enda kerina alu megermet tangtangna nari,
4 gelah banci tehndu maka kerina si enggo iajarken man bandu tuhu-tuhu benar.+
5 Bas jaman Herodes,*+ raja Judea, lit sekalak imam si gelarna Sakaria arah kelompok Abia nari.+ Diberuna arah keturunen Harun, gelarna Elisabet.
6 Duana ia benar i lebe-lebe Dibata janah tuhu-tuhu patuhina kerina perentah bage pe kerina si suruh Jahwe* si arus ilakoken.
7 Tapi la lit anakna, perban Elisabet mandul, janah kalak e enggo metua kel.
8 Sanga Sakaria ngelayani selaku imam, sanga kelompokna+ ndalanken tugas i lebe-lebe Dibata,
9 menurut kebiasan imam-imam, terpilih me Sakaria guna mpersembahken kemenyan+ bas ingan si badia Jahwe.*+
10 Enterem kel kalak ertoto i darat sanga kemenyan ipersembahken.
11 Jumpai malekat Jahwe* me Sakaria, tedis malekat e arah kanan ingan nutung* persembahen kemenyan.
12 Mamang ate Sakaria ngidah si e janah mbiar kel ia.
13 Tapi nina malekat e, “Ula kam mbiar Sakaria, sebap pemindonndu enggo ibegiken. Lahir pagi sekalak anak dilaki arah diberundu Elisabet, banlah gelarna Johanes.+
14 Senang janah meriah kel pagi akapndu, enterem pagi kalak ermeriah ukur perban kelahiren anak e,+
15 sebap ia jadi kalak si penting pagi i lebe-lebe Jahwe.*+ Tapi la banci inemna anggur ntah pe inemen si deban si lit alkoholna.+ Ope lenga lahir* pe enggo dem ia alu kesah si badia.+
16 Banna pagi enterem kalak Israel mulihken ku Jahwe,* Dibata kalak e.+
17 Selain si e, alu semangat ras kuasa si bagi Elia,+ leben pagi ia lawes asangken Dibata. Banna pusuh perbapan mulihken bagi pusuh anak-anak+ janah banna kalak si la patuh ndatken kepentaren arah kalak si benar. Alu bage, siap kalak e ngelayani Jahwe.”*+
18 Nina Sakaria man malekat e, “Maka banci bage? Aku ras diberuku enggo kap metua.”
19 Ngaloi malekat e, “Aku Gabriel,+ si tedis i lebe-lebe Dibata.+ Aku isuruh guna ngerana ras kam janah mpeseh berita si meriah enda man bandu.
20 Perban la kam tek man kata-kataku si terjadi pagi bas waktu si enggo itentuken, bisu pagi kam janah lanai banci ngerana seh ngasa terjadi si enda kerina.”
21 Sanga si e, jelma si enterem terus nimai Sakaria, janah mamang ate kalak e perban ndekah kel ia bas ingan si badia.
22 Sanga ia ndarat, lanai ia banci ngerana man kalak e, dungna teh kalak e maka e denga idahna kai si luar biasa* bas ingan si badia. Perban ia bisu, lalap banna isyarat alu tanna man kalak e.
23 Kenca dung wari-wari pelayanenna si badia e, mulih ia ku rumahna.
24 Kenca piga-piga waktu, hamil Elisabet diberuna, la ia ndarat-ndarat i rumah nari lima bulan dekahna, nina,
25 “Enda me si ilakoken Jahwe* man bangku gundari. Enggo perdiatekenNa aku gelah lanai hina kalak aku.”+
26 Kenca enem bulan Elisabet hamil, suruh Dibata malekat Gabriel+ ku kota Nasaret i Galilea,
27 ndahi sekalak singuda-nguda+ si enggo ertunangen ras sekalak dilaki si gelarna Jusup arah keturunen Daud, gelar singuda-nguda e Maria.+
28 Sanga jumpa, nina malekat e man bana, “Mejuah-juah, o kam si jadi kel ate Dibata, Jahwe* kap ras kam.”
29 Tapi sengget kel ia megi kata-katana e janah usahakenna ngangkai erti kata-kata e.
30 Emaka nina malekat e man bana, “Ula kam mbiar Maria, sebap jadi ate Dibata man bandu.
31 Hamil pagi kam janah lahirkenndu sekalak anak dilaki,+ banlah gelarna Jesus.+
32 Jadi kalak si penting pagi ia+ janah igelari Anak Dibata Si Meganjangna.+ Bere Dibata Jahwe* ka pagi man bana tahta Daud bapakna,+
33 jadi Raja pagi ia man keturunen Jakup seh rasa lalap, janah Kerajanna la erkeri-kerin.”+
34 Tapi nina Maria man malekat e, “Uga maka e banci terjadi? Aku me singuda-nguda denga.”+
35 Ngaloi malekat e, “Nusur pagi kesah si badia ku datasndu,+ kuasa Dibata Si Meganjangna pe nutupi kam pagi. Perban si e, anak si lahir e ilebuh pagi badia,+ Anak Dibata.+
36 Kade-kadendu Elisabet pe si igelari kalak diberu si mandul janah enggo metua, gundari enggo enem bulan ia hamil, anak si bas rahimna e dilaki.
37 Sebap kerina si kataken Dibata pasti terjadi.”+
38 Jenari nina Maria, “Budak si diberu Jahwe* kap aku! Terjadilah man bangku bagi si enggo katakenndu e.” Kenca si e, lawes malekat ndai nadingken ia.
39 Emaka la ndekah kenca si e, mis berkat Maria ku daerah pegunungen ku sada kota i Juda.
40 Masuk ia ku rumah Sakaria janah katakenna mejuah-juah man Elisabet.
41 Kenca begi Elisabet kataken Maria mejuah-juah, mis lompat anak si lit bas rahimna e, janah Elisabet dem alu kesah si badia.
42 Alu sora si megang, nina, “Ipasu-pasu me kam bas kerina diberu, janah ipasu-pasu me anak si lit bas rahimndu!
43 Sada kehamaten man bangku idahi mamak Tuanku aku!
44 Kenca kubegi sorandu, mis lompat anak si lit bas rahimku alu meriah ukur.
45 Ermeriah ukurlah kam si tek, sebap kerina si kataken Jahwe* man bandu pasti terjadi.”
46 Nina Maria, “Kumuliaken Jahwe,*+
47 seh kel riahna ukurku perban Dibata Si Nelamatken aku,+
48 sebap enggo perdiatekenNa budakNa si diberu eme kalak si biasa enda.+ Mulai gundari nari kerina kalak ngataken aku ermeriah ukur,+
49 perban Dibata si erkuasa enggo ngelakoken melala perbahanen si mbelin man bangku. Badia gelarNa,+
50 janah seh rasa lalap cidahkenNa perkuah ateNa man kalak si mbiar man baNa.+
51 CidahkenNa kuasaNa alu tanNa. MerapkenNa kalak si meganjang ukur.+
52 PenusurNa kalak si erkuasa bas tahtana nari+ janah peganjangNa kalak si la penting.+
53 BesuriNa kel kalak si melihe alu kai si mehuli,+ pelawesNa kalak bayak janah la maba kai pe.
54 SampatiNa suruh-suruhenNa eme Israel, perban ingetNa janjiNa guna ncidahken perkuah ate,+
55 bagi si enggo katakenNa man nini bulangta nai, man Abraham ras man keturunenna,+ seh rasa lalap.”
56 Maria tading ras Elisabet kira-kira telu bulan dekahna, kenca si e mulih ia ku rumahna.
57 Seh me waktuna Elisabet melahirken janah lahirkenna sekalak anak dilaki.
58 Begi tetanggana ras kade-kadena maka enggo buktiken Jahwe* perkuah ateNa si mbelin man ia, emaka ermeriah ukur kalak e ras ia.+
59 Bas wari si pewaluhken, reh kalak e sanga anak e nandangi isunat.+ Ban kalak e atena gelarna Sakaria, bagi gelar bapakna.
60 Tapi nina mamakna, “Ula! Arus Johanes ban gelarna.”
61 Nina kalak e man bana, “La kap lit sada pe gelar kade-kadendu bagena.”
62 Emaka ban kalak e isyarat alu tan man bapakna guna nungkun ise nge atena ibanna gelar anakna e.
63 Emaka pindona sada lambar papan jenari itulisna, “Johanes gelarna.”+ Mamang kel ate kalak e kerina.
64 Paksa si e mis banci ngerana Sakaria,* jenari mulai ia ngerana+ ras muji Dibata.
65 Takjup kerina kalak si tading i sekelilingna, janah kerina enda mulai icakapken bas kerina daerah pegunungen Judea.
66 Tersungkun-sungkun kerina si megisa, nina, “Kalak si uga nge pagi anak enda?” Sebap tan Jahwe* tuhu-tuhu ras ia.
67 Kenca si e, Sakaria bapak anak e dem alu kesah si badia janah ernubuat, nina,
68 “Terpujilah Jahwe* Dibata Israel,+ perban enggo perdiatekenNa umatNa janah bebaskenNa kalak e.+
69 Enggo bereNa man banta juru selamat si dem kuasa*+ arah keturunen Daud pelayanNa,+
70 bagi si enggo katakenNa arah nabi-nabiNa si badia si nai,+
71 kerna keselamaten arah musuh-musuhta nari ras arah tan kerina kalak si rate segat man banta,+
72 guna mbuktiken perkuah ate si enggo katakenNa man nini bulangta ras nginget perjanjinNa si badia,+
73 eme sumpahNa man Abraham nini bulangta.+
74 Kenca selamatken Dibata kita arah tan musuh nari, berekenNa man banta kehamaten guna mereken pelayanen si badia man baNa alu la lit kebiaren,
75 alu kesetian, ras perbahanen si benar i lebe-lebeNa segedang geluhta.
76 Tapi kam, o Anakku, igelari pagi kam nabi Dibata Si Meganjangna, sebap kam pagi ngelebei Jahwe* guna nikapken dalan man baNa,+
77 guna mere pemeteh kerna keselamaten man umatNa alu ngampuni dosa-dosa kalak e,+
78 perban perkuah ate si lembut arah Dibatata. Alu perkuah ate enda me sinar matawari reh ndahi kita arah ingan si meganjang,
79 guna nerangi kalak si kundul bas kegelapen bage pe bas bayangen kematen+ ras mabai naheta bas dalan kedamen.”
80 Reh belinna anak e janah reh paguhna kinitekenna. Terus ia tading i gurun pasir seh ngasa cidahkenna bana man kalak Israel.
Cataten i teruh
^ Ntah “Mulai bas rahim mamakna.”
^ Ntah “idahna pengenehenen.”
^ Ntah “mis terbuka babahna ras si ngiket dilahna pe lepas.”
