Lukas 10:1-42
10 Kenca si e, pilih Tuan 70 kalak si deban janah suruhna kalak e dua-dua+ ngelebei ia ku tiap kota ras ingan si atena idahina.
2 Jenari nina man kalak e, “Mbelang man peranin, tapi kurang sierdahin. Emaka pindolah man Si Mada peranin, gelah suruhNa sierdahin guna peraninNa e.+
3 Berkatlah! Kusuruh kena lawes bagi anak biri-biri ku tengah-tengah srigala.+
4 Ula baba ingan sen ntah pe ingan pangan ntah selop,+ janah ula perkuanken ise pe* bas dalan.
5 Ku rumah ise pe kena masuk, kataken lebe, ‘Mbera lit kedamen bas rumah enda.’+
6 Adi la lit si ngarapken dame i je, mulih me kedamen e man kena. Tapi, adi lit si ngarapken dame i je, tading me kedamen kena bas ia.
7 Emaka tadinglah i rumah e,+ pan ras inemlah si isikapkenna,+ sebap kalak si erdahin patut ndatken upahna.+ Ula rusur pindah-pindah ku rumah si deban.
8 “Bage ka pe, ku kota si apai pe kena lawes janah alo-alona kena, panlah kai si isikapken man kena,
9 pepalemlah kalak si sakit si lit i je, jenari kataken man bana, ‘Kerajan Dibata enggo ndeher.’+
10 Tapi ku kota si apai pe kena lawes janah la alokenna kena, laweslah ku pasar-pasarna si galang janah kataken,
11 ‘Agui kami abu kota kena si leket bas nahe kami.+ Tapi, gelah enggo teh kena, Kerajan Dibata enggo ndeher.’
12 Kukataken man kena maka bas Wari Penghakimen pagi beraten hukumen man kota e asangken man Sodom.+
13 “Cilaka kam, o Korasin! Cilaka kam, o Betsaida! Adi i Tirus ras i Sidon min ndai iban perbahanen si dem kuasa si enggo iban i tengah-tengah kena, enggo nai nari kalak e ertobat janah kundul alu kain guni ras abu.+
14 E me sebapna, bas Wari Penghakimen pagi beraten hukumen kena asangken hukumen man Tirus ras Sidon.
15 Kam pe, o Kapernaum, ipeganjang kin kam pagi seh ku langit? Nusur nge kam pagi ku Kuburen!*
16 “Ise pe si megiken kena, megiken aku.+ Ise pe si nulak kena, nulak aku ka nge. Ise pe si nulak aku, tulakna ka Ia si nuruh aku.”+
17 Kenca si e, mulih si 70 kalak ndai alu ermeriah ukur, nina, “O Tuan, malekat-malekat jahat pe patuh man kami sanga pake kami gelarndu.”+
18 Emaka nina Jesus, “Kuidah Setan enggo ndabuh+ bagi kilap i langit nari.
19 Enggo kubereken man kena kuasa guna merjaki nipe ras kalajengking, bage pe kuasa guna naluken kerina kuasa musuh,+ janah la lit kai pe si banci ncilakai kena.
20 Amin pe bage, ula ermeriah ukur perban malekat-malekat jahat e patuh man kena, tapi ermeriah ukurlah perban gelar kena enggo itulis i surga.”+
21 Paksa si e pe, meriah kel akap Jesus iban kesah si badia janah nina, “O Bapak, Tuhan si erkuasa i langit ras doni, kupuji Kam i lebe-lebe jelma si enterem, sebap enggo pebetehkenNdu man anak-anak kai si bunikenNdu alu megermet arah kalak si pentar ras erpemeteh.+ O Bapak, enda kap si ngena ateNdu.”+
22 Nina Jesus ka, “Enggo bereken Bapakku kerinana man bangku. Ise pe labo nandai Anak selain Bapak, janah ise pe labo nandai Bapak selain Anak.+ Bapak e banci tandai kalak adi nggit Anak e mpebetehkenca kerna Bapak.”+
23 Kenca si e sanga la lit kalak si deban, nina man murid-muridna, “Ermeriah ukur me kalak si ngidah kai si idah kena.+
24 Situhuna kukataken man kena, enterem nabi bage pe raja, merhat ngidah kai si idah kena gundari e, tapi la idahna,+ janah merhat kalak e megi kai si begi kena, tapi la begina.”
25 Sekalak ahli Undang-Undang Musa tedis guna nguji Jesus janah nina, “O Guru, kai si arus kulakoken guna ndatken kegeluhen si rasa lalap?”+
26 Ngaloi Jesus, “Kai kin si tertulis bas Undang-Undang Musa? Kai si angkaindu?”
27 Jawapna, “‘Arus kelengindu Jahwe* Dibatandu alu kerina pusuhndu, kegeluhenndu,* gegehndu, ras perukurenndu,’+ ras ‘kelengi kalak si deban bagi kam engkelengi dirindu.’”+
28 Nina Jesus man bana, “Tuhu jawapenndu ena. Teruslah lakoken e janah datndu pagi kegeluhen.”+
29 Tapi buktikenna atena dirina benar,+ emaka nina man Jesus, “Ise dage si arus kukelengi?”
30 Ngaloi Jesus, “Sekalak dilaki nusur arah Jerusalem nari ku Jeriho. Bas dalan, rampok kalak ia, buatna kerinana, pekpekina ia, jenari lawes perampok e, tadingkenna ia menam mate.
31 Rembang nusur ka sekalak imam arah dalan e, tapi sanga idahna ia, silahkenna, jenari teruskenna perdalanenna.
32 Bage ka pe sekalak Lewi, sanga seh ia bas ingan e, idahna ia, silahkenna ka, jenari teruskenna perdalanenna.
33 Tapi sanga lewat kalak Samaria+ arah dalan e janah idahna ia, mekuah atena.
34 Emaka deherina ia, tamana minak ras anggur ku luka-lukana, janah balutina. Kenca si e, angkatna ia ku keledena jenari babana ku penginapen ras rawatna.
35 Pepagina, berena dua dinar* man pengurus penginapen, janah nina, ‘Rawatlah ia, adi la pagi bias enda, kugalari ka pagi kenca aku reh.’
36 Adi menurutndu, ise arah kalak si telu enda si engkelengi+ kalak si irampok ndai?”
37 Nina, “Kalak si rate mekuah man bana.”+ Emaka nina Jesus, “Laweslah janah ban ka bage.”+
38 Terusken kalak e perdalanenna janah masuk ia ku sada kuta. I je, lit sekalak diberu si gelarna Marta.+ Alo-alona Jesus jadi tamu i rumahna.
39 Lit ka sekalak seninana si gelarna Maria. Kundul ia i deher nahe Tuan janah terus begikenna kai si katakenna.
40 Tapi Marta la perdiatekenna sebap sibuk ia ndahiken dahinna. Emaka dahina Jesus janah nina, “O Tuan, la nge akapndu dalih adi pediat seninaku aku sisada ndahiken kerina dahin enda? Suruh min ia nampati aku.”
41 Nina Tuan man bana, “Marta, Marta, mbuesa si ukurindu e.
42 Padahal, sitik ngenca si iperluken, sada ngenca. Enggo pilih Maria bagin si mehulina,+ janah e la pagi ibuat arah ia nari.”
Cataten i teruh
^ Ntah “ula dakep ise pe sanga mperkuanken kalak.”
