Lukas 16:1-31
16 Jenari nina Jesus ka man murid-muridna, “Sekalak dilaki si bayak lit si ngurus rumah tanggana. Pengurus e ituduh mborosken barang-barangna.
2 Emaka lebuhna pengurus e janah nina, ‘Lit kubegi laporen si la mehuli kerna kam. Bereken laporen dahinndu sedekah enda man bangku, sebap lanai kam banci ngurus rumahku.’
3 Kenca si e, nina pengurus e bas ukurna, ‘Ntisik nari pengadi tuanku atena aku, kai nge si arus kulakoken? Aku lanai ngasup nangkul, janah mela aku mindo-mindo.
4 Oh! Kuteh kai si arus kulakoken, gelah sanga pengadina kari aku, banci alo-alo kalak aku bas rumah kalak e.’
5 Jenari lebuhna sekalak-sekalak si rutang man tuanna e, janah nungkun ia man si pertama, ‘Sekai utangndu man tuanku?’
6 Ngaloi ia, ‘Utangku 2.200 liter* minak saitun.’ Nina pengurus e, ‘Buatlah surat perjanjin utangndu. Kundulken jenari mis tulisken 1.100 liter.’
7 Kenca si e, nina man si deban, ‘Adi kam, sekai utangndu?’ Nina, ‘Seratus guni* gandum.’ Nina pengurus e man bana, ‘Buatlah surat perjanjin utangndu janah tulis 80 guni.’
8 Kenca bage pujiken tuan ndai pengurus e perban cerdik* perbahanenna, amin pe la ia bujur. Cerdiken kap anak-anak doni* enda bas erurusen ras kalak si deban asangken anak-anak terang.+
9 “Kukataken ka man kena: Pakelah kebayaken si la benar guna ndatken teman,+ gelah adi keri kebayaken e, aloken kalak e kena bas ingan tading si rasa lalap.+
10 Kalak si setia bas si kitik, setia ka nge ia bas si mbelin, janah kalak si la benar bas si kitik, tentu bas si mbelin pe la ia benar.
11 Perban si e, adi la kena setia sanga nggunaken kebayaken si la benar enda, ise pagi si mpercayaken kebayaken situhu-tuhu man kena?
12 Adi la kena setia bas ngurus erta kalak si deban, ise pagi si mereken man kena si arusna aloken kena?+
13 La lit pelayan si banci jadi budak man dua tuan. Perban pasti segat atena si sekalak janah kelengina si deban, ntah pe setia ia man si sekalak tapi la diatena si deban. La kena banci jadi budak man Dibata bage pe man Kebayaken.”+
14 Kenca megi kata-kata Jesus e, kalak Parisi si mata duiten mulai nokohi ia.+
15 Emaka nina Jesus man kalak e, “Kena me kalak si ngataken diri kena benar i lebe-lebe manusia,+ tapi teh Dibata pusuh kena.+ Sebap kai si merga akap manusia, ciga akap Dibata.+
16 “Undang-Undang Musa ras Ajaren Nabi-Nabi iberitaken seh ku jaman Johanes. Mulai je nari, Kerajan Dibata iberitaken selaku berita si meriah, janah tiap kalak erusaha kel masuk ku je.+
17 Situhuna, amin pe masap langit ras doni, la mungkin sada hurup ntah sada bagin si kitikna pe arah Undang-Undang Musa si la terjadi.+
18 “Ise pe si nceraiken diberuna janah ngempoi diberu si deban, ia enggo erlua-lua. Ise pe si ngempoi diberu si iceraiken dilakina, ia pe enggo erlua-lua.+
19 “Lit sekalak dilaki si bayak. Bajuna arah kain warna ungu ras arah linen si merga, janah tiap wari ia nggeluh ersenang-senang ras mewah.
20 Tapi lit sekalak pemindo-mindo gelarna Lasarus si kerina dagingna bisulen. Rusur ia itamaken i gerbang dilaki si bayak e,
21 janah arapkenna rimah-rimah si ndabuh arah meja dilaki si bayak e guna ngisi beltekna. Biang pe rehen ndilati bisulna e.
22 La ndekah kenca si e, mate pemindo-mindo e janah baba malekat-malekat ia ku deher* Abraham.
“Dilaki si bayak e pe mate janah ikuburken.
23 Sanga nanamina kiniseran bas Kuburen,* nenna ku datas, janah dauh-dauh nari idahna Abraham ras Lasarus i deherna.*
24 Emaka erlebuh ia, nina, ‘O Bapak, Abraham, mekuah min atendu aku. Suruh min Lasarus ncelupken ujung jari-jarina ku lau janah taktakkenna ku dilahku, sebap mesui kel kuakap bas api si gara enda.’
25 Tapi nina Abraham, ‘O Anakku, ingetlah maka segedang geluhndu alokenndu melala si mehuli, tapi Lasarus ngaloken kai si la mehuli. Gundari, ia sangana iapuli i jenda, tapi kam mesui kel atendu.
26 Selain si e, antara kami ras kena lit iban embang si mbages, emaka la banci kalak nyebrang jenda nari ku jena, bage ka pe si jena nari ku jenda.’
27 Emaka nina, ‘Adi bage Bapak, kupindoken man bandu, gelah suruhndu ia ku rumah bapakku,
28 perban lit lima seninaku. Suruhlah katakenna man kalak e gelah ula kalak e masuk ku bas ingan siksan enda.’
29 Tapi nina Abraham, ‘Bas kalak e lit tulisen Musa ras Ajaren Nabi-Nabi, pediatlah ibegiken kalak e kerinana.’+
30 Kenca si e nina, ‘O Bapak, Abraham, labo pagi begikenna, tapi adi lit kalak mate si nggeluh mulihi, dahina kalak e, pasti kalak e ertobat.’
31 Tapi nina Abraham man bana, ‘Adi tulisen Musa+ ras Ajaren Nabi-Nabi la begiken kalak e, kalak mate si nggeluh mulihi pe labo begikenna.’”
Cataten i teruh
^ As. “100 bat.” 1 bat = 22 liter.
^ Sada guni gandum = 170 kilo.
^ Ntah “pentar.”
^ As. “dada.”
^ As. “dadana.”
