Lukas 15:1-32
15 Kerina pemungut pajak ras kalak perdosa terus pulung engkelilingi Jesus guna megiken ia.+
2 Kalak Parisi ras ahli-ahli Undang-Undang Musa lalap jungut-jungut, nina, “Alo-alo dilaki enda kalak perdosa janah man ia ras.”
3 Jenari ceritaken Jesus perumpaman* enda man kalak e,
4 “Adi lit sekalak arah kena 100 biri-birina, janah bene sada, la kin tadingkenna si 99 e i mbalmbal janah daramina si bene ndai ngayak dat?+
5 Kenca datna, tamana bas barana janah meriah kel ukurna.
6 Sanga ia mulih ku rumah, lebuhna teman-temanna ras tetanggana, nina man kalak e, ‘Ermeriah ukurlah ras aku, sebap enggo kudat biri-biriku si bene.’+
7 Bage ka me, belinen keriahen ukur i surga perban sekalak perdosa si ertobat,+ asangken si 99 kalak si benar si la perlu ertobat.
8 “Ntah, adi lit sekalak diberu sepuluh sen logam pirakna,* janah bene sada, la kin pegeluhna lampu ras sapuna rumahna, jenari daramina alu megermet ngayak dat?
9 Sanga datna, lebuhna teman-temanna* ras tetanggana, nina, ‘Ermeriah ukurlah ras aku, sebap enggo kudat sen logam pirakku si bene.’
10 Bage ka me, lit keriahen ukur bas malekat-malekat Dibata perban sekalak perdosa si ertobat.”+
11 Jenari nina Jesus, “Lit sekalak dilaki dua anakna dilaki.
12 Nina anakna si nguda man bapakna, ‘O Bapak, bereken man bangku erta si jadi baginku.’ Emaka bagikenna erta-ertana man duana anakna e.
13 Piga-piga wari kenca si e, pepulung anakna si nguda e kerina ertana jenari lawes ia ku negri si ndauh, i je sia-siakenna kerina ertana e alu ndalani kegeluhen si la mehuli.*
14 Kenca enggo keri kerinana, terjadi kelihen si parah bas negri e. Dungna mesera geluhna.
15 Pindona pendahin man sekalak penduduk negri e. Emaka suruhna ia njaga babi i juma.+
16 Perban lihena, panna atena nakan* si pan babi-babi e. Tapi kai pe la bereken kalak man bana.
17 “Kenca tehna maka motu kel perbahanenna nina, ‘Seh kel buena sierdahin bapakku janah riba-iba pangan* kalak e, tapi aku jenda mate tena perban kelihen!
18 Kudahilah bapakku janah ningku kari man bana, “O Bapak, enggo erdosa aku man Dibata bage pe man bandu.
19 Lanai aku cocok igelari anakndu. Banlah aku jadi sierdahinndu saja.”’
20 Emaka berkat me ia ndahi bapakna. Sanga ia ndauh denga, idah bapakna ia janah mekuah atena. Emaka kiam bapakna e ngayakisa jenari dakepna anakna e janah emana alu lembut.
21 Nina anakna e, ‘O Bapak, enggo erdosa aku man Dibata bage pe man bandu.+ Lanai aku cocok igelari anakndu.’
22 Tapi nina bapakna e man budak-budakna, ‘Pedasken! Buat jubah si mejilena janah pakeken man bana. Tama cincin ku jari-jarina janah pakeken selopna.
23 Potong ka anak lembu si mbur, gelah man-man kita janah sirayaken,
24 sebap anakku enda enggo mate tapi nggeluh mulihken;+ ia enggo bene janah dat mulihi.’ Mulai me kalak e ermeriah ukur.
25 “Sanga si e anakna sintua sangana i juma. Sanga ia mulih janah enggo ndeher ku rumah, begina sora musik ras kalak landek.
26 Emaka lebuhna salah sada pelayan janah sungkunna kai si terjadi.
27 Ngaloi ia, ‘Adekndu enggo mulih, janah potong bapakndu anak lembu si mbur sebap enggo mulih ia bas keadan sehat.’*
28 Tapi merawa ia janah la ia nggit masuk. Emaka ndarat bapakna janah pindona kel man bana.
29 Tapi nina man bapakna, ‘Enggo ertahun-tahun aku erdahin bagi budak man bandu, la pernah sekali pe kulawan perentahndu, tapi la pernah sekali pe berendu aku anak kambing gelah kupan ras teman-temanku.
30 Tapi mulih kenca anakndu ah, si enggo ngkeriken ertandu ras pelacur, potongndu anak lembu si mbur man bana.’
31 Jenari nina bapakna man bana, ‘O Nakku, kam lalap nge ras aku, janah kerina ertaku enda jangndu ka nge.
32 Tapi enda arus sirayaken janah meriahlah ukurta, sebap adekndu enggo mate tapi nggeluh mulihken; ia enggo bene janah dat mulihi.’”
Cataten i teruh
^ Ntah “anding-andingen.”
^ Ntah “teman-temanna si diberu.”
^ Ntah “si poya-poya; si la rorat.”
^ Ntah “kacang-kacangen arah batang keratonia.”
^ As. “roti.”
^ Ntah “selamat.”
