Lukas 11:1-54
11 Bas sada waktu, ertoto Jesus bas sada ingan. Kenca dung ia ertoto, nina sekalak muridna, “O Tuan, ajari dage kami cara ertoto, bagi Johanes enggo ngajari murid-muridna.”
2 Emaka nina man kalak e, “Katawari pe kena ertoto, katakenlah bagenda, ‘O Bapak, ipebadia* min gelarNdu.+ Reh min KerajanNdu.+
3 Bereken min man kami pangan* si perluken kami tiap wari.+
4 Ampuni min dosa-dosa kami,+ sebap kami pe enggo ngampuni kerina kalak si erdosa* man kami,+ janah ula min pediat kami nyerah man percuban.’”+
5 Kenca si e nina man kalak e, “Adi lit sekalak arah kena lawes ndahi temanna bas tengah berngi janah ngataken, ‘O Teman, pinjam telu rotindu,
6 sebap sekalak temanku si sangana bas perdalanen singgah atena ku rumahku janah la lit si man berenken man bana.’
7 Tapi ngaloi ia arah bas nari, ‘Ula ganggundu aku. Pintu enggo ikunci, aku ras anak-anakku si kitik denga enggo medem. La banci aku medak, emaka la banci kubereken kai pe bandu.’
8 Kukataken man kena, amin pe kena temanna, la ia nggit medak janah la berekenna kai pe man kena, tapi perban terus pindo kena,+ dungna medak ia janah berekenna kai si perluken kena.
9 Emaka kukataken man kena, teruslah pindo,+ aloken kena nge pagi; teruslah darami, dat kena nge pagi; teruslah tuktuk, ibukaken nge pagi man kena.+
10 Sebap ise pe si mindo pasti ngalo,+ ise pe si ndarami pasti idatna, janah ise pe si nuktuk pasti ibukaken.
11 Situhuna, ise arah kena selaku bapak mereken nipe man anakna adi ikan nge pindona?+
12 Ntah mere kalajengking adi telor nge pindona?
13 Adi kena si erdosa pe meteh carana mere si mehuli man anak-anak kena, terlebih ka Bapak si i surga pasti bereNa kesah si badia man kalak si mindo man baNa!”+
14 Kenca si e, pelawesna malekat jahat si erban sekalak dilaki bisu.+ Kenca ndarat malekat jahat e, kalak si bisu ndai banci ngerana. Ngidah si e takjup kel jelma si enterem.+
15 Tapi piga-piga ngataken, “Pelawesna malekat-malekat jahat alu penampat Balsebul,* penguasa malekat jahat e.”+
16 Lit ka si nguji Jesus, pindona gelah cidahken Jesus tanda+ arah surga nari.
17 Teh Jesus perukuren kalak e,+ emaka nina, “Kerina kerajan si lit perpecahen i je, ugapa pe hancur nge, janah rumah tangga si lit perpecahen i je, ndabuh me.
18 Bage ka pe, adi Setan ngelawan dirina sendiri, terpecah-pecah kap ia. Uga kerajanna e banci tetap ertahan? Sebap kataken kena kupelawes malekat jahat alu penampat Balsebul.
19 Adi alu penampat Balsebul kin aku mpelawes malekat jahat, alu penampat ise dage pengikut kena mpelawessa? Enda me sebapna kataken pengikut kena pagi kena salah.
20 Tapi adi alu penampat jari Dibata+ aku mpelawes malekat jahat, e tandana Kerajan Dibata enggo tuhu-tuhu reh janah la teh kena.+
21 Adi sekalak dilaki si megegeh ras si ersenjata lengkap njaga istanana, erta-ertana tetap aman.
22 Tapi adi reh kalak si gegehen nyerang dilaki e ras naluken ia, buatna kerina senjata si akap dilaki e banci ngelindungi ia. Jenari bagi-bagikenna kerina si buatna arah dilaki e.
23 Ise si la erpihak man bangku ngelawan aku kap, janah ise si la mpepulung ras aku, erban merap kap.+
24 “Sanga enggo ndarat malekat jahat arah sekalak jelma, lawes malekat jahat e, lewatina ingan-ingan si kerah guna ndarami ingan ngadi tapi la datna, emaka nina, ‘Mulihlah aku ku rumahku si enggo kutadingken sange.’+
25 Seh kenca i je, dapetina rumah e enggo bersih isapui ras enggo ipejile.
26 Jenari lawes ia, babana pitu malekat si deban si jahaten asangken ia, masuk ia kerina ku bas, i je me ia ringan. Emaka keleken keadan kalak e asangken si sebelumna.”
27 Sanga ngerana denga Jesus, sekalak diberu arah jelma si enterem e ngerana alu megang, nina, “Ermeriah ukurlah diberu si ngelahirken kam ras pepinemken* kam!”+
28 Tapi nina ngaloi, “Lang, si ermeriah ukur eme kalak si megiken kata Dibata ras ndalankenca!”+
29 Sanga pulung jelma si enterem e, nina Jesus, “Kalak enda kalak si jahat kap. Pindona tanda tapi la lit tanda si ibereken selain tanda Juna.+
30 Sebap bagi Juna+ jadi tanda man kalak Niniwe, Anak manusia pe jadi tanda pagi man kalak enda.
31 Bas Wari Penghakimen pagi, keke ratu i selatan nari+ ras kalak* enda janah katakenna kalak enda ersalah, perban reh ia arah ujung doni nari guna megiken kepentaren Salomo. Situhuna, i jenda lit si belinen asangken Salomo.+
32 Bas Wari Penghakimen pagi, keke kalak Niniwe ras kalak* enda, katakenna pagi kalak enda ersalah, perban kalak Niniwe ertobat sanga begina berita Juna.+ Situhuna, i jenda lit si belinen asangken Juna.
33 Kenca lampu ipegara, labo tamaken kalak bas ingan si terbuni ntah pe i teruh keranjang,* tapi bas ingan lampu,+ gelah ise pe si reh ku je banci ngidah terang e.
34 Matandu kap lampu man dagingndu. Adi ku sada tujun saja* matandu ngenen,* ersinar me kerina dagingndu. Tapi adi matandu percian,* kerina dagingndu jadi gelap.+
35 Emaka hati-hatilah gelah terang si lit bas kam e labo kegelapen.
36 Emaka, adi kerina dagingndu terang janah la lit baginna si gelap, kerinana jadi terang bagi sanga kam iterangi lampu.”
37 Kenca kataken Jesus kerina e, undang kalak Parisi ia man. Emaka masuk Jesus ku rumahna jenari kundul ia tertande i meja guna man.
38 Tapi, mamang ate kalak Parisi e ngidah ia la nuci tan* ope lenga man.+
39 Tapi nina Tuan man bana, “O kalak Parisi, bersihken kena cangkir ras piring kena si arah darat, tapi si arah bas dem kerangapen* ras kejahaten.+
40 O kalak si la masuk akal! La kin Dibata si erban bagin si arah darat ras si arah bas?
41 Emaka, berekenlah pemere man kalak si mesera* arah pusuh kena nari, alu bage kena tuhu-tuhu bersih bas kerina.
42 Tapi cilaka kel kena, o kalak Parisi, perban bereken kena sepersepuluh arah sinuan-sinuan mint nari, inggu,* bage pe rempah-rempah si debanna,+ tapi la perdiateken kena keadilen ras kekelengen man Dibata! Mere perpuluhen e wajip lakoken kena, tapi si debanna pe arus perdiateken kena.+
43 Cilaka kel kena, o kalak Parisi, sebap merhat kel kena kundul bas ingan si arah lebe* bas ingan-ingan pulung kalak Jahudi* janah merhat kel kena perkuanken kalak alu mehamat bas ingan si enterem jelma!*+
44 Cilaka kel kena, sebap kena bali ras kuburen si la jelas teridah,*+ erdalan kalak i je tapi la tehna maka e kuburen!”
45 Ngaloi sekalak arah ahli Undang-Undang Musa e nari, “O Guru, kami pe hinandu kap alu kata-katandu ena.”
46 Jenari nina Jesus, “Cilaka me kena si ahli bas Undang-Undang Musa, sebap berati kena kalak alu baban si mberat, tapi la kena nggit ndadap baban e alu sada jari pe!+
47 “Cilaka kel kena, sebap bangun kena kuburen nabi-nabi, tapi nini bulang kena nge si munuh kalak e!+
48 Pasti teh kena kai si lakoken nini bulang kena, janah setuju kena ras kalak e. Kalak e munuh nabi-nabi,+ kena mbangun kuburenna.
49 E me sebapna Dibata ngerana alu kepentaren, ‘Kusuruh nabi-nabi ras rasul-rasul man kalak e, tapi bunuh kalak e ia janah siksana piga-piga,
50 emaka kalak e pagi si ertanggung jawap man kerina dareh nabi si mambur mulai kin doni ijadiken,+
51 mulai dareh Abil nari+ seh ku dareh Sakaria, si ibunuh i antara ingan nutung* persembahen ras rumah Dibata.’*+ Kukataken man kena maka kalak enda pagi si ertanggung jawap nandangi dareh kalak e.
52 “Cilaka kel kena si ahli bas Undang-Undang Musa, perban buat kena kunci pemeteh. Kena la masuk ku bas, janah ambati kena kalak si atena masuk ku bas!”+
53 Emaka sanga lawes Jesus je nari, ahli-ahli Undang-Undang Musa ras kalak Parisi mulai nyiksa ia alu ranan, sungkuni kalak e ia alu melala kel penungkunen,
54 janah timaina kataken Jesus kai si banci njebak ia.+
Cataten i teruh
^ Ntah “ianggap badia; ihamati.”
^ As. “roti.”
^ Ntah “rutang.”
^ Penggelaren man Setan.
^ Ntah “mere ASI man.”
^ Ntah “kalak si jahat ras la setia.”
^ Ntah “kalak si jahat ras la setia.”
^ Ntah “tumba.”
^ Ntah “Adi jelas.”
^ As. “Adi sederhana matandu.”
^ As. “jahat.”
^ Maksudna, nuci tan menurut kebiasan kalak Jahudi.
^ Ntah “hasil jarahen.”
^ Sinuan-sinuan si iban jadi tambar ras bumbu erdakan.
^ Ntah “si mehulina.”
^ Ntah “bas pajak.”
^ Ntah “la lit tandana.”
^ Ntah “rumah pertoton.”
