Lukas 14:1-35
14 Bas kesempaten si deban, lawes Jesus man ku rumah salah sada peminpin kalak Parisi bas wari Sabat. I je, perdiateken kalak kel ia.
2 I lebe-lebena lit sekalak dilaki si sakit, bengkak dagingna.*
3 Emaka nungkun Jesus man ahli-ahli Undang-Undang Musa bage pe kalak Parisi, “Menurut undang-undang, banci nge mpepalem kalak bas wari Sabat ntah lang?”+
4 Tapi sinik saja kalak e. Emaka jemak Jesus dilaki ndai, pepalemna jenari suruhna lawes.
5 Kenca si e, nina man kalak e, “Ise arah kena adi ndabuh anakna ntah lembuna ku sumur+ bas wari Sabat, la mis tarikna?”+
6 La terjawap kalak e ia.
7 Sanga perdiateken Jesus maka tamu-tamu si i je milih ingan si mehamatna, ceritakenna sada perumpaman.*+ Nina man kalak e,
8 “Adi undang kalak kam ku pesta perjabun, ula kundul bas ingan si mehamatna.+ Banci saja iundang ka kalak si hamaten asangken kam.
9 Jenari reh kalak si ngundang kena duana janah nina man bandu, ‘Enda ingan kundulna.’ Emaka mela akapndu janah miser kam ku pudi.
10 Tapi adi iundang kam, rehlah kam, kundullah arah pudi, alu bage sanga reh kalak si ngundang kam e, katakenna kari man bandu, ‘O Teman, arah lebe kam kundul.’ Jenari datndu kehamaten i lebe-lebe kerina tamu.+
11 Sebap ise pe si peganjangna bana ipeteruk pagi, janah ise pe si peterukna bana ipeganjang pagi.”+
12 Kenca si e nina Jesus ka man kalak si ngundang ia, “Adi banndu acara man-man sanga suari ntah berngi, ula lebuhndu teman-temanndu ntah pe senina-seninandu ntah kade-kadendu ntah tetanggandu si bayak. Sebap, banci saja undangna ka kam pagi guna mbalassa.
13 Tapi adi banndu pesta, undanglah kalak si mesera, si cacat, si lumpuh, ras si pentang.+
14 Ermeriah ukur pagi kam, sebap kalak e la ngasup mbalassa man bandu. Datndu pagi balasenna sanga kalak si benar ipekeke.”+
15 Megi si e, nina salah sada arah tamu e man bana, “Ermeriah ukur me kalak si man bas Kerajan Dibata.”
16 Nina Jesus man bana, “Sekalak dilaki erban pesta man berngi si mbelin,+ janah enterem si undangna.
17 Sanga pesta man berngi si mbelin e nandangi imulai, suruhna budakna ndahi kalak si iundang guna ngataken, ‘Mari, kerina enggo isikapken.’
18 Tapi, kerina erban alasen.+ Lit si ngataken, ‘Lit kutukur juma janah kunen ateku. Emaka, ula sangkut ukurndu, aku la banci reh.’
19 Nina si deban, ‘Enggo kutukur lima pasang lembu janah kunen ateku mejile ntah lang, emaka ula sangkut ukurndu.’+
20 Nina si debanna ka, ‘Aku la banci reh, mbaru denga aku erjabu.’
21 Emaka mulih budak e janah laporkenna kerina man tuanna. Merawa tuan rumah e janah nina man budakna, ‘Mislah kam lawes ku pasar-pasar si galang ras ku gang-gang kota, baba ku jenda kalak si mesera, si cacat, si pentang, ras si lumpuh.’
22 Bas waktuna, nina budak e, ‘O Tuan, enggo kulakoken perentahndu, tapi lit denga ingan kosong.’
23 Emaka nina tuan e man budakna, ‘Laweslah ku dalan-dalan ras ku gang-gang i kuta-kuta, iahken kalak e reh, gelah dem rumahku e.+
24 Kukataken man kena, kalak si iundang ndai, sada pe kari la man bas pestaku.’”+
25 Sanga enterem jelma erdalan ras Jesus, tulihkenna ku kalak e, janah nina,
26 “Adi lit kalak si reh man bangku janah kelengen atena* bapakna, mamakna, diberuna, anak-anakna, seninana, turangna, bage pe dirina sendiri,+ la ia banci jadi muridku.+
27 Ise pe si la babana tiang siksanna* janah la ikutkenna aku, la banci jadi muridku.+
28 Contohna, adi lit arah kena nari si atena mbangun sada menara, pasti kundul ia lebe janah kirana biayana guna meteh bias ntah lang senna ndungisa.
29 Adi la bage, banci saja pondasina ngenca terbangunna tapi la banci dungina, janah kerina kalak si ngenenca nokohi ia,
30 nina, ‘Mbangun ia tapi la terdungina.’
31 Ntah, adi lit raja si erperang atena ras raja si deban, pasti kundul ia lebe janah pindona pedah guna meteh ngasup nge ia ntah lang alu 10.000 tentera ngelawan raja si 20.000 tenterana.
32 Adi la ia ngasup, suruhna sada kelompok utusenna mindo perdamen sanga ndauh denga musuh ndai.
33 Bage ka pe, teklah maka kena la banci jadi muridku adi la tadingken kena kerina erta kena.+
34 “Sira tuhu mehuli. Tapi adi sira lanai masin, alu kai nari banci ipemasin?+
35 E la cocok man taneh ntah pe jadi pupuk. Ambekken kalak me e. Ise pe si ercuping, begikenlah.”+
Cataten i teruh
^ Ntah “si sakit edema,” penakit perban mbuesa cairen bas daging.
^ Ntah “anding-andingen.”
^ As. “janah la segat atena,” maksudna kurang kekelengenna.
